बालेनविरुद्ध कवाड व्यवसायीकाे आन्दाेलन किन ? (भिडियाे)

A+ A A-

'कानुनी शासन लागू गर, अनधिकृत ढंगले कवाड हटाउने कार्य बन्द गर' लेखिएका प्लेकार्ड बोकेर केही दिनयता कवाड व्यवसायीहरू आन्दोलनमा उत्रिएका छन् । महानगरपालिकाले आफ्नो क्षेत्रभित्र कवाड संकलन तथा भण्डारणमा रोक लगाउँदै पछिल्लो समय कवाड संकलन केन्द्रहहरूमा डोजर लागाइरहेको छ । त्यसकै विरोधमा कवाड संकलक तथा व्यवसायीहरू आन्दोलित बनेका हुन् ।

उनीहरूले कवाड संकलन तथा भण्डारणमा काठमाडौं महानगरपालिकाले लगाएको रोकविरुद्ध आइतबार पनि प्रदर्शन गरे । कवाड संकलक तथा व्यवसायीहरूले आइतबार काठमाडौंको सुन्धाराबाट निकालेको विरोध र्‍याली काठमाडौं महानगरपालिकाको मुख्य कार्यालय अर्थात् राष्ट्रिय सभागृहबाहिर पुगेर नाराबाजीमा परिणत भएको थियो ।

कवाड व्यवसायीहरूको स्क्राफ्ट हकहित फाउन्डेसनका अध्यक्ष सञ्जय साहले काठमाडौं महानगरपालिकाले अचानक डोजर चलाइदिएसँगै हजारौँ कवाड संकलक तथा व्यवसायीको बिचल्ली भएको बताए । बालेनले कानुन आफ्नो हातमा लिएर आफूहरूको रोजीरोटी नै खोसेका कारण बाध्य भएर सडक संघर्षमा उत्रिनुपरेको साहको भनाइ छ ।

कवाड व्यवसायीको तर्फबाट महानगरलाई ज्ञापनपत्र बुझाएको तर महानगरले बेवास्ता गरेको, मेयर बालेनले भेट्नै नचाहेको उनको गुनासो छ । स्वरोजगार संघकी अध्यक्ष माया गुरुङले भनिन्, 'महानगरका करिब ८५ प्रतिशत फुटपाथ व्यवसायी गरी खान नसक्ने गरी विस्थापित भइसकेका छन् । जसमध्य कति विदेशिए भने कति केही उपाय नभएपछि गाउँ फर्किन बाध्य भएका छन् । फुटपाथ व्यापारीहरूको संगठनको तथ्यांकअनुसार पनि बालेन नेतृत्वको दमनकै कारण महानगरभित्रका झण्डै १० हजार फुटपाथ व्यवसायी विस्थापित बनेका छन् ।'

अध्यक्ष गुरुङले थपिन्, 'बालेनले यतिखेर जसको रोजीरोटी खोसिरहेका छन्, हिजो तिनै भुईं मान्छेका एजेन्डालाई काँधमा बोकेर 'गरिबको चमेली बोल्दिने कोही छैन' भन्दै भोट मागेर मेयर बने । तर, आज तिनै गरिब, निमुखा भुईं मान्छेको पेटमा लात हानिरहेका सन्की बालेनको नगरमा उनीहरू असुरक्षित महसुस गरिरहेका छन् । अहंकारी बालेनको कदम देख्दा लाग्छ, काठमाडौं महानगरभित्र गरिब, निमुखा नागरिकलाई बाँच्ने कुनै अधिकार छैन ।'