...अनि आरजुले भनिन्– मैले त एउटा मात्र पढेकाे छु, छोराको बिहेले केही पनि भ्याइनँ

...अनि आरजुले भनिन्– मैले त एउटा मात्र पढेकाे छु, छोराको बिहेले केही पनि भ्याइनँ

फाइल तस्वीर

A+ A A-

नेपाली कांग्रेसको केन्द्रीय समिति बैठकमा आगामी महासमिति बैठकमा पेस भएका तीन प्रतिवेदनमाथि छलफलका लागि एक दिन छुट्यायो । बिहीबारबाट सुरु बैठकमा शुक्रबार केन्द्रीय सदस्यहरूले उपसभापति पूर्णबहादुर खड्काले पेस गरेको नीतिगत प्रतिवेदन, महामन्त्री गगन थापाको संगठनात्मक प्रतिवेदन र अर्का महामन्त्री विश्वप्रकाश शर्माको समसामयिक राजनीतिक प्रतिवेदनमा आफ्नो विचार मन्थन गरे । लिखित सुझाव मागिएकोमा कमै मात्र केन्द्रीय सदस्यले सुझाव दिए ।

महासमितिका लागि तयार पार्ने प्रतिवेदनमाथिको छलफल भए पनि कतिपयले प्रतिवेदन अध्ययन गर्न नै भ्याएका छैनन् । बुधबार बेलुका मात्र ती प्रतिवेदन केन्द्रीय सदस्यलाई मेल गरिएको थियो । केन्द्रीय कार्यालयले मेल गरे पनि बिहीबार बैठकमा कागज पाएपछि मात्र अध्ययन गर्ने केन्द्रीय सदस्य पनि छन् ।

शुक्रबार अपराह्न पार्टी मुख्यालय सानेपाबाट बाहिरिँदै गर्दा नेतृ आरजु राणा देउवाले भनिन्, ‘मैले त एउटा मात्र प्रतिवेदन पढेको छु । अरू पढ्नै भ्याइनँ ।’ उनले कारण पनि खुलाइन्, ‘छोराको बिहेले केही पनि भ्याइनँ । गत बुधबार साँझ पनि देउवा दम्पतीका छोरा जयवीर देउवाको विवाहको भोज थियो ।

जिमेलको भण्डारण शक्ति पूरा भएकाले पार्टीले मेल गरेको मेल उपलब्ध नहुने केन्द्रीय सदस्य पनि बैठकमा थिए । ‘मेरो स्टोरेज फूल भएकाले मेल आएको छैन । कागजी प्रतिवेदन हेरेको छु । त्यसको आधारमा सुझाव दिनुपर्ला,’ शुक्रबारको बैठकमा प्रवेश गर्दागर्दै एक केन्द्रीय सदस्यले शिलापत्रसँग भने ।

शुक्रबारको खाजा समयअघि ३१ जना केन्द्रीय सदस्यले धारणा राखेका थिए । लिखित सुझाव माग गर्दा पनि सबैले बोल्नुपर्ने हो भन्ने प्रश्नमा एक केन्द्रीय सदस्यले शिलापत्रसँग भने, ‘महासमिति बैठकमा बोल्न पाइँदैन । त्यहाँ महासमिति सदस्य नै हुन्छन् । बोल्ने बेलामा ठाउँ पाएपछि यतै बोलौँ भन्ने छ ।’

निर्वाचन प्रणाली फेर्न जोड

बैठकमा केन्द्रीय सदस्यहरूले चुनावी प्रणाली फेर्नमा जोड दिए । त्यसमा प्रतिनिधिसभा प्रत्यक्ष र राष्ट्रियसभा समानुपातिक प्रणालीबाट गठन हुनुपर्ने मत केन्द्रीय सदस्यहरूको छ । ‘पहिले २०३ क्षेत्र थिए । निर्वाचन क्षेत्र बढाऔँ । प्रतिनिधिसभा प्रत्यक्ष निर्वाचित गरौँ । पूर्ण प्रत्यक्ष निर्वाचित चुनाव प्रणाली नहुँदा सधैँ ‘ह्याङ गभर्मेन्ट’ बन्ने भयो । राजनीति स्थायित्व दिन र चुनाव अघि गठबन्धन नगर्न यो जरुरी छ,’ केन्द्रीय सदस्य रामहरि खतिवडाले भने ।

यो गठबन्धन पाँच वर्ष टिकाऊँ, अर्को चुनाव एक्लै लडौँ

महामन्त्रीद्वयको प्रस्तावमा वर्तमान गठबन्धन पाँचै वर्ष लैजाने र त्यसपछिको चुनावअघि गठबन्धन नगर्ने प्रस्ताव छ । त्यसमा अधिकांशले सहमति जनाएका छन् । संस्थापनइतर समूहका नेता डा. शेखर कोइरालाले अप उप्रान्त कुनै पनि चुनावमा गठबन्धन गर्न नहुने बताए । ‘हरेक तहका निर्वाचनमा अब उप्रान्त नेपाली कांग्रेसले कुनै राजनीतिक दलसँग चुनावी गठबन्धन वा तालमेल गर्नु हुँदैन । अहिले संविधानमा भएको निर्वाचन प्रणालीले कुनै पनि दलको बहुमत आउने सम्भावना देखिँदैन,’ बैठकमा उनले भने, ‘तसर्थ संविधान संशोधनमार्फत निर्वाचन प्रणाली परिवर्तन गर्न सबै राजनीतिक दलहरूसँग संवादको लागी नेपाली कांग्रेसले पहल गर्ने ।’

बलियो संगठन बनाएर आगामी चुनाव एक्लै लड्नुपर्ने केन्द्रीय सदस्य खतिवडाले बैठकमा बताए । ‘यो गठबन्धन पाँच वर्ष भनेअनुसार नै टिकाएर जाऔँ अर्को चुनावअघि संगठन बलियो बनाऔँ र गठबन्धन नगरी चुनावमा जाने स्थिति सिर्जना गरौँ भन्ने प्रस्ताव राखेको छु,’ केन्द्रीय सदस्य खतिवडाले भने ।

१,२,३, ४ को प्रस्ताव आफूलाई हेरेर गरियो

१ पटक राष्ट्रपति,२ पटक प्रधानमन्त्री, ३ पटक मन्त्री र ४ पटकभन्दा बढी सांसद हुन नपाउने व्यवस्था गर्नुपर्ने प्रस्ताव महामन्त्री शर्माको छ । यसमा केही नेताले आपत्ति जनाए । केन्द्रीय सदस्य सुशीला थिङले भनिन्, 'पार्टी सभापति शेरबहादुर देउवा २०४८ सालदेखि निर्वाचित हुँदै आउनुभको छ । महामन्त्री गगन थापा २०६४ सालदेखि सांसद निर्वाचित हुँदै आएकोमा उहाँहरूलाई बिदा गर्ने हाे ?

उनले आफूलाई हेरेर मात्र एकपटक राष्ट्रपति, दुईपटक प्रधानमन्त्री, तीनपटक मन्त्री र चारपटकभन्दा बढी सांसद हुन नपाउने व्यवस्था गरौँ भन्ने प्रस्ताव ठीक नभएको बताइन् ।

हिन्दु धर्मको माग

कांग्रेसका २२ जना केन्द्रीय सदस्यले आसन्न महासमिति बैठकमा सनातन हिन्दु राष्ट्रको पक्षमा निर्णय लिन भन्दै पार्टी सभापति शेरबहादुर देउवालाई हस्ताक्षर बुझाए । हस्ताक्षर गर्नेमा शंकर भण्डारी, देवेन्द्रराज कँडेल, प्रकाश रसाइली स्नेही, शुक्रराज शर्मा, इन्द्रबहादुर बानियाँ, दीलेन्द्रप्रसाद बडू र रंगमती शाही छन् । यसैगरी विद्या तिमल्सिना, नगेन्द्र गिरी, सीता देवकोटा, अर्जुनजंगबहादुर सिंह, सीताकुमारी राना छ्न् ।

यस्तै केन्द्रीय सदस्य पुष्पा भुसाल, सारदा पौडेल, चम्पादेवी खड्का, नागिना यादव, नृपबहादुर वड, सञ्जय गौतम, भीम पराजुली, दिनेश कोइराला, मुक्ताकुमारी यादव र डा. डिला संग्रौलाले पनि हस्ताक्षर बुझाएका छ्न् । केन्द्रीय सदस्यको हस्ताक्षरको नेतृत्व गरेका भण्डारीले आमजनताको भावनाअनुसार कांग्रेसले निर्णय गर्नुपर्ने बताए ।

प्रधानमन्त्री प्रचण्डको धारणाबारे जवाफ माग

केन्द्रीय सदस्य अजयबाबु शिवाकोटीले प्रधानमन्त्री पुष्पकमल दाहाल प्रचण्डले कांग्रेससँगको सहकार्य लाभदायक नभएको अभिव्यक्ति दिएकोमा पार्टीको धारणा गरे । ‘माओवादीका अध्यक्ष तथा प्रधानमन्त्री पुष्पकमल दाहाल प्रचण्डले नेपाली कांग्रेससँगको गठबन्धनका बारेमा टिप्पणी गर्नुभएको छ । उहाँको केन्द्रीय समिति बैटकमा । खासगरी माओवादीका कार्यकर्ताभन्दा पनि चर्को कुरा गरेर प्रचण्डले आफ्नो अभिव्यक्ति दिनुभएको छ, यसबारेमा हाम्रो धारणा के हो ?,’ उनले बैठकमा भने ।

शुक्रबारको बैठकमा सभापति शेरबहादुर देउवा अपराह्नमा पुगेका थिए । उनी ढिला पुगे पनि प्रतिवेदन पेस गरेका उपसभापति र महामन्त्रीद्वयले प्रतिवेदनमाथिको सुझाव नोट गरेका छन् । ‘सबै खाले मिश्रित सझाव आएका छन्,’ महामन्त्री थापाले भने ।

प्रकाशित मिति: शुक्रबार, फागुन ४, २०८० २१:०६