पप्पुले रुपन्देहीका दुईवटा पुल पार्‍याे अलपत्र

A+ A A-

नेपालमा निर्माण क्षेत्रमा बदनामी कमाएको नाम हो, पप्पु कन्ट्रक्सन । देशभर ठेक्का लिने तर कुनै पनि आयोजना समयमा नसक्ने पप्पु कन्ट्रक्सनले रुपन्देहीमा पनि दुईवटा योजना अलपत्र पारेको छ ।

हुलाकी राजमार्गअन्तर्गत भैरहवा–लुम्बिनी सडक खण्डको तिनाउ र डण्डा नदीमा निर्माणाधीन पुल ५ वर्षमा समेत सम्पन्न हुन सकेको छैन । २०७१ सालमा निर्माणको ठेक्का पाएको पप्पु कन्ट्रक्सन र बामती निर्माण सेवाले ३ वर्षमा काम सक्ने गरी निर्माणको सम्झौता गरेका थिए । तर पछि १ वर्षमा सक्ने गरी म्याद थप समेत भयो । तर पनि पुलको अवस्था जस्ताको त्यस्तै छ । पुल निर्माण नहुँदा लुम्बिनीमा जाने पर्यटक र यात्रुहरूले सास्ती बेहोरेका छन् ।

‘बसमा यात्रा गर्ने त जेनतेन जान सक्छन्, तर पैदलयात्री र मोटरसाइकल भने हिँड्न गाह्रो छ,’ स्थानीय मंगल भण्डारीले भने– ‘आधा पुल निर्माण गरेर अलपत्र छाड्दासमेत सम्बन्धित निकायले केही गरेको छैन ।’ उनले लामो समयसम्म आधा मात्र पुल निर्माण गरेर काम रोकेको बताए ।

तिनाउ खोलामा पुल निर्माणका लागि ६ करोड २ लाखमा ठेक्का पाएको निर्माण कम्पनीले ४ पटकमा करिब ३ करोड रुपैयाँ भुक्तानी लिइसकेको छ । निर्माण कम्पनीले त्यसबाहेक डाइभर्सन बनाउनका लागि थप १ करोड १५ लाख रुपैयाँ मागेको छ । तर, आयोजनाले उक्त रकम नदिएको बहानामा काम रोकेको छ । हुलाकी राजमार्ग कार्यालय कपिलवस्तुले काम ठप्प पार्ने दुवै कम्पनीलाई सम्पर्कमा आउन ताकेता गरे पनि अटेर गरेको बताएको छ ।

आयोजना प्रमुख ईश्वरबहादुर रिजालले एक वर्षभित्र निर्माण कार्य सम्पन्न गर्ने प्रतिबद्धतासहित निर्माण कम्पनी आएमा २२ जेठ २०७७ सम्म हर्जना लगाएर वा नलगाएर निर्माणको म्याद थप गर्न सक्ने भए पनि निर्माण कम्पनी नै सम्पर्कमा नआएको जानकारी दिए ।

यता डण्डा खोलाको पुलका लागि ५ करोड ५६ लाख ८० हजार रुपैयाँमा ठेक्का पाएको सोही कम्पनीले ३ पटकमा आधा रकम लगिसकेको छ । रकम लिएर अन्यत्र लगानी गर्ने तर काम भने नगर्ने कम्पनीका सञ्चालकका कारण रुपन्देहीमा जस्तै अन्य धेरै स्थानमा निर्माण योजनाहरू अलपत्र अवस्थामा छन् । भ्रमण वर्ष २०२० सुरू हुनै लाग्दा पुल अलपत्र परेपछि प्रदेश सरकारले समेत यसमा चासो देखाएको छ ।

प्रदेश नं. ५ का उद्योग पर्यटन, वन तथा वातावरण मन्त्री लीला गिरीले भैरहवा–लुम्बिनी सडक खण्डमा सडक निर्माण भइरहेको बताउँदै पुल निर्माणको सन्दर्भमा कन्ट्रक्सनलाई कारबाही गर्न संघीय सरकारलाई अनुरोध गरेको बताए ।

निलम्बित सांसद हरिनारायण रौनियारको पप्पु कन्ट्रक्सनले निर्माणको जिम्मा पाएका नेपालका सबै आयोजनाको हालत यस्तै छ ।

प्रकाशित मिति: बिहीबार, असोज ३०, २०७६ १९:३५