केही घण्टाभित्रै पृथ्वीमा खस्दै छ २ टनको ‘हजुरबा’ उपग्रह, क्षतिको सम्भावना कति ?

केही घण्टाभित्रै पृथ्वीमा खस्दै छ २ टनको ‘हजुरबा’ उपग्रह, क्षतिको सम्भावना कति ?

A+ A A-

कुनै बेला निकै महत्त्वपूर्ण मानिएको युरोपको एउटा उपग्रह केही घण्टाभित्र पृथ्वीमा खस्दै छ । ईआरएस–२ नामको उक्त स्याटेलाइटलाई सन् १९९५ मा लन्च गरिएको थियो । यसैको मद्दतबाट आज अन्तरिक्षदेखि पृथ्वीको निगरानी गर्न प्रयोग भइरहेका आधुनिक प्रविधिको विकास गर्न सकिएको थियो ।

यस उपग्रहले सन् २०११ मा काम गर्न छोडेको थियो । त्यसपछि यो बिस्तारै पृथ्वीतिर आइरहेको थियो । अब यो एक्कासि अनियन्त्रित भएर बुधबार कुनै पनि बेला वायुमण्डलमा प्रवेश गर्नेछ ।

युरोपेली स्पेस एजेन्सी (ईएसए)का अनुसार, २ टन वजन भएको यो स्याटेलाइटको धेरैजसो हिस्सा पृथ्वीको सतहमा आइपुग्नुअघि नै जल्नेछ ।

बचेखुचेको केही अवशेष पृथ्वीमा खस्न सक्छ तर मान्छे भएको क्षेत्रमा खसेर क्षति गर्ने सम्भावना धेरै कम रहेको बताइएको छ । यसका टुक्रा संसारका कुनै पनि भागमा झर्न सक्छन् । पृथ्वीको धेरैजसो हिस्सामा समुद्र रहेकाले अक्सर यस्ता टुक्रा पानीमै खसेर डुब्छन् ।

युरोपेली स्पेस एजेन्सीले सन् १९९० को दशकमा दुई उस्तै अर्थ रिमोट सेन्सिङ (ईआरएस) उपग्रह लञ्च गरेको थियो– ईआरएस– १ र ईआरएस– २ । यी त्यो बेलाका सबैभन्दा आधुनिक उपग्रह थिए, जसमा जमिन, समुद्र र हावामा हुने परिवर्तनलाई मापन गर्ने उपकरण लगाइएको थियो ।

यी उपग्रहले बाढीलाई निगरानी गरे, समुद्र र महाद्वीपको तापमानलाई मापन गरे, बरफमा आएको परिवर्तन, भूकम्पका क्रममा भएका बदलावबारे जानकारीहरू जुटाए । यी दुवै उपग्रहलाई युरोपमा पृथ्वीको निगरानी गर्ने उपग्रहहरूको 'ग्रान्डफादर' अर्थात् 'हजुरबा' भनिन्थ्यो । ईआरएस– २ यी दुईमध्ये पहिलो हो, जुन पृथ्वीमा खस्दै छ ।

प्रकाशित मिति: बुधबार, फागुन ९, २०८० १५:४३