गाजामा तत्काल युद्धविराम गर्ने प्रस्तावमा अमेरिकाले लगायो भिटो

A+ A A-

संयुक्त राष्ट्रसंघको सुरक्षा परिषदमा अल्जेरियाले प्रस्तुत गरेको गाँजामा तत्काल युद्धविराम गर्नुपर्ने एक प्रस्तावमा अमेरिकाले भिटो प्रयोग गरेको छ ।

आफैँले ल्याएको अस्थायी युद्धविरामको अपिल गरिएको प्रस्तावपछि अमेरिकाले अल्जेरियाले सुरक्षा परिषदमा प्रस्तुत गरेको प्रस्तावमा भिटो प्रयोग गरेको हो ।

बीबीसीका अनुसार युद्धविरामको प्रस्ताव रोक्ने अमेरिकाको यो कदमको उसका सहयोगी राष्ट्रहरूले पनि निन्दा गरेका छन् । संयुक्त राष्ट्रसंघको सुरक्षा परिषदका स्थायी सदस्य राष्ट्रहरूलाई प्राप्त विशेषाधिकारलाई भिटो भनिन्छ । यो उनीहरूले कुनै प्रस्तावलाई छलफल हुनबाट रोक्नका लागि प्रयोग गर्न सक्छन् । अमेरिकी भिटोपछि यो प्रस्ताव पनि रोकिएको छ ।

यद्यपि, अमेरिकाले आफ्नो प्रस्तावमा रफाह क्षेत्रमा प्रवेश नगर्न इजरायललाई सचेत गराएको छ । इजरायलले भने रफाहमा प्रवेश गर्ने र १० मार्चसम्म सबै इजरायली बन्धकलाई छाड्न समयसीमा दिएको छ ।

१५ सदस्यीय सुरक्षा परिषदमा १३ राष्ट्रले अल्जेरियाले ल्याएको उक्त प्रस्तावको समर्थन गरेका थिए । तर, ब्रिटेनले भने भोटिङको प्रक्रियामा भाग लिएको थिएन । अमेरिकाले त्यसमा भिटो लगाएको हो ।

संयुक्त राष्ट्रसंघका लागि अमेरिकी राजदूत लिन्डा थोमस ग्रिनफिल्डले इजरायल र हमासबीच कुराकानी भइरहेकोले तत्काल युद्धविरामको आह्वान गर्ने उपयुक्त समय नभएको टिप्पणी गरेकी छन् । यद्ध अन्त्यका लागि भइरहेका वार्तालाई यो प्रस्तावले खतरामा पार्ने अमेरिकी टिप्पणी छ ।

अमेरिकाले ल्याएको प्रस्तावमा भने यथासक्य चाँडो अस्थायी युद्धविराम लागू गर्नुपर्ने कुरा छ । त्यस्तै इजरायली बन्धकहरूको छोड्नुपर्ने सर्त पनि राखिएको छ । यसका साथै गाजाका लागि पठाइएका सहायताहरूमा कुनै पनि प्रकारको रोकावट हटाउनुपर्ने उल्लेख छ ।

संयुक्त राष्ट्रसंघका लागि प्यालेस्टाइनी प्रतिनिधि रियाद मन्सुरले भने अमेरिकी भिटोलाई लापरवाह र खतरनाक भएको टिप्पणी गरेका छन् ।

प्रकाशित मिति: बुधबार, फागुन ९, २०८० ०८:१८