अमेरिकी दाबी अस्वीकार गर्दै रुसले भन्यो– अन्तरिक्षमा आणविक हतियार राख्ने मनसाय छैन

अमेरिकी दाबी अस्वीकार गर्दै रुसले भन्यो– अन्तरिक्षमा आणविक हतियार राख्ने मनसाय छैन

A+ A A-

गत हप्ता मात्र अमेरिकाले रुसले भूउपग्रहरू नष्ट गर्नसक्ने हतियार अन्तरिक्षमा तैनाथ गर्नसक्ने भन्दै चिन्ता व्यक्त गरेको थियो । अन्तरिक्षमा तैनाथ गर्नका लागि रुसले भूउपग्रहविरुद्धका हतियार विकास गरिरहेको अमेरिकी दाबी थियो ।

रुसले भने अमेरिकी दाबीको खण्डन गरेको छ । राष्ट्रपति भ्लादिमिर पुटिनले मस्कोको अन्तरिक्षमा आणविक हतियार तैनाथ गर्ने कुनै मनसाय नभएको प्रतिक्रिया जनाएका छन् । तर उनले आफ्नो देशले अमेरिकाले जस्तै अन्तरिक्ष क्षमता विकास गरेको भने बताए ।

गत हप्ता अमेरिकाले रुसले एन्टी स्याटेलाइट हतियार क्षमता विकास गरिरहेको बताएको थियो । पुटिनको पछिल्लो कथनले रुससँग त्यस्तो हतियार भएको अनुमान त लगाउन सकिन्छ तर ती हतियारहरू अहिलेसम्म अन्तरिक्षमा तैनाथ गरिएका प्रमाण भने छैनन् ।

ह्वाइट हाउसका राष्ट्रिय सुरक्षा प्रवक्ता जोन किर्बीका अनुसार रुसले विकास गरिरहेको हतियारले अन्तरिक्ष सन्धिको उल्लङ्घन गर्नेछ । तर रुसी हतियार आणविक क्षमताको छ कि छैन उनले खुलाएका छैनन् ।

रुससहित १३० भन्दा बढी देशहरूले हस्ताक्षर गरेको सन्धिले अन्तरिक्षमा आणविक हतियार वा अन्य कुनै पनि विनाशकारी हतियारहरू तैनाथ गर्न निषेध गर्दछ ।

अमेरिकी आरोपछि पुटिनले भनेका छन्, ‘हाम्रो अडान एकदम स्पष्ट र पारदर्शी छ । हामी सधैं अन्तरिक्षमा आणविक हतियारको तैनाथीको स्पष्ट विरोधी हौं ।’ पुटिनले अमेरिकालाई इंगित गर्दै थप भनेका छन्, ‘हामी सबैलाई सम्झौताहरू पालना गर्न आग्रह पनि गर्दैछौं ।’

यसबीचमा रुसी रक्षामन्त्री सर्गेई सोइगुले अमेरिकी सरकारले लगाएको आरोप युक्रेनलाई हतियार सहयोगमा सहजीकरणको प्रयास भएको बताएका छन् । वास्तवमा यतिबेला अमेरिकी कंग्रेसले युक्रेनलाई ६० अर्ब डलरको सहयोग दिन आनाकानी गरिरहेको छ । अमेरिकी सभामुखले युक्रेनलाई हतियार दिनेभन्दा पनि मेक्सिकोसँगको सीमा सुरक्षामा ध्यान दिनुपर्ने बताएका छन् ।

रुसविरुद्ध यस्ता आरोप लगाएर अमेरिकी सांसदहरूलाई युक्रेनलाई सहयोग गर्न प्रेरित गर्न सकिने मनसायले अमेरिकी सरकारले रुसमाथि पछिल्लो आरोप लगाएको सोइगु बताउँछन् ।

प्रकाशित मिति: बुधबार, फागुन ९, २०८० १६:०९