विवाहोत्तर सम्बन्धले निम्त्याउँदै हत्या, पारिवारिक सुरक्षामा थपियाे चुनौती

विवाहोत्तर सम्बन्धले निम्त्याउँदै हत्या, पारिवारिक सुरक्षामा थपियाे चुनौती

A+ A A-

विवाहोत्तर सम्बन्धले हत्याजस्तो गम्भीर प्रकृतिको फौजदारी अपराध बढाएको छ । पछिल्ला महिनामा त्यस्तो सम्बन्धले भएका हत्याका घटनाको ग्राफ पनि उच्च देखिएको छ । जसले पारिवारिक सुरक्षामा समेत चुनौती थपिदिएको छ ।

बुधबार मात्रै काठमाडौंको सीतापाइलास्थित भैरव टोलमा श्रीमतीसहित तीन जनाको हत्यापछि श्रीमान्‌ले आत्महत्या गरे । घटनाको अनुसन्धानमा संलग्न प्रहरी अधिकारीहरूले उक्त घटनाको कारण विवाहोत्तर सम्बन्ध रहेको प्रारम्भिक निष्कर्ष निकालेका छन् ।

घटनामा ३८ वर्षीया श्रीमती ईश्वरी भनिने प्रेमकुमारी श्रेष्ठ, ८ वर्षीया छोरी अनिशा र २८ महिने नातिनी शिवानी श्रेष्ठ मारिएका थिए । हत्यामा संलग्न भनिएका काजी भनिने राजु विश्वकर्मा आत्महत्या गरेको अवस्थामा फेला परे । अर्थात् विवाहोत्तर सम्बन्धको आशंकाले एकै परिवारका चार सदस्य मारिए ।

काठमाडौं प्रहरी परिसरका प्रमुख (एसएसपी) भूपेन्द्र खत्रीका अनुसार नाबालक छोरा अनिशको मोबाइलमा राजुले खिचाएको भिडियो सन्देशले श्रीमती ईश्वरीको विवाहोत्तर सम्बन्ध नै घटनाको कारक रहेको खुलाउँछ ।

भिडियोमा हत्या आरोपी राजुले भनेका छन्, ‘...मैले बाँचेर गरी खाने ठाउँ भएन । आज पो राम्रो होला कि, भोलि पो राम्रो होला कि भनेर हेरेँ । कहिल्यै पनि राम्रो भएन । त्यही भएर मैले यस्तो निर्णय गरेको छु । तिमीहरू मिलेर गरि खानू । मिलेर बस्नू । ममीजस्तो भएर नहिँड्नू । त्यही हो मेरो भनाइ । माफ गरिदे मलाई ।’

स्थानीय एक अर्धबैँसे पुरुषसँग ईश्वरी सम्बन्धमा रहेको र अन्ततः ईश्वरीले राजुको दबाबमा ती पुरुषविरुद्ध बलात्कारसम्बन्धी मुद्दा दायर गरेकी थिइन् । तर, ५ लाख धरौटीमा गत साता ती पुरुष छुटेको र ईश्वरीले भेट्ने क्रम जारी राखेपछि राजु क्रुद्ध बनेका थिए । चितवनका अर्का एक जना पुरुषसँग पनि ईश्वरी सम्बन्धमा रहेको बताइएको छ । परिणामतः बुधबार श्रीमतीसहित तीन जनाको हत्या गरेर आत्महत्या गरेको निष्कर्ष प्रहरीको छ ।

यसअघि २७ माघमा काठमाडौंकै गौशालाको एक होटलमा महिला मृत फेला परेकी थिइन् । घटनाको अनुसन्धान गर्दै जाँदा प्रहरीले मृत महिला रामेछापको लिखु– ६ की २८ वर्षीया प्रमिला दमाईं रहेको पत्ता लगायो । विवाहिता उनी दोलखाको बैतेश्वर– ७ का कुमार श्रेष्ठ (विवाहिता)सँग विवाहोत्तर सम्बन्धमा रहेको प्रहरीले अनुसन्धानपछि पत्ता लगायो र घटनाको कारण विवाहोत्तर सम्बन्धमा खटपट रहेको निष्कर्ष निकाल्यो ।

गत ७ माघमा काठमाडौंको स्वयम्भुस्थित शोभा भगवतीमा रहेको एक घरमा ५१ वर्षीया सफिना मियाँको शरीर आधा गलेको अवस्थामा फेला पर्‍यो । घटना तीन महिना पहिलेको भएको प्रहरीले निष्कर्ष निकाल्यो । टाउकोमा गम्भीर चोट लागेको देखिएकी सफिनाको हत्या आरोपमा प्रहरीले प्रेमी भारतको विहारका इकरामुल हक अन्सारीलाई पक्राउ गर्‍यो । अनुसन्धानका क्रममा विवाहोत्तर सम्बन्धमा उनी सफिनासँग रहेको र सम्बन्धमा खटपट भएपछि हत्या गरेको बयान दिएको प्रहरीले जनायो ।

मृतक मियाँ तनहुँको भीमदत्त नगरपालिका– १ की रहेको खुलेको छ । अन्सारीसँग प्रेममा परेर लिभिङ टुगेदरमा रहेको बेला घटना भएको हो ।

गत २६ पुसमा पाँचथरको आरुबोटेमा माइतीघरमै गोमा फियाकको हत्या भयो । हत्या आरोपमा प्रहरीले पति नरध्वज कुरुम्बाङलाई पक्राउ गर्‍यो । प्रहरीले घटनाको अनुसन्धान सकेको छ र अनुसन्धान प्रतिवेदनका आधारमा सरकारी वकिलको कार्यालयले जिल्ला अदालतमा कर्तव्य ज्यानसम्बन्धी मुद्दा दायर गरिसकेको छ । बयानका क्रममा नरध्वजले श्रीमती गोमाको मोबाइलमा केटा मान्छेको फोन जहिल्यै आउने गरेको र घर नै छाडेर एक महिना ती केटासँग हराएको भनेका छन् । प्रहरीले यो घटनाको कारण पनि विवाहोत्तर सम्बन्धलाई मानेको छ ।

नेपाल प्रहरीका केन्द्रीय प्रवक्ता भीमप्रसाद ढकालले पछिल्ला दिनमा विवाहोत्तर सम्बन्धले हत्याका घटना निम्त्याएको बताएका छन् । उनले त्यस्ता हत्याका घटना ‘आवेशप्रेरित र योजनाबद्ध’ दुवै देखिएको शिलापत्रलाई बताए ।

उनका अनुसार सीतापाइलाको घटना पनि योजनाबद्ध भएको देखिन्छ । घटनामा आरोपी राजुले मंगलबार राति नै हम्मर र कैँची लगेर राखेको र बुधबार बिहानै श्रीमतीसहित तीन जनाको हत्या गर्नुले घटना योजनाबद्ध देखिएको ढकालले बताए ।

प्रहरीको तथ्यांकअनुसार नेपालमा हरेक दिन कम्तीमा दुई जनाको हत्या हुन्छ । पछिल्लो साढे सात वर्षमा ४ हजार ३ सय ७० जनाको हत्या भएको तथ्याङ्कका आधारमा दिनहुँ दुई जनाको हत्या हुने गरेको देखिएको हो ।

मारिनेमा पुरुष धेरै छन् । साढे सात वर्षमा २ हजार ४ सय २९ जना पुरुष र १ हजार ४ सय ८१ जना महिलाको हत्या भएको छ । ३ सय ५ बालक र १ सय ५५ बालिकाको पनि हत्या भएको छ । यसमध्ये केही पुरुष र महिलाको विवाहोत्तर सम्बन्धले गर्दा त्यस्तो घटना भएको प्रहरीले जनाएको छ ।

प्रकाशित मिति: बिहीबार, फागुन १०, २०८० १४:००