रामहरिलाई सुदन किराँतीको चुनौती– १८ करोड कमिसनको सूचना सार्वजनिक गर्नुस्, सजाय भोग्छु (भिडियो)

रामहरिलाई सुदन किराँतीको चुनौती– १८ करोड कमिसनको सूचना सार्वजनिक गर्नुस्, सजाय भोग्छु (भिडियो)

A+ A A-

संस्कृति, पर्यटन तथा नागरिक उड्डयनमन्त्री सुदन किराँतीले संसदको राज्य व्यवस्था तथा सुशासन समिति सभापति रामहरि खतिवडाले ‘पदीय गरिमा र जिम्मेवारीविपरीत’ अभिव्यक्ति दिएको भन्दै कडा शब्दमा आलोचना गरेका छन् ।

उनले ‘थ्री हन्ड्रेड जी’ (३०० जी) जहाज खरिद प्रक्रियाका क्रममा १८ करोड कमिसन खान लागेको भन्ने सूचना सार्वजनिक गर्न खतिवडालाई चुनौती नै दिए । सूचना सार्वजनिक गरेको खण्डमा जस्तोसुकै (फाँसी) सजाय भोग्न तयार रहेको पनि उनले बताए ।

‘उहाँले आफ्नो पदको गरिमा र जिम्मेवारीभन्दा बाहिर गएर बोल्नुभयोजस्तो लाग्छ । सुशासन कायम गराउने सार्वभौम समिति भएको हुनाले हामीलाई बोलाएर उहाँले सोध्न पनि सक्नुहुन्थ्यो,’ सोमबार शिलापत्रसँगको संक्षिप्त कुराकानीमा उनले भने, ‘र, म उहाँलाई त्यो १८ करोड हुन लागेको भ्रष्टाचारको मसँग प्रमाण छ भन्नुभयो । त्यो प्रमाण पेस गर्न चुनौती दिन चाहन्छु । जस्तोसुकै सजाय भोग्न तयार छु ।’

उनले जहाज खरिद प्रक्रियामा रहँदा १८ करोड कमिसन खान लागेको भन्ने खतिवडाको आरोपलाई खारेज गरिदिएका छन् । एक पैसासमेत तलमाथि नगरी जहाज गरिद गरिने उनले दोहोर्‍याए । ‘मैले सुरुदेखि नै भनेको छु कि मलाई एक पैसा चाहिँदैन र कोही कमिसनको चक्करमा फस्छ भने त्यसलाई पनि छोडिँदैन,’ उनले खतिवडाप्रति आक्रोशित हुँदै भने, ‘म संलग्न भएको सूचना मात्रै सार्वजनिक गरे भने त फाँसीको पनि सामना गर्न तयार छु ।’

देशभरका २२ वटा विमानस्थल सञ्चालनमा नरहेको, सुत्केरी वृद्धवृद्धा, बिरामी र विद्यार्थीहरू पनि जहाज चढ्न नपाएको उल्लेख गरे । निजी विमान सञ्चालकहरूको मनोमानीपूूर्ण भाडा रहेको र त्यसलाई हस्तक्षेप गर्न पनि सरकारले तीनवटा जहाज खरिद गर्न लागेको जानकारी दिए ।

उनका अनुसार जहाज खरिद प्रक्रिया अन्तिम चरणमा पुगेको छ । तर, एक थरी लोभीपापी मानिसहरूले खरिद गर्न दिनै नचाहेको आरोप लगाए । त्यहीभित्र संसदको राज्य व्यवस्था तथा सुशासन समितिका सभापति खतिवडा पनि पर्ने उनको भनाइ छ ।

‘हात धुँदै गरेको साथीको घडी हरायो । पुलिसमा रिपोर्ट पर्‍यो । सीसीटीभी फुटेज हेर्दाखेरी हिजो बोल्ने माननीय (खतिवडा) देखिनुभयो । र, पुलिसले फोन गर्दा उहाँचाहिँ ओखलढुंगा पुग्नुभएको रहेछ र घडी मेरो गोजीमा रहेछ भनेर बुझाउन आउनुभयो,’ उनले खतिवडाले चोरी गरेको भनिएको घडीको प्रसङ्ग कोट्याउँदै भने ।

बलबहादुर राई मन्त्री हुँदा स्वकीय सचिवका रूपमा खतिवडाले भूमिका पाएको र त्यही बेला मन्त्री राईको किर्ते हस्ताक्षर गरेपछि प्रहरीले पक्राउ गरेको पनि जिकिर गरे । आइतबार संसद बैठकमा सभापति खतिवडाले मन्त्री किराँतीको चर्को आलोचना गर्दै उनी १८ करोड कमिसनको चक्करमा फसेको आरोप लगाएका थिए । त्यससम्बन्धी सूचना नै आफूसँग रहेको खतिवडाले बताएका थिए ।

‘थ्री हन्ड्रेड जी भन्ने प्लेन ल्याइँदै छ । जुन अहिले प्रोडक्सनमा छैन, सभामुख महोदय । देशमा ल्याएर झण्डै १८ करोड कमिसन खाने खेल भएको सूचना प्राप्त भएको छ,’ खतिवडाको भनाइ थियो । प्रत्युत्तरमा मन्त्री किराँतीले सूचना सार्वजनिक गर्न चुनौती मात्रै दिएनन्, उल्टै घडी चोरिएको र हस्ताक्षर किर्ते गरेको आरोप लगाए ।

प्रकाशित मिति: सोमबार, फागुन १४, २०८० १८:२३