ब्रुस ली मेरो आइडल नै हुन्: आनी छोइङ डोल्मा (भिडियो)

A+ A A-

चर्चित गायिका आनी छोइङ डोल्माले ब्रुस ली आफ्नो आइडल भएको बताएकी छन् । उनले आफू ब्रुस लीले कम्फु कराँतेमा नराम्रा मान्छेहरूलाई यातना दिँदा असाध्यै खुसी लाग्ने गरेको बताइन् ।

शिलापत्रको ‘यादहरूको दस्तखत’ कार्यक्रममा कुराकानी गर्दै उनले भनिन्, ‘मैले अमेरिकी मार्सल आर्टका खेलाडी आउँदा उसलाई कसरी खुसी पारूँ भनेर बिहानै चिया दिएर चाप्लुसी गर्न थालिसकेको थिएँ । मार्सल आर्ट्स कसैलाई पिट्नभन्दा पनि आत्मरक्षाका लागि आवश्यक छ । उनी पनि मार्सल आर्ट्सका शिक्षक भए पनि नागी गुम्बामा ध्यान गर्न, करुणा सिक्न, ज्ञानगुणका कुरा गुरुबाट शिक्षादीक्षा लिन आएका थिए ।’

उनले आफू सानै उमेरमा घरबाट भागेर आनी बन्न जानु आफ्नो जीवनकै सबैभन्दा ठूलो उत्साहजनक घटनाका रूपमा स्मरण गरिन् । आफू सानैदेखि केही गरौँ भन्ने उत्साहले भरिएको मान्छे भएको भन्दै उनले जीवन जिउन पनि कुनै कञ्जुस्याइँ नगरेको बनाइन् ।

आफू आनी बने पनि सानैदेखि नाच्न र गाउन हुरुक्कै हुने र रमाउने गरेको उनले बताइन् । ‘नाच्दाखेरी सबै थोक भुलेर शरीरलाई झुमाउँदा ध्यानजस्तै महसुस हुन्थ्यो । हिन्दी र नेपाली गीतहरू सानैदेखि सुन्थे । गुम्बामा पूजाको समयमा सरसफाइको पालो होस् वा खाना बनाउने पालो होस्, म नाचीनाची गर्थें र अरु कोही आयो भने पनि नाच्न उक्साउँथेँ,’ उनी स्मरण गर्छिन् ।

आफू सानो छँदा पनि छोरा र छोरीबीचको विभेदबाट असाध्यै पीडित भएको उनको भनाइ छ । आनी भए पनि जीवनलाई आफ्नै शैलीमा अघि बढाएकी आनीले समाजसेवाको क्षेत्रमा पनि धेरै काम गरेकी छन् । उनले आफूले स्टेजमा कार्यक्रम गर्न जाँदा पनि दर्शकहरू आउने बेलासम्म टिकट देखाएर भित्र छिर्दा पनि विभिन्न सामान बेच्ने र दर्शक हलभित्र छिरेपछि स्टेज पर्फर्मेन्स गरेर हतारहतार बाहिर निस्किएर सामान बेच्ने गरेको बताइन् ।

उनले आफूलाई माग्न असाध्यै अप्ठ्यारो लाग्ने भएकाले सामानहरू बेच्दै अनेकौँ उपाय लगाएर समाजसेवाका लागि रकम जम्मा गरेको बताइन् । उनी भन्छिन्, ‘मान्छेहरू आनी भनेपछि त माग्ने नै हुनुपर्छ भन्ने ठान्दा रहेछन् । त्यसैले कतिपयले विरोध पनि गर्छन् । उनीहरूलाई म केही भन्दिनँ ।’ प्रस्तुत छ शिलापत्रको 'यादहरूको दस्तखत'का लागि कुमार नगरकोटीले गरेको कुराकानी: