सभामुख सकसः शिवमाया नछोड्ने, नेकपा दुविधामा

A+ A A-

प्रतिनिधिसभाका तत्कालीन सभामुख कृष्णबहादुर महराले यौन दुर्व्यवहारको अभियोग लागेर राजीनामा दिएपछि सत्तारुढ दल नेकपालाई सभामुख पद कसरी आफैंले लिने भन्ने समस्या उत्पन्न भएको छ ।

सत्तारुढ दल नेकपाले सभामुख पद आफैंले लिन चाहे पनि संवैधानिक व्यवस्थाले समस्या पारिदिएको हो । संविधानले सभामुख र उपसभामुख पदमा भिन्न दलको व्यक्ति हुनुपर्ने र फरक लिङ्गको हुनुपर्ने परिकल्पना गरेको छ ।

महराले राजीनामा दिएपछि सभामुख पदमा आफ्नो दलबाट अर्काे कुनै व्यक्तिलाई अघि सार्ने तयारीमा नेकपा छ । यसका लागि उपसभामुख डा. शिवमाया तुम्वाहम्फेले पदबाट राजीनामा दिनुपर्छ । तर, उपसभामुख डा. तुम्वाहम्फे आफैं सभामुख बन्ने ग्यारेण्टी भएपछि मात्रै पदबाट राजीनामा गर्ने तयारीमा छिन् ।

सभामुख पद रिक्त भएको १० दिनपछि उपसभामुख तुम्वाहाम्फेले त्यसमा दाबी गरेकी छिन् । संसद् सचिवालयकी कर्मचारीलाई यौन दुर्व्यवहार गरेको आरोप लागेसँगै १४ असोजमा महराले सभामुख पदबाट राजीनामा दिएपछि सो पद रिक्त छ । महरा हाल अनुसन्धानको क्रममा प्रहरी हिरासदमा छन् ।

उपसभामुख तुम्वाहाम्फेले अहिले राष्ट्रिय सभा, प्रतिनिधिसभा र प्रदेश सभामा कतै पनि सभामुख पदमा महिला नभएको भन्दै प्रतिनिधिसभामा आफू सभामुख बन्न पाउनु पर्ने दाबी गरेकी हुन् ।

स्रोतले दिएको जानकारीअनुसार उपसभामुख डा. तुम्वाहम्फेले दशैंको अवसर पारेर राष्ट्रपति विद्यादेवी भण्डारीलाई भेटेकी छन् । सो भेटमा महिला भएकै कारण आफूलाई सभामुख हुने अवसरबाट वञ्चित नगरियोस् भन्ने माग राखेकी छन् । यस्तै, महराले सभामुख पदमा बसेर गरेको गल्तीको दोष र भागिदार आफूलाई नबनाउन पनि उनको आग्रह छ ।

गत आइतबार प्रधानमन्त्री केपी शर्मा ओलीसँग भेट्न बालुवाटर पुगेकी उपसभामुखले आफ्नो योग्यता, पार्टीमा दिएको योगदान, क्षमता र दक्षताको मुल्यांकन गर्न आग्रह गरेकी स्रोतको दाबी छ । सबै प्रदेशको सभामुख र मुख्यमन्त्री पुरुष भएको बेला आफूलाई सभामुख बनाएमा पार्टीको क्षवि र प्रतिष्ठा अझ बढ्ने उनको दाबी छ ।

उपसभामुख तुम्वाहाम्फेलाई राजीनामा गर्न लगाएर मन्त्री बनाइदिने आश्वासन नेकपाका केही नेताले दिएको बताइएको छ । तर, उपसभामुख तुम्वाहम्फेले आफू मन्त्री पदको लोभी भएको सन्देह प्रवाह हुने गरी पदबाट राजीनामा गर्न तयार नभएको संकेत प्रधानमन्त्री ओलीलाई गराएकी छिन् ।

प्रधानमन्त्री ओलीले सभामुख पदका लागि अर्का अध्यक्ष पुष्पकमल दाहालसँग सल्लाह नभएको भन्दै सचिवालय बैठकबाटै निर्णयमा पुगिने जवाफ दिएका स्रोतको दाबी छ ।

‘सभामुख कसलाई बनाउने भनेर साथीहरुसँग सल्लाह भएको छैन, प्रचण्ड (पार्टीको अर्का अध्यक्ष) सँग कुरा भएको पनि छैन, शक्ति सन्तुलनका कुरा होलान्, पुरानो कुरा आउला, त्यसबेला सभामुख माओवादीलाई दिइएको थियो, प्रचण्डलाई नमनाई मैले एक्लै निर्णय गर्न सक्दिनँ,’ प्रधानमन्त्री ओलीले उपसभामुख तुम्वाहम्फेलाई दिएको जवाफ उद्धृत गर्दै स्रोतले भन्यो ।

उपसभामुख तुम्वाहम्फेले भने आफूलाई तेह्रथुममा जन्मिएर कहिले झापा, कहिले काठमाडौंलाई राजनीतिक क्षेत्र बनाएकै आधारमा अवसरबाट वञ्चित नगर्न अनुरोध गरेकी थिइन् ।

तुम्वाहाम्फेसँगको भेटमा प्रधानमन्त्री ओलीले आफ्नो चाहना सकारात्मक भए पनि परिस्थिति बुझेर न्याय हुने गरी अवसर प्रदान गर्ने र त्यसलाई स्वीकार गरेर आफूलाई सहयोग गर्न आग्रह गरेका थिए ।

प्रकाशित मिति: मंगलबार, असोज २८, २०७६ २०:१३