महासमिति बैठकमा गठबन्धन र हिन्दु राष्ट्रबारे कांग्रेसीहरू आमनेसामने

A+ A A-

नेपाली कांग्रेसको महासमिति बैठक ललितपुरको गोदावरीमा जारी छ । बुधबार महासमितिमा पेस भएको प्रतिवेदनमाथि समूहगत छलफल भइरहेको छ । महासमिति बैठक उद्घाटन भइसक्दा पनि टुंगो नलागेको विषय थियो– कांग्रेसका कार्यकर्ताले रूखबाहेक अन्यन्त्र भोट हाल्न नपर्ने अवस्था बनाउने । महामन्त्री गगन थापाले सांगठनिक प्रतिवेदनमा चुनावअघि गठबन्धन नगर्ने विषय समावेश गरेका थिए ।

सात प्रदेश र संघसंस्था गरी आठ समूहको चारवटा हलमा प्रतिवेदनमाथि छलफल चलिरहँदा सबै महासमिति सदस्यले गठबन्धनको विषय छुटाएका छैनन् । गठबन्धनबारे मिश्रित प्रतिक्रिया आइरहेको छ ।

बन्दसत्रमा बोल्ने अधिकांश महासमिति सदस्यले विधान, नीतिभन्दा समसामयिक विषयमा समय खर्च गरिरहेका छन् । पाएको ४–५ मिनेटको समयमा एउटा मात्र मुद्दामा बोल्नमा समय खर्च गरेका छन् ।

गठबन्धनबारे समानान्तरविपरीत धारणा

छलफलमा सहभागी सप्तरीका सकलदेव सुचिहारलले सिद्धान्त नमिल्नेसँग गठबन्धन गर्न नहुने बताए । ‘१७ हजार मान्छे मारेको पार्टीसँग कुनै सिद्धान्त मिल्दैन । यस्तो गठबन्धन गर्नु हुँदैन । कांग्रेस कार्यकर्तालाई कहिले छातामा, कहिले हँसिया हतौडामा भोट हाल्न भनिएको छ । यस्तो कार्य कहिल्यै स्वीकार्य हुँदैन,’ उनले बैठकमा भने । माओवादी सशस्त्र द्वन्द्वमा रहँदा १७ हजार व्यक्ति मारिएका थिए ।

उता, पर्सा जिल्ला सभापति जनार्दन सिंह क्षेत्रीले गठबन्धन नगरेर २०७४ सालमा पार्टी कमजोर बनेको बताए । ‘गठबन्धनबारे बोल्न आवश्यक छैन । २०७४ मा गठबन्धन नगर्दा पार्टीको कुन हालत थियो ?,’ उनले प्रश्न गरे ।

धनुषा जिल्ला सभापति योगेन्द्र पञ्जियारले गठबन्धन गर्नै नहुने बताए । ‘गठबन्धन गर्नै हुँदैन । यसले मधेशमा कांग्रेस कमजोर भएको छ,’ उनले भने ।

त्यस्तै, सुर्खेत जिल्लाका कार्यवाहक सभापति टोपबहादुर रावतले संविधान रक्षा गर्न बनाइएको गठबन्धनले कांग्रेस बलियो बनेको बताए । ‘कांग्रेसको नीति सहकार्यको हो । गठबन्धन के गर्ने भनेर नीति बनाएर अघि बढ्ने होइन,’ उनले भने, ‘चुनौती समाधान गर्न बनाइएको गठबन्धन हो । संविधानको रक्षा गर्न कर्णालीबाट सुरु भएको गठबन्धनले कांग्रेस बलियो भएको छ ।’

गठबन्धन रणनीतिक कुरा भएकाले अहिल्यै निर्णय लिन आवश्यक नरहेको तर्क पनि उत्तिकै उठेको छ । ‘गठबन्धन राणनीतिक कुरा हो । अहिले निर्णय गर्न आवश्यक छैन । गठबन्धन राजनीतिक स्थायित्वका लागि गरिएको हो,’ रौतहट जिल्ला सभापति सुनीलकुमार यादवले भने ।

धनुषाबाट महाधिवेशन प्रतिनिधि बनेका प्रदीप यादवले गठबन्धन गर्ने नगर्ने चुनावको बेलामा तय गर्नुपर्ने बताए । ‘गठबन्धन नीति होइन, रणनीति हो । चुनावको बेलामा तय गर्नुपर्छ, अहिले होइन,’ उनले भने ।

हिन्दु राष्ट्रबारे प्रस्ट होस्

जुम्ला जिल्लाका सभापति कर्णबहादुर शाही हिन्दु राष्ट्रका बारेमा पार्टीले अब उठान गर्ने कि नगर्ने, त्यसबारे निर्णय लिनुपर्ने बताए । ‘हिन्दु राष्ट्रको मुद्दा उठाउने हो कि अब नउठाउने हो भन्ने निर्णय गरोस् । कुनै न कुनै बेलामा हिन्दु राष्ट्रको एजेन्डा उठाउनुपर्छ,’ उनले बन्दसत्रमा भने ।

गठबन्धन के गर्ने भनेजस्तै हिन्दु राष्ट्रबारे पनि महासमितिमा वक्ताहरू विभाजित छन् । वक्ताहरूमध्ये आदिवासी जनजाति समुदायबाट प्रतिनिधित्व गर्ने प्रतिनिधिहरूले ‘हिन्दु राज्यको कुरा गरेर देश टुक्र्याउन खोजेको हो’ भन्दै आपत्ति जनाएका छन् । ‘पूर्व र पश्चिमलाई एकै ठाउँमा जोड्ने कांग्रेस अभिभावक र ऐतिहासिक पार्टी भएकाले पार्टीलाई धर्मसँग जोड्ने कुरा उठाउनु कुन तहको विज्ञता हो ?,’ ताप्लेजुङ जिल्ला सभापति गजेन्द्र तुम्वायकले प्रश्न गरे ।

संविधानसभा सदस्यसमेत रहेकी उषा गुरुङले नेपाल एकल धर्म र जातको देश हुन नसक्ने भन्दै संविधानको विरोधमा बोल्ने अधिकार कसले दियो भन्दै प्रश्न गरिन् । भोजपुर जिल्ला सभापति विनोद बान्तवाले हिन्दु राज्यको पक्षमा हस्ताक्षर नगरेको बताए ।

महासमिति बैठकको मूल गेटअगाडि हिन्दु राष्ट्रको माग गर्दै हस्ताक्षर अभियान चलिरहेको छ । ‘त्यहाँ एउटा झुण्ड रहेछ, मलाई सही गर भन्यो । मैले भने– संविधान भत्काउने काम नगर्नुस् । हाम्रा नेताहरूले कान नसुन्ने, आँखा नदेख्ने हो ? कहिले गम्भीर रूपमा सोच्ने, मुलुक अधोगतिमा जान्छ,’ बन्दसत्रमा उनले भने ।

एउटा झुण्डले भन्दैमा हिन्दु राज्य बनाउन नहुने उनले बताए । ‘एउटा झुण्डले भन्दैमा हिन्दु राज्य बनाउने कुरा सह्य हुँदैन,’ बान्तवाले भने ।

प्रकाशित मिति: बुधबार, फागुन ९, २०८० १८:५८