अभिनाशको त्यो १८औँ ओभर जसले नेपालको उपाधि सपना चकनाचुर पार्‍यो

A+ A A-

त्रिकोणीय टी- २० आई सिरिजको उपाधि नेदरल्यान्ड्सले जित्दा नेपाल घरेलु दर्शकका अगाडि निरीह बन्यो । कीर्तिपुरस्थित त्रिवि अन्तर्राष्ट्रिय क्रिकेट मैदानमा मंगलबार भएको उपाधि भिडन्तमा नेपालका कप्तान रोहितकुमार पौडेलले टस जितेर पहिला ब्याटिङ गर्ने निर्णय लिएका थिए ।

घरेलु मैदानमा नेदरल्यान्ड्सलाई पराजित गरेर हजारौँ क्रिकेटप्रेमी दर्शकलाई खुसी दिने अवसर नेपाली टिमलाई थियो ।दर्शकको भरपूर साथ थियो नेपाली टोलीलाई । तर, मैदानमा नेपालले बाजी मार्न सकेन र उपाधिविहीन बन्न पुग्यो ।

पहिला ब्याटिङ गरेको नेपालले पूरै ओभर खेल्दै ८ विकेटको क्षतिमा १८४ रनको योगफल तयार पारेको थियो । जवाफी ब्याटिङ थालेको नेदरल्यान्ड्सले १९.३ ओभरमा ६ विकेट गुमाएर लक्ष्य भेट्टाएपछि नेपाल ४ विकेटले पराजित भएपछि घरेलु दर्शक निराश बने ।

ब्याटिङमा नेपालका लागि आसिफ शेखले सर्वाधिक ४७ रन बनाए भने गुल्सन झाले ३४ रनको योगदान दिए । कुशल मल्लले ११ बलमा २६ रनको उपयोगी पारी खेलेर स्कोर चुनौतीपूर्ण अवस्थामा पुर्‍याएका थिए ।

१८५ रनको लक्ष्य नेपालले रक्षा गर्ने सम्भावना थियो । तर, नेदरल्यान्ड्सको ओपनिङ जोडीले ८.१ बलमा ८३ रन जोडेर खेल आफ्नोतर्फ मोडेको थियो । नवौँ ओभर बलिङ गरेका कुशल मल्लले एकै ओभरमा दुवै ओपनरलाई आउट गरेर नेपाललाई खेलमा फर्काएका थिए । उनले ओपनर म्याक्स ओडाउडलाई २२ र अर्का ओपनर माइकल लेभिटलाई ५४ रनमा आउट गरे । एकै ओभरमा कुशलले दुई विकेट लिएपछि नेपाल खेलमा फर्कियो । त्यसपछि खेल १७ ओभरसम्म नेपालको नियन्त्रणमा थियो ।

नेपालले अन्तिम तीन ओभरमा ४० रन रक्षा गर्नुपर्ने थियो । नेदरल्यान्ड्सले १७ ओभर सकिँदा ४ विकेट क्षतिमा १४५ रन बनाएको थियो । यहाँबाट नेपालले खेल जित्ने सक्ने अवस्था थियो । तर, कप्तान पौडेलले डेथ स्पेलिस्ट मानिएका अभिनाश बोहोरामाथि विश्वास गरे, जुन नेपालका लागि दुर्भाग्यपूर्ण बन्यो । अभिनाशले १८औँ ओभरमा २१ रन लुटाए । उनको त्यो ओभरमा सिब्रान्ड अब्राहम इनगेल्ब्रेचेटले पहिलो दुई बलमा चौका र त्यसपछिका दुई बलमा दुई छक्का प्रहार गरेका थिए । समग्रमा अभिनाशले २१ रन दिँदा खेल मात्र होइन, उपाधि नै नेपालको हातबाट फुत्कियो । त्यसपछि अन्तिम दुई ओभरमा नेदरल्यान्ड्सले १२ बलमा १९ रन बनाउनुपर्ने थियो ।

१८औँ ओभरमा अभिनाशले २१ रन लुटाएपछि दर्शकहरू निराश भएर मैदानबाट फर्किन थालिसकेका थिए । तर, १९औँ ओभर बलिङ गरेका कुशल मल्लले फेरि दुई विकेट लिए । कुशलले पहिलो बलमै विकेट लिएपछि दर्शकमा केही आशा पलायो । तर, त्यतिबेलासम्म निकै ढिलो भइसकेको थियो । उनले यो ओभरमा दुई विकेट लिए पनि १२ रन दिए । अब नेपालले ६ बलमा ७ रन रक्षा गर्नुपर्ने चुनौतीपूर्ण अवस्था बन्यो ।

कप्तान रोहितले टिममेटहरूसँग लामो छलफलपछि बल करण केसीलाई दिए । करणले यसअघि नेदरल्यान्ड्ससँगको खेलमा १५ रन रक्षा गर्दै नेपाललाई महत्त्वपूर्ण जित दिलाएका थिए । त्यसैले पनि हुन सक्छ, फेरि करणबाट चमत्कारको आशा गरियो । तर, नेदरल्यान्ड्सका ब्याटरले पहिलो बलमा एक रन, दोस्रो बलमा चौका र तेस्रो बलमा छक्का प्रहार गर्दै उपाधि नेपालको हातबाट फुत्काए ।

याे सिरिज आगामी जूनमा अमेरिका र वेस्ट इन्डिजमा हुने टी– २० विश्वकपकाे तयारीका लागि थियाे । साे प्रतियाेगितामा नेपाल र नेदरल्यान्ड्स एउटै समूहमा छन्, जसले गर्दा याे सिरिजमा नेपालले नेदरल्यान्ड्सकाे कमजाेर र बलियाे पक्ष जाँच्ने माैका पाएकाे छ ।

प्रकाशित मिति: मंगलबार, फागुन २२, २०८० १६:१३