गाजाको दर्दनाक अवस्था झल्काउने घटना, भोककै कारण दुईमहिने शिशुले ज्यान गुमाए (भिडियो)

गाजाको दर्दनाक अवस्था झल्काउने घटना, भोककै कारण दुईमहिने शिशुले ज्यान गुमाए (भिडियो)

A+ A A-

गतवर्षको अक्टोबर ७ यता जारी हमास र इजरायलबीचको युद्धमा हजारौँ मानिसले ज्यान गुमाएका छन् भने हजारौँ भवनहरू ध्वस्त बनेका छन् ।

इजरायली व्यापक हवाई तथा थल आक्रमणमा गाजास्ट्रिपमा हालसम्म २९ हजार ६०६ प्यालेस्टाइनीले ज्यान गुमाइसकेका छन् । मारिनेमा १२ हजार ६६० बालबालिका र ८ हजार ५७० महिला पनि छन् । इजरायलतर्फ भने १२ सयले ज्यान गुमाएका छन् ।

निर्दोष मानिसहरूले इजरायली आक्रमणमा ज्यान गुमाइरहँदा संयुक्त राष्ट्र संघमा दुईपटक युद्धविरामको आह्वान नभएको पनि होइन । तर, दुवैपटक अमेरिकाले युद्धविरामको प्रस्तावलाई भिटो शक्ति प्रयोग गर्दै खारेज गरेको अवस्था छ ।

राष्ट्र संघले इजरायली घेराबन्दीले बालबालिकाको मृत्युको संख्या विस्फोटक रूपमा बढ्ने चेतावनीसमेत दिएको छ, किनभने इजरायली आक्रमण जारी रहँदा गाजामा खाद्यान्न र उपचारको अभाव छ । यसबीचमा गत शुक्रबार मात्र गाजामा दुईमहिने एक शिशुको भोककै कारण मृत्यु भएको अल जजिराले जनाएको छ ।

ती मृत शिशुको नाम महमुद फत्तौह हो । शुक्रबार गाजा शहरको अल–शिफा अस्पतालमा उनको भोककै कारण कुपोषण भएर मृत्यु भएको अस्पतालले जनाएको छ । अस्पतालका अनुसार एक महिला आफ्नो बच्चा बोकेर मद्दतका लागि अस्पताल चिच्याउँदै पुगेकी थिइन् । अस्पताल पुर्‍याउँदा बच्चाको शरीर पहेँलो भइसकेको थियो । भोककै कारण ती बच्चाले ज्यान गुमाएको एक डाक्टरले बताए ।

इजरायली बमबारी जारी रहँदा ती बच्चाले लामो समयदेखि आमाको दूध खान नपाएको चिकित्सकहरू बताउँछन् । आमाले नै लामो समययता खाना खान नपाउँदा बच्चामा कुपोषण भएको हो । यो घटनाले गाजाको दर्दनाक अवस्थालाई झल्काउँछ । राष्ट्र संघका अनुसार यतिबेला गाजामा खाद्यान्नको अभाव छ भने त्यहाँका अस्पतालहरू पनि घाइते र बिरामीको उपचार गर्न असमर्थ छन् किनभने अस्पतालहरू पनि बमबारीबाट भत्किएका छन् ।

राष्ट्र संघका अनुसार गाजाका करिब २३ लाख मानिस अहिले भोकमरीको चपेटामा छन् । इजरायलले युद्धको प्रारम्भबाटै गाजालाई घेराबन्दी गर्दै खाद्यान्न, पानी र इन्धनको सबै आपूर्तिहरू बन्द गरिदिएको छ । हाल अन्तर्राष्ट्रिय दबाबका बीच मानवीय सहायताका लागि एउटा मात्र प्रवेश बिन्दु खोलिएको छ जहाँबाट मानवीय सहायताको काम भइरहको छ ।

सहायता एजेन्सीहरूका अनुसार इजरायली सेनाहरूको कडा चेकजाँचका कारण खाद्यान्नका ट्रकहरूको प्रवेशमा बाधा पुगेको छ ।