चुनावअघि नै पाएको भनिएको राष्ट्रियसभा अध्यक्षका लागि माओवादी फकाउँदै कांग्रेस

चुनावअघि नै पाएको भनिएको राष्ट्रियसभा अध्यक्षका लागि माओवादी फकाउँदै कांग्रेस

A+ A A-

शनिबार राष्ट्रियसभाको अध्यक्षका बारेमा जिज्ञासा राख्दा कांग्रेस नेता कृष्णप्रसाद सिटौला बोल्न चाहेनन् । ‘यसबारे अहिले नबोलौँ’ भन्दै उनी पन्छिए । आइतबार सिंहदरबारमा कांग्रेसका बहालवाला र नवनिर्वाचित राष्ट्रियसभा सदस्यबीच परिचयात्मक भेटघाट तथा अन्तर्क्रियामा सिटौलाले राष्ट्रियसभाको गरिमालाई उच्च राख्ने, कानुन निर्माणमा सक्रियताका साथै जनताका माग र अपेक्षा सम्बोधन हुने गरी काम गर्ने बताए । उनले संविधानको लक्ष्यअनुसार जनताको हित र समुन्नत राष्ट्र निर्माण गर्नुपर्ने धारणा राखे ।

गठबन्धनमा देखिएका अविश्वास र माओवादीले पनि राष्ट्रियसभा अध्यक्षमा दाबी गरेपछि सिटौला खुलेर बोल्न चाहेका छैनन् । उनले गठबन्धनको निर्णय नै मान्ने बताउँदै आएका छन् । राष्ट्रियसभाको नेतृत्व गर्दिनुस्, चुनाव लड्नुस् भनेपछि चुनावमा गएको बताउने सिटौला गठबन्धनबाट अर्को नाममा सहमति भएमा बाधक नबन्ने बताउँछन् ।

तर उनी आफू अध्यक्ष बन्नेमा ढुक्क छन् । किनकि कांग्रेस अहिले राष्ट्रियसभा अध्यक्ष छाड्ने पक्षमा छैन । टिकट दिनुअगावै उनलाई अध्यक्षको तोक लगाएर टिकट दिइएको कांग्रेसमा चर्चा छ । पार्टीले दिएको वचन पूरा गर्नेमा ढुक्क छन् । त्यसैले बाहिर टिप्पणी गरेर वातावरण बिगार्न सिटौला चाहँदैनन् । बोलिहाले पनि मध्यमार्गी कुरा गरेर टार्छन् ।

२०७९ सालको प्रतिनिधिसभाको चुनाव हारेका सिटौलालाई कांग्रेसले पार्टीभित्र अपवाद मानेर टिकट दिएको थियो । सिटौलालाई राष्ट्रियसभा अध्यक्ष मानेर पार्टीले टिकट दिएको कांग्रेस महामन्त्री गगन थापा बताउँछन् । उनका अनुसार सिटौलालाई राष्ट्रियसभा अध्यक्ष बनाउने विषय टिकट बाँडफाँटको समयमै गठबन्धनको बैठकमा टुङ्गिएको हो । ‘गठबन्धनको बैठकमा म पनि छु । त्यही बेला टुंगिएको विषय हो,’ उनले शिलापत्रसँग भने ।

उम्मेदवार चयन गर्दा नेपाली कांग्रेसको संस्थापनइतर समूह पटकपटक अवसर पाएका र प्रतिनिधिसभा हारेका व्यक्तिलाई राष्ट्रियसभाको उम्मेदवार नबनाउन सामूहिक निर्णय नै गरेर सभापति शेरबहादुर देउवालाई समेत दबाब दिएको थियो । ‘अध्यक्ष बन्ने भएपछि नै उहाँ (सिटौला) चुनाव लड्न जानुभएको हो । नत्र हामी प्रतिनिधिसभा हारेको मान्छेलाई राष्ट्रियसभामा लड्न किन पटाउँथ्यौँ ? पार्टीले अपवाद मानेर टिकट दिएकै अध्यक्ष बन्ने भएर हो,’ महामन्त्री थापाले भने ।

माओवादीले राष्ट्रियसभामा सबैभन्दा ठूलो दल भएको र संवैधानिक परिषद्‌मा प्रधानमन्त्री हटेसँगै प्रतिनिधित्वबिहीन हुने भएकाले राष्ट्रियसभा अध्यक्ष पाउनुपर्ने दाबी गरिरहेको छ । अहिले संवैधानिक परिषद्‌मा कांग्रेसको प्रतिनिधित्व नरहेको भनी कांग्रेस नेताहरूले जवाफ फर्काइरहेका छन् ।

अहिले कांग्रेसका सांसद तथा नेताहरू सरकारसँग सन्तुष्ट छैनन् । अझै महासमिति बैठकमा गठबन्धनको विषय पेचिलो रूपमा उठेको थियो । कांग्रेसको महासमिति बेठकबाट पारित गरेको प्रतिवेदनमा चुनाव अघि गठबन्धन नगर्ने विषय उल्लेख छ । यसले पनि सत्ता सहकार्यमा माओवादी कांग्रेससँग सशंकित छ । उसले कांग्रेसको महासमिति बैठकलाई नजिकबाट नियालिरहेको प्रतिक्रिया दिएको थियो ।

माओवादीका कोशी प्रदेश अध्यक्ष हर्कबहादुर नेम्वाङ (मेक्सो) ले १५ वैशाख २०८१ मा हुने इलाम २ को उपचुनावमा कांग्रेससँग सहकार्य नहुने बताइसकेका छन् । यसबारे माओवादीले केन्द्रबाट निर्णय गरेको छैन ।

आइतबार संसदमा कांग्रेस सांसद सञ्जय गौतमले ‘कति कराउने सरकार सुन्दैन भन्दै’ सरकारमाथि आक्रोश पोखेका थिए । ‘जताततै निराशा छ । बोलौँ, के बोलौँ ? नबोलौँ, के नबोलौँ ? जहाजै डुब्न लागिसक्यो । बोल्दा सुन्दै सुन्दैन । कति बोल्ने ? कसैले सुन्दैन,’ उनले भनेका थिए ।

यसरी कांग्रेसका सांसदहरू सरकारसँग असन्तुष्ट र माओवादी नेताहरू कांग्रेसँग असन्तुष्ट हुँदा राष्ट्रियसभा अध्यक्षमा कसरी कुरा मिल्छ भन्ने प्रश्न उब्जिएकाे छ । माओवादी नेताहरू राष्ट्रियसभा अध्यक्ष आफ्नो पार्टीले राख्नुपर्ने बताउँछन् । ‘राष्ट्रियसभाको सबभन्दा ठूलो दल हाम्रा हो । उसले दाबी नगरे कसले गर्छ ? संस्थागत रूपमा कसैको पनि सहमति भएको छैन । संस्थागत सहमति भएको छैन’, माओवादी उपमहासचिव जनार्दन शर्माले भने, ‘ठूलो दलले दाबी नगरे कसले गर्ने ? भोलि सरकारको आलोपालो होला । त्यति बेला हामी त संसदमा पनि हुँदैनौँ । सरकारमा पनि हुँदैनौँ । सबैतिर शून्य हुन्छ । त्यो हाम्रै हुन्छ ।’

यस्तोमा कांग्रेसले माओवादी र गठबन्धनका अन्य दललाई फकाइरहेको छ । ‘कांग्रेसले माओवादी र गठबन्धनका अन्य दलहरूलाई फकाइ, सम्झाइ, बुझाइ गरेर सहमतिमा ल्याउनुबाहेक अर्को विकल्प छैन । हाम्रा कारणले गठबन्धनमा टुटफुट आउन दिने छैनौँ,’ कांग्रेस प्रचार विभाग प्रमुख मीन विश्वकर्माले शिलापत्रसँग भने ।

राष्ट्रियसभा अध्यक्ष कांग्रेसलाई दिन तयार भए पनि कोशीमा माओवादी उम्मेदवार पराजित भएपछि माहौल बिग्रिएको बुझाइ कांग्रेस नेताहरूको छ । ‘कोशीको चुनावी परिणामका कारण उहाँहरूको चित्त दुखेको छ । त्यसमा मल्हम लगाउने काम कांग्रेसले गर्नुपर्छ । त्यसको क्षतिपूर्ति आगामी दिनमा कहाँकहाँ तिर्ने हो, छलफल गरेर पहिलो जे विषयमा टुंगिएको हो त्यसमा टुंग्याउनु उपयुक्त हुन्छ,’ विश्वकर्माले भने । कांग्रेसबाट गल्ती हुँदा माओवादी उम्मेदवार पराजित भएको उनले बताए ।

नेपालीहरूको संस्कार टाढा रहेको मान्छेको माया लाग्ने र नजिक हुनेको वास्ता नहुने भएकाले कांग्रेस र माओवादीका नेताहरूबीच खटपटजस्तो सम्बन्ध देखिएको उनले बताए । ‘हिजो एमाले र माओवादीसँगै हुँदा झगडा गरेर हामीसँग मिल्न आउनुभयो । अहिले हामीसँग हुनुहुन्छ, अलि परको माया लाग्न नि सक्छ,’ विश्वकर्माले भने । शीर्ष तहमा राष्ट्रियसभा अध्यक्षबारे कुनै गलत बुझाइ नरहेको र दोस्रो तहमा फरक मत देखिनु स्वाभाविक रहेको कांग्रेस महामन्त्री थापा बताउँछन् ।

कांग्रेस नेता विमलेन्द्र निधि कांग्रेसले राष्ट्रियसभा अध्यक्षमा कांग्रेसले भनेभन्दा दायाँबायाँ नहुने बताउँछन् । ‘गठबन्धनमा केही खटपट हुँदैन । कांग्रेसले जे भन्यो त्यही हुन्छ,’ उनले शिलापत्रसँग भने ।

प्रकाशित मिति: सोमबार, फागुन १४, २०८० १९:२५