गृहमा रविको ‘कमब्याक’, १३ महिनापछि सबै पद फिर्ता

A+ A A-

गत मंसिरको कुरा हो । राष्ट्रिय स्वतन्त्र पार्टीको संसदीय दलको कार्यालय सिंहदबारमा एक नेताले भनेका थिए, ‘पुस १० को गठबन्धन ब्युँताउने गरी छलफल भइरहेको छ । सभापति रवि लामिछाने पनि प्रधानमन्त्री पुष्पकमल दाहाल प्रचण्ड र एमाले अध्यक्ष केपी ओलीसँग संवादमा हुनुहुन्छ ।’

नागरिकता प्रकरणमा सांसद र गृहमन्त्री पद गुमाएर उपनिर्वाचनबाट सांसद भएर आएपछि रास्वपा सभापति लामिछानेले धेरैपटक प्रधानमन्त्री प्रचण्ड र एमाले अध्यक्ष ओलीसँग १० पुस २०७९ मा फर्किन प्रस्ताव राखेका थिए । सभापति लामिछानेले सांसद पद गुमाएपछि चितवन- २ मा गत १० वैशाखमै उपनिर्वाचन भएको थियो ।

उपनिर्वाचनमा विजयी भएपछि प्रधानमन्त्री प्रचण्डले सरकारमा सहभागी हुन सभापति लामिछानेलाई प्रस्ताव राखेका थिए । तर, लामिछाने १० पुसको समीकरणमा फर्कन चाहन्थे । गत मंसिरमा भएको रास्वपाको जलेश्वर बैठकले पनि सरकारमा सहभागी हुने ढोका खुल्ला राखेको थियो ।

१० पुसको समीकरणमा सोमबार एमाले-माओवादी फर्किएपछि रास्वपा पनि फेरि सरकारमा सहभागी भयो । र, १३ महिनापछि बुधबार सभापति लामिछाने सरकारमा फेरि उपप्रधानमन्त्री तथा गृहमन्त्रीका रूपमा ‘कमब्याक’ भए । उनले गुमेका सबै पद फिर्ता ल्याए । नागरिकता मुद्दामा सर्वोच्च अदालतले गत १३ माघ २०७९ मा फैसला गरेपछि उनले सांसद पदसँगै गृह मन्त्रालय गुमाउन पुगेका थिए ।

तर, निष्क्रिय भएको नागरिकतालाई सक्रिय बनाएर गृहमन्त्री बन्न खोजे तर सकेका थिएनन् । प्रधानमन्त्री प्रचण्ड उनलाई गृह मन्त्रालय दिन तयार नभएपछि सरकारमा सहभागी भएको ४२औँ दिन २२ माघ २०७९ मा रास्वपा सरकारबाट बाहिरिएको थियो ।

यसपटक पनि सभापति लामिछाने गृह मन्त्रालय नै लिएर सरकारमा सहभागी भएका छन् । त्यसो त २२ माघ २०७९ मा सभापति लामिछानेले फेरि सरकारमा सहभागी हुने संकेत गरेका थिए । सरकारबाट बाहिरिने निर्णय गरेपछि उनले भनेका थिए, ‘सदाका लागि गरेको निर्णय होइन ।’ यसरी उनी फेरि सरकारमा सहभागी भए ।

अघिल्लोपटक पनि उनी एमाले अध्यक्ष ओलीको साथमा गृहमन्त्री बनेका थिए । यसपटक पनि ओलीकै सहयोगमा गृह मन्त्रालय हात पारे । यसपटक गृहमा एमालेको पनि दाबी थियो । तर, सभापति लामिछानेले सरकारमा जान गृह नै बटमलाइन बनाएपछि अध्यक्ष ओली तयार भए ।

गृह मन्त्रालयमा माओवादीका वरिष्ठ उपाध्यक्ष नारायणकाजी श्रेष्ठको पनि दाबी थियो । प्रधानमन्त्री प्रचण्डले गृह मन्त्रालय मिलाउने जिम्मा एमाले अध्यक्ष ओलीलाई दिएका थिए । त्यसैले श्रेष्ठ गृह मन्त्रालय माग्न ओलीनिवास बालकोट पुगेका थिए । तर, ओलीले उपाध्यक्ष श्रेष्ठलाई रविलाई गृहमन्त्री बनाउन सहमत भएको जवाफ दिए । ओलीले गृह नै चाहिने भए रवि लामिछानेसँग कुरा गर्न श्रेष्ठलाई सुझाए ।

‘नारायणकाजीज्यू गृह मन्त्रालय दाबी गर्न मंगलबार अध्यक्ष ओलीलाई भेट्न आउनुभएको थियो । रविजीले गृह नपाए सरकारमा नजाने अडान लिएपछि अध्यक्ष ओली दिन तयार हुनुभएको हो,’ छलफलमा सहभागी एमालेका एक नेताले भने । यसरी रवि दोस्रोपटक गृहमन्त्री बने ।

तर, रास्वपाका नेताहरू पहिलोपटक थोरै समय सरकारमा रहेकाले यसपटक नै पहिलोपटकको जस्तो अनुभूति भएको बताउँछन् । ‘अघिल्लोपटक धेरै समय काम गर्न पाएनौँ । नयाँ थियौँ । यसपटक पहिलोपटक सहभागी हुन लागेको जस्तो अनुभूति भएको छ,’ प्रवक्ता मुकुल ढकालले भने ।

एक वर्षमा संसदीय अभ्यास बुझ्ने अवसर पाएकाले सरकारमा सहभागी भएर थप प्रभावकारी काम गर्न सक्ने प्रवक्ता ढकाल बताउँछन् । ‘एक वर्षमा निखारिएका छौँ । यसपटक जनताको मुद्दामा प्रभावकारी काम गर्छौं,’ उनले भने ।

प्रकाशित मिति: बुधबार, फागुन २३, २०८० १८:२६