चलचित्र विकास बाेर्डको काम हामीले गरिरहेका छौ

A+ A A-

राजधानीमा यतिखेर नेपाल अन्तर्राष्ट्रिय चलचित्र महोत्सवको दोस्रो शृङ्ला जारी छ । महोत्सवमा विभिन्न ३१ देशका फरक फरक विधाका सिनेमा देखाइदैछ । मूलधार र वैकल्पिक धारका सिनेमालाई महोत्सवमा देखाइन लागेको आयोजकले बताएका छन् । सिनेमा मार्फत संसारभरको भाषा,संस्कृति तथा जाति समुदायबारे जान्ने अवसर भएकाले महोत्सवमा सहभागी हुन आयोजक समितिका अध्ययक्ष केपी पाठकले आग्रह गरेका छन् । यसै विषयमा शिलापत्रले कुराकानी गरेको छ ।

नेपाल अन्तर्राष्ट्रिय चलचित्र महोत्सवबारे केही बताइदिनुस न । यो कस्तो प्रकारको महोत्सव हो ?

सिनेमाको बौद्धिक बहस सुरु गर्ने उद्देश्यले नै नेपाल अन्तर्राष्ट्रिय चलचित्र महोत्सव आयोजना गरेका हौं । मूलधारको सिनेमा र अल्टरनेटिभ सिनेमालाई हामीलेसँगै लैजान कोसिस गरेका छौं । चलचित्र महोत्सव पहिलेको तुलनमा यो वर्ष निकै उत्साहजनक भएको छ । दर्शकको चाप पनि बढेको छ ।

फिल्म हेर्न दर्शकलाई झन उत्साह थपिएको छ । हरेक वर्ष राम्रो चलचित्र महोत्सव हामीले फरक ठाउँमा गर्ने भएकोले पनि काठमाडौंमा यो पहिलो अनुभव हो । तर सोचेजस्तो ठीकै त भएको छैन तथापि समग्रमा राम्रो भएको छ ।

पछिल्लो समय चलचित्र महोत्सव संख्यात्मक रूपमा बढेको छ नि ?

हो, तपाईले भनेको ठीकै हो । हामीसँगै अरु ४/५ वटा चलचित्र महोत्सव हुने गरेका छन् । कतिपय बन्द पनि भएका छन् । किम्फले १७ औं शृङ्खला पुर्याएको छ । सिनेमा भनेको मनोरञ्जन मात्रै होइन यसर्थमा सिनेमाले समाजका हरेक सौन्दर्य वा विषयवस्तुसँग सरोकार राख्ने भएकोले समाजका हरेक पाटोसँग सिनेमालाई जोड्न खोजिरहेका छाैं । साथै सिनेमा एजुकेसनमा प्यानल डिस्कसन पनि सुरु गरेका छौं ।

सिनेमा एण्ड टुरिजममा प्यानल डिस्कसन छ साथै विभिन्न विषयमा हामीले छलफल पनि सुरु गरेका छौं । नौवटा विषयमा प्यानल डिस्कसन गएिको छ । महोत्सव फागुन १२ गतेसम्म चल्ने छ ।

नेपालमा चलचित्र महोत्सव आयोजना गर्न सहज छ ? महोत्सव गर्दा कति गाह्रो हुँदो रहेछ ?

नेपाल जस्तो मुलुकमा चलचित्र महोत्सव गर्न आफैंमा चुनौती छ । अहिले सम्म म आफैंले पकेटबाट पैसा हालेर महोत्सव आयोजना गरिरहेको छु । अरू महोत्सव गर्ने साथीहरूले कसरी गर्नुहुन्छ थाहा छैन । स्पोन्सरले दिए पनि पछि रिर्पाेट बुझाए पछि दिने हुन् अलिअलि दिन्छन् ।

यस्तो महोत्सवहरूमा करपोरेट हाउसहरूले सहयोग गर्दैनन् । यो वर्ष हामीलाई दिन्छ कि भन्ने आश गरेका थियौं तर दिएन । तर केही सरकारी निकाय र विभिन्न संघसंस्थाहरूले थोरै सहयोग गरेका छन् । यो एउटा सिनेमा निर्माण गरे जस्तै हो । रिजल्ट राम्रो आउँछ कि आउँदैन भर हुँदैन । महोत्सवको पनि केही उद्देश्य राखेर गर्ने हो । सफलता पूर्व समापन भयो भने आन्नद पनि आउँछ । नत्र घाटै खाएर महोत्सव गर्नु चाहिँ बेकार हो ।

यो एउटा चलचित्रको उत्सव हो । हामीले सेलिब्रसन अफ न्यारेटिभ भनेर नारा राखेका छौं । यो महोत्सव संसारभरीका कथाहरुको उत्सव हो । हाम्रो चलचित्र महोत्सव भनेको विभिन्न जातजाति, भाषा संस्कृति साथै समाजको कथाको उत्सव हो ।

विभिन्न देशका कथाहरू मार्फत उत्सव मनाइरहेका छौं । यहाँ विभिन्न देशको विभिन्न विधाका चलचित्रहरू प्रदर्शन भइरहेका छन् । यो महोत्सवमा ३१ देशका चलचित्रहरू छन् । यस्ता चलचित्र हेर्न हामी सबै देश पुग्न सक्दैनौं । त्यो सम्भव पनि छैन । तर महोत्सव मार्फत चारदिनमा दर्शकलाई ३१ वटा देशको जातजाति भाषा, संस्कृति आदि देखाउदैछौ । यो एउटा अवसर पनि हो ।

देशको भूगोल, भाषा र विविधतासँग परिचित गराएका छौं । विभिन्न देशको समाजलाई चिन्नुस् । किताब पढ्नु भन्दा एउटा सिनेमा हेर्नुस् । दर्शकलाई पनि महोत्सवमा सेलिब्रसन गर्न आग्रह गर्छू ।

चलचित्रको छनौट कसरी गरिएको छ ?

महोत्सवमा प्रदर्शनका लागि चलचित्र छनौट गर्न नौ जनाको छनौट समिति बनाएका थियौं । लगभग ६ सय सिनेमाहरूको आवेदन आएको थियो । जसबाट हामीले ६० वटा चलचित्र छनौट गरेका छांै । दुईवटा भेन्यूको समय हिसाब गरेर छनौट गरेका हौं । कुनै दायरा नराखी छनौट गरिएको हो ।

जुन किसिमले सिनेमाको विकास गर्न खोजेका छौं तर सबै किसिमको कन्टेनलाई हामीले देखाउन सक्दैनौं त्यसैले राष्ट्रप्रति कुनै पनि संकट नआउने किसिमको चलचित्रहरू छनौट गरको छौं । कुनै देशको सार्वभौमिकता, धार्मिक, सांस्कृतिक पक्षमाथि प्रहार नभएका सिनेमालाई प्रथमिकता र स्थान दिएका छौं ।

यस्ता महोत्सव गर्दा राज्यको भूमिकाको अपेक्षा गर्नुहुन्छ ?

राज्यले महोत्सव गरिदिने हो भने हामीहरु चलचित्र निर्माण गर्नतिर लाग्ने थियौं । चलचित्रकर्मी भनेको समाजको प्रतिष्ठित मानिस हुन् । सिर्जानात्मक मानिस हुन् भन्ने खालको वातावरण भएको भए हामीले महोत्सव गरिराख्नु जरुरी थिएन । कुनै सिर्जनात्मक कार्यमा लागे हुन्थ्यो । राज्यसँग सांस्कृतिक नीति नै छैन् । बल्लतल्ल चलचित्र नीति बनेको छ कार्यन्वयन भएको छैन् । तीन वर्ष भइसक्यो त्यो लागू भएको छैन् ।

महानगरपालिकाले राष्ट्रिय सभाको हल दिएर सहयोग गरेको छ । नेपाल विकास पर्यटन बोर्डले पनि हल उपलब्ध गराएको छ । नेपाल चलचित्र विकास बोर्डले सहयोग गर्ने अनौपचारिक कुरा गरेको छ । नेपाल चलचित्र विकास वोर्डको काम त हामीले पो गरिरहेका छौ । सरकारी तवरबाट यस्ता महोत्सवमा सहयोग गर्ने वातावरण बनाउनु पर्छ । यि कुराहरु मन्त्रिपरिषदबाटै पास हुनुपर्ने हो ।