देउवाको ‘ग्रीन सिग्नल’ले कांग्रेसमा जुर्मुरायाे हिन्दु राष्ट्रको बहस, नेताहरूले दिए देह त्याग्ने धम्की

देउवाको ‘ग्रीन सिग्नल’ले कांग्रेसमा जुर्मुरायाे हिन्दु राष्ट्रको बहस, नेताहरूले दिए देह त्याग्ने धम्की

A+ A A-

नेपाली कांग्रेसको महासमिति बैठकअगाडि हिन्दु धर्मको मुद्दा जबर्जस्त रूपमा अगाडि आएको छ । पार्टीले प्रस्तावको रूपमा नल्याए महासमितिमा फरक मतको रूपमा लैजाने तयारी गरेका हिन्दु धर्मपक्षधर २२ केन्द्रीय सदस्यहरूले शुक्रबारको पार्टी केन्द्रीय समिति बैठकमा पूरक प्रस्ताव पेस गरे ।

धार्मिक स्वतन्त्रतासहितको वैदिन सनातन हिन्दु धर्मको पक्षमा कांग्रेस हुनुपर्ने उनीहरूको मत छ । केन्द्रीय सदस्य शंकर भण्डारीले सभापति शेरबहादुर देउवालाई उक्त प्रस्तावपत्र बुझाएका थिए । जसमा पुष्पा भुसाल, देवेन्द्रराज कँडेल, प्रकाश रसाइली स्नेही, विद्या तिमल्सिना, गेहेन्द्र गिरी, रंगमती शाही, सीता देवकोटा, सीता कुमारी, दीलेन्द्र बडू, डा. डिला संग्रौला, शारदा पौडेल र अर्जनुबहादुर सिंहले हस्ताक्षर गरेका छन् ।

यस्तै, हस्ताक्षर गर्नेमा चम्पादेवी खड्का, नागिना यादव, नृपबहादुर वड, सञ्जय गौतम, भीम पराजुली, दिनेश कोइराला र मुक्ताकुमारी यादव पनि छन् । हस्ताक्षर गर्नेमा बागमतीका इन्द्रबहादुर बानियाँ र गण्डकीका शुक्रराज शर्मा पनि छन् ।

‘कांग्रेसजस्तो व्यापक जनाधार भएको प्रजातान्त्रिक पार्टीले नेपाली भूमिमा प्रादुर्भाव भएको बौद्ध एवम् किरात धर्म, दर्शन, संस्कृतिसहित ९४ प्रतिशतभन्दा बढी वैदिक सनातन हिन्दु धर्म र संस्कृतिमा आस्था र विश्वास राख्ने जनताको भावनालाई पूरै उपेक्षा गरी राष्ट्रिय एकताका आधार, आपसी सद्भाव, सहिष्णुता, सहअस्तित्वको अभ्यासमा खलल पुग्नेगरी धर्म निरपेक्षताको पक्षमा उभिनु ठीक थिएन,’ उनीहरूले भनेका छन् ।

सोही समूहले शनिबारदेखि सनातन हिन्दु राष्ट्र नेपाल स्थापना महाअभियान सुरु गरेको छ । अभियानको संयोजकमा सांसद तथा केन्द्रीय सदस्य शंकर भण्डारी छन् । उनीहरूको भनाइलाई विश्वास गर्ने हो भने पार्टी सभापति शेरबहादुर देउवा पनि हिन्दु धर्मको पक्षमा सकरात्मक छन् ।

गत ११ मंसिरमा नवलपुर कांग्रेसको जिल्ला सम्मेलनलाई सम्बोधन गर्दै देउवाले भनेका थिए, ‘राजतन्त्र कुनै पनि हालतमा फर्किँदैन तर धर्मनिरपेक्षताका सवालमा भने पार्टीमा छलफल गर्न सकिन्छ ।’ धर्मको पक्षमा वकालत गर्दैगर्दा सभापति देउवाले गणतन्त्र र संघीयताबारे सोच्न नसकिने अडान राखेका थिए ।

‘जनताले संविधानमार्फत फालिसकेको राजतन्त्र फर्कने कुनै सम्भावना छैन । गणतन्त्रविरुद्ध हुने कुनै पनि गतिविधि हामीलाई मान्य छैन,’ देउवाले भनेका थिए । अर्को, संघीयता बारेमा उनले कसैले उल्ट्याउन नसक्ने बताएको थिए । ‘संघीयता कुनै शक्तिले उल्टाउन सक्दैन । यसमा पार्टीको स्पष्ट धारणा छ,’ उनले भनेका थिए ।

देउवाको यो भनाइले अभियानकर्मीमा उत्साह देखिएको छ । अभियानको सल्लाहकार परिषद् संयोजक छन् कांग्रेसका पाका नेता तथा पूर्वमन्त्री लक्ष्मण घिमिरे । उनी सभापति दउवाको भनाइले पार्टीको महासमिति बैठकमा धर्मको बारेमा निर्णय हुनेमा विश्वस्त छन् । ‘सभापतिज्यूको पछिल्लो अभिव्यक्तिले विश्वस्त छु । यस विषयले महासमिति प्रवेश पाउने छ र निर्णय हुनेछ,’ उनले भने ।

पछिल्लो समय आफूहरूको भूमिकामा प्रश्न उठेको संयोजक भण्डारी बताउँछन् । ‘कांग्रेस जस्तो पार्टीले अब नेतृत्व गर्नुपर्छ भनेर अभियानमा लागेका हौँ । विगतमा जे जति त्रुटि भएता पनि अब त्यसलाई सच्याएर सबै नेपालीलाई जोडेर देश निर्माणको अभियानमा जोडेर नेतृत्व गर्ने भएकाले हामीले महाअभियान भनेका हौँ,’ अभियानका संयोजक भण्डारीले भने ।

कांग्रेसबाहेक अन्य राजनीतिक दलहरूको शीर्ष नेताहरूसँग पनि धार्मिक स्वतन्त्रतासहितको हिन्दु धर्मसापेक्ष देश बनाउन कुरा भएको उनले बताए । ‘एमाले, माओवादी किन नहोस, नेतृत्व र सांसदहरूसँग कुरा भएको छ । सबैले आत्मसात गर्नुभएको छ कि देशमा बढ्दो धर्मान्तरणलाई रोक्न सकिएन भने ठूलो संकटमा पर्ने भयो । हामी कम्युनिस्ट हौँ । सिधै धर्मका कुरा गर्न मिल्दैन । तर देशको लागि आवश्यक छ । कांग्रेसले नेतृत्व गरोस् हाम्रो भावनात्मक समर्थन छ भन्नुभएको छ,' उनले दाबी गरे ।

पार्टी सभापति देउवाले पनि अभियानलाई ध्यान दिएको भण्डारी बताउँछन् । ‘गम्भीर सोचका साथ हाम्रो सभापतिले अभियानलाई हेर्नुभएको छ । म साथीहरूलाई विश्वास दिलाउन चाहान्छु । अन्य साथीहरूले पनि आत्मसात गर्नुहुनेछ,’ भण्डारीले भने ।

कांग्रेसका नेता देवेन्द्र कँडेल धर्मको लागि देह त्याग गर्न तयार रहेको बताउँछन् । उनले कांग्रेसले धर्म निरपेक्षता स्वीकार गरेर गल्ती गरेको बताए । केन्द्रीय समितिमा दर्ता गराएको पूरक प्रस्तावमा २२ जना केन्द्रीय सदस्यमात्र नभएर ६० प्रतिशतभन्दा बढी सदस्यहरूले समय नभएकाले हस्ताक्षर गर्न नभ्याएको उनले दाबी गरे ।

७ फागुनबाट सुरु हुने महासमिति बैठकमा ८ गते हिन्दु धर्मको पक्षमा निर्णय गराउने उनले बताए । नभए आमरण अनशन बस्ने उनको चेतावनी छ । ‘८ गते छलफलमा ल्याउनैपर्छ । ९ गते जान हुँदैन । छलफलमा ल्याउन दिइएन भने अनशन बस्नुपर्छ,' उनले भने ।

कांग्रेसको यसअघिका महासमिति बैठक, सभापतिहरूका भेला र महाधिवेशनका पूर्वसन्ध्यामा यी विषय उठ्थे र हराउँथे । हिन्दु राष्ट्रकाे बहसमा सभापति देउवाको ‘ग्रीन सिग्नल’ ले हिन्दुवादी कांग्रेस नेताहरू उत्साही छन् ।

प्रकाशित मिति: शनिबार, फागुन ५, २०८० १८:०७