प्रधानमन्त्री प्रचण्डलाई झस्काउने कांग्रेसले उठाएका तीन प्रश्न

A+ A A-

आफ्नो सत्तासारथि कांग्रेसलाई प्रतिपक्षीको बेन्चमा धकेलेपछि प्रधानमन्त्री पुष्पकमल दाहाल प्रचण्डले बिहीबार संसदमा पहिलोपटक ‘फेस’ गरे । नेपालको संसदीय राजनीतिको सबैभन्दा अनुभवी पार्टी कांग्रेस प्रतिपक्षीको बेञ्चमा पुगेपछि प्रधानमन्त्री प्रचण्डले कसरी संसदमा प्रतिपक्षीको सामना गर्छन्, चासोको विषय छ । साथै, निकट समयअघिको आफ्नै समर्थनको प्रधानमन्त्रीलाई कांग्रेसले संसदमा कसरी लिन्छ, त्यो पनि चासोको विषय बनेको छ ।

बिहीबार बसेको प्रतिनिधिसभाको बैठकले आगामी दिनमा प्रधानमन्त्री कसरी अगाडि बढ्छन् र कांग्रेसले के गर्छ भन्ने विषयको छनक दुवैले दिएका छन् । तुलनात्मक रूपमा प्रधानमन्त्री कांग्रेससँग नम्र रूपमा प्रस्तुत भए । उनले बारम्बार निजी व्यक्तिगत रूपमा कांग्रेससँग सम्बन्ध राम्रो रहेको बताएर आगामी दिनका लागि सहकार्यको सम्भावनालाई जीवितै राखेका छन् । र, त्यसमा कांग्रेसले पनि उनकै भाषामा जवाफ दिएको छ ।

प्रधानमन्त्री प्रचण्डले संसदमा सम्बोधन गरेपछि प्रमुख प्रतिक्षी दलका तर्फबाट कांग्रेसका प्रमुख सचेतक रमेश लेखकले बोले । कांग्रेसको धारणा राख्ने क्रममा लेखकले पनि व्यक्तिगत रूपमा प्रचण्डसँग सम्बन्ध राम्रो रहेको बताए । सँगै प्रचण्डले सम्बोधनका क्रममा कांग्रेसले आफूलाई बेइमान भनेको विषयमा जनाएको असन्तुष्टिको पनि जवाफ दिए । प्रचण्डले आफूसँग रहँदा इमानदार हुने र आफूबाट टाढा गएपछि बेइमान हुने हो भन्दै प्रश्न गरेका थिए । जवाफमा लेखकले गठबन्धन तोडेर प्रचण्डले जनताप्रति पनि बेइमानी गरेको बताए । चुनावपूर्वको गठबन्धनअनुसार कांग्रेस र माओवादीलाई जनताले मत दिएको उल्लेख गर्दै अहिले प्रचण्डले गठबन्धन परिवर्तन गरेर ती मतदातामाथि बेइमानी गरेको लेखकले जवाफ फर्काए ।

संसदमा प्रधानमन्त्री र प्रतिपक्षीको सवालजवाफ चल्दा कांग्रेसले प्रचण्डलाई झस्काउने गरी मुख्य रूपमा तीनवटा प्रश्न उठाएको छ ।

टीआरसीमा छलफल नगर्ने चेतावनी

कांग्रेससँगको गठबन्धन तोडेर एमालेलगायत दलसँगको गठबन्धनपछि सो नयाँ गठबन्धनमा भएको आठबुँदे सहमतिको एउटा बुँदा संक्रमणकालीन न्यायसम्बन्धी विषय टुंग्याउने उल्लेख छ ।

यही बुँदामा टेकेर कांग्रेसले प्रधानमन्त्रीले यो भनाइ नसच्याए यो विषयमा छलफल नै नगर्ने चेतावनी दिएको छ । सम्बोधनका क्रममा प्रमुख सचेतक लेखकले भने, ‘प्रधानमन्त्रीजी आफैँले हस्ताक्षर गरेको बुँदामा टीआरसी टुंग्याउने कुरा रहेछ । के त्यसो भए कांग्रेसले टीआरसी रोकेकाले गठबन्धन तोडेको हो ? होइन भने सबैलाई थाहा छ, कसले रोकेको हो ? यो बुँदाको कुरा नसच्याए टीआरसीमा हुने कुनै पनि छलफलमा कांग्रेस सहभागी हुँदैन भनेपछि के हुन्छ ?’

लेखकको संकेत टीआरसी एमालेले रोकेको तर्फ थियो । हुन पनि कानुन समितिमा कांग्रेसले पटकपटक बहुमतबाट पारित गरेर भए पनि टीआरसीसम्बन्धी विधेयक टुंग्याउने बताएको थियो । तर, एमालेले पटकपटक रोकेको थियो । अहिले एमालेसँगको गठबन्धनपछि गरिएको आठबुँदे सम्झौतामा टीआरसी टुंग्याउने विषय उल्लेख छ । टीआरसीको एक मुख्य पक्ष कांग्रेसले त्यो सम्झौताको बुँदा नसच्याए छलफलमै सहभागी नहुने बताएर प्रधानमन्त्रीलाई झस्क्याएको छ ।

धोका पाएकाहरू सबै एकठाउँ

संसदमा कांग्रेसले एमालेसँग गठबन्धन हुन सक्ने सम्भावनाको पनि संकेत गरेको छ । सम्बोधनका क्रममा प्रमुख सचेतक लेखकले भने, ‘हुन त तपाईं (प्रचण्ड) ले धोका दिन कोही बाँकी छैनन् । तपाईंले धोका दिएका जति सबै एकैठाउँ आए भने तपाईंको अवस्था के होला ?’

सरकार बनाउने क्रममा पछिल्लो १४ महिनामा प्रचण्डले कांग्रेस र एमाले दुवैलाई धोका दिएका छन् । गत वर्षको १० पुसमा कांग्रेसलाई धोका दिएका प्रचण्डले सोही वर्ष फागुनमा एमालेलाई दिए । अहिले फेरि प्रचण्डले कांग्रेसलाई धोका दिएका छन् । संघदेखि प्रदेशसम्म कांग्रेस र एमाले मिले अरु साझेदारको आवश्यकता नै नपर्ने संसदको गणित छ । त्यसैले सबै धोका पाएकाहरू एकैठाउँमा उभिएमा माओवादी संघदेखि प्रदेशसम्म सत्ताबाट सडकमा पुग्ने अवस्था आउने गणित कांग्रेसले प्रचण्डलाई स्मरण गराएको हो ।

लात्ती हान्ने विषय

कांग्रेससँगको गठबन्धन तोडेर एमालेसँग गठबन्धन बन्ने निश्चित भएको भोलिपल्ट गत सोमबार एक सार्वजनिक कार्यक्रममा प्रधानमन्त्री प्रचण्डले आफू र माओवादीलाई कसैले प्रयोग गर्न खोजे लात्तीले हानेर निस्किने बताएका थिए । साथै, उनले सोही कार्यक्रममा आफू नमर्दासम्म उथलपुथल भइरहने बताएका थिए । बिहीबार संसदमा कांग्रेसले प्रचण्डको यही अभिव्यक्तिलाई लिएर चर्को आलोचना गरेको छ । सम्बोधनका क्रममा लेखकले भने, ‘एक जनासँग मगनी, अर्कोसँग लगनगाँठो, तेस्रोसँग हनिमुन, चौथोसँग डेटिङ र पाँचौँसँग टाप ठोक्ने कामलाई उथलपुथल भनिँदैन ।’

लेखकले प्रधानमन्त्रीको कुर्सीमा बसेर लात्ती हान्ने भनेर कसलाई भनेको हो भन्दै प्रश्नसमेत गरे । साथै, उनले प्रधानमन्त्रीले यो विषयमा स्पष्ट नपारे संसद कसरी चल्छ भनी प्रश्न मात्र गरेनन् संसद चल्न नदिने संकेतसमेत गरे ।

प्रकाशित मिति: बिहीबार, फागुन २४, २०८० १६:२४