कांग्रेस महासमिति बैठक: गगन थापाकाे प्रस्तावले कार्यकर्तामा उत्साह

A+ A A-

‘प्रतिवेदनमा उहाँहरूले आफ्नो ठाउँबाट मिहिनेत गर्नुभएको छ । मिहिनेतको प्रशंसा गर्नैपर्छ । तर पुरानो विचार छ, बीपीजीले उतिबेलै राख्नुभएको विचार प्रतिवेदनमा मात्र सीमित राखेर सुनाएर नहुँदो रहेछ,’ रुपन्देही १ बाट नेपाली कांग्रेसको महासमिति प्रतिनिधि बनेर गोदावरी पुगेकी सरिता चौधरीले मंगलबार अपराह्न शिलापत्रसँग भनिन् । सोमबारदेखि सुरु कांग्रेसको महासमिति बैठकमा मंगलबार पेस भएका चारवटा प्रतिवेदनपछिको प्रतिक्रिया थियो चौधरीको । उपसभापति पूर्णबहादुर खड्काकाे नीति, महामन्त्री गगन थापाको संगठनात्मक, अर्का महामन्त्री विश्वप्रकाश शर्माको समसामयिक राजनीतिक प्रतिवेदन तथा प्रवक्ता प्रकाशशरण महतले आर्थिक प्रतिवेदन पेस गरे ।

उनीहरूको प्रतिवेदनमा मार्गदर्शन नभएको, वर्तमान अवस्थाको आर्थिक सामाजिक अवस्थालाई बेवास्ता गरिएको, पार्टीले दिनुपर्ने भिजन प्रस्ट नदिएको प्रतिक्रिया महाधिवेशन प्रतिनिधिले दिए । ‘अहिले देशको स्थिति, जनताको अवस्था, जातजाति, भाषाभाषीका समस्या छन् । देश आर्थिक मन्दीमा फसेको छ । विद्यार्थीदेखि युवासम्म पलायन भइरहेका छन् । यी बारेमा जोडदार रूपमा आएको भए राम्रो हुन्थ्यो,’ चौधरीले थपिन् । कांग्रेसले दिने निकास के हो भन्ने कुरा प्रतिवेदनमा आउनुपर्नेमा नआएको उनले बताइन् ।

पेस भएका प्रतिवेदनमा सबैभन्दा बढी चासो रहेको विषय हो चुनावी गठबन्धन नगर्ने महामन्त्री थापाको प्रस्ताव । सो कुरा सभापति शेरबहादुर देउवालाई मनाउन संस्थापन समूहका केही नेताले साथ दिएका थिए महामन्त्री थापालाई । ‘ग्राउन्डको भ्वाइस’ भनेर थापा गठबन्धनको विषयमा टसमस भएनन् । ‘अहिले मात्र होइन, पहिलेदेखि कांग्रेसको आन्तरिक जीवनमा धेरै उठान भएको विषय हो यो । पछिल्लो गठबन्धनले आकारमा कांग्रेस ठूलो देखियो तर आन्तरिक जीवन ध्वस्त पारेको थियो । अब कांग्रेसले आफ्नै मिहिनेतमा बलियो बन्ने सन्देशकासाथ महासमितिको हलबाट बाहिर निस्कन परिस्थितिले नयाँ ऊर्जा दिएकाे छ,’ काठमाडौं ७ बाट महासमिति सदस्य भएका सुशील भट्टले शिलापत्रसँग भने ।

‘पार्टीको नाममा मत तान्न र कर्ममा विश्वास गर्ने युवाहरूलाई यसले जोस थपेको छ, भट्टले भने । आफू जहाँ क्रियाशील सदस्य रहेको हो सोही क्षेत्रबाट चुनिएर प्रतिनिधि आउनुपर्ने प्रावधानले पनि कार्यकर्ता उत्साही छन् । यसले केन्द्रमा सक्रिय नेता भन्नेबित्तिकै अरु भन्दा फरक र ठूलो हुँ भन्ने अवस्था नरहने उनीहरूको बुझाइ छ । ‘एक पटक केन्द्रमा आइसकेपछि पुनः गाउँ नजाने परम्परा छ, त्यसलाई राेक्न अधिवेशनमा बुथबाट आउने व्यवस्था छ । वडा सदस्यदेखि मन्त्री/पदाधिकारी भएका पनि तलबाटै चुनिएर आउनुपर्ने भएपछि पार्टी प्रक्रियामा अघि बढ्छ,’ दोलखा १ बाट महासमिति प्रतिनिधि भएका सन्तोष पाण्डेले शिलापत्रसँग भने ।

चितवन कांग्रेसका पूर्वसभापति जितनारायण श्रेष्ठ प्रस्तावबारे झारा टार्ने मात्र नभएर घनिभूत रूपमा छलफल गर्नुपर्ने बताउँछन् । गठबन्धन गर्न हुँदैन भन्दै अन्य दललाई भोट हाल्न परे चितवनका कांग्रेसले औँला काट्ने अभिव्यक्ति दिएका उनी चितवन गठबन्धनबाट पीडित रहेको बताउँछन् । ‘चितवन पटक–पटक गठबन्धनको मारमा परेको जिल्ला हो । देशभरका कार्यकर्ताको मात्र नभएर सामान्य मान्छेले पनि रुचाएका छैनन् । यो कांग्रेसको सिद्धात होइन,’ श्रेष्ठले शिलापत्रसँग भने ।

भोजपुर १ बाट महासमिति सदस्य चयन भएका हेमन्त मुकारुङलाई प्रतिवेदनमा आएका कुराहरू मध्यम लागेछ । ‘कतिपय सान्दर्भिक छन् । कतिपय पुरानैको निरन्तरता छ । गठबन्धन र भ्रष्टाचारको विषय छन् । कांग्रेसले भ्रष्टाचारविरुद्धका कानुन बनायो । कांग्रेसका कोही न कोही नेता भ्रष्टाचारको मुद्दामा परिरहेका छन्', उनले भने । गठबन्धन गर्नेभन्दा आफैँ चुनाव लड्नुपर्ने मत रहेको उनले बताए । उपलब्धि बचाउन सहकार्य आवश्यक रहेको उनको बुझाइ छ ।

हृदयनारायण यादव रौतहट ३ बाट महासमिति सदस्य चुनिएका हुन् । उनलाई प्रतिवेदन राम्रो लागेको छ । ‘जसरी प्रतिवेदन आएको छ, त्यसरी कार्यक्षेत्रमा गएर क्रियाशील भयो भने न त्यसलाई सार्थक भन्न मिल्छ । प्रस्तुति एकदम राम्रो छ । प्रयोग कति राम्रो हुन्छ हेर्न बाँकी छ,’ उनले भने । प्रतिवेदनमाथि बुधबार छलफल सुरु हुने छ ।

प्रकाशित मिति: मंगलबार, फागुन ८, २०८० २२:१४