किसानहरूले गरे भारत बन्दको आह्वान

A+ A A-

भारतको संयुक्त किसान मोर्चाले आज भारत बन्दको आह्वान गरेको छ । देशव्यापी बन्दको आह्वान गरेको मोर्चालाई सम्पूर्ण किसान युनियनका साथसाथै ट्रक तथा ट्रेड युनियनले पनि साथ दिएको भारतीय सञ्चारमाध्यमहरूले उल्लेख गरेका छन् ।

किसानहरूले बन्दको आह्वान गरेपछि प्रशासन हाई अलर्टमा रहेको आजतकले उल्लेख गरेको छ । त्यसो त यो बन्द रोक्नका लागि भारतस्थित केन्द्र सरकारले किसा संगठनहरूसँग बिहीबार वार्ता गरेको थियो । राति साढे १ बजेसम्म वार्ता चले पनि सहमति हुन नसकेको जनाइएको छ ।

बन्दलाई लक्षित गर्दै राजधानी दिल्लीका सबै बोर्डरहरूमा सुरक्षा सतर्कता बढाइएको छ । त्यस्तै पञ्जाबदेखि हरियाणासम्म र दिल्लीदेखि उत्तरप्रदेशसम्मका प्रशासन हाई अलर्टमा राखिएको जनाइएको छ ।

बन्दका कारण दिल्लीका सीमा क्षेत्रहरूमा ठूलो जाम लागेको जनाइएको छ । कैयौँ किलोमिटर लामो सवारीसाधनको जाम लागेको समाचारमा उल्लेख छ ।

सरकारसँगको वार्तामा सहमति नभएपछि किसान नेता जगजीत सिंह दल्लेवालले शान्तिपूर्ण रूपमा किसान आन्दोलन जारी रहने बताएका छन् । उनले भनेका छन्- हामी शान्तिपूर्ण आन्दोलन जारी राख्छौँ । सरकारले आइतबार वार्तामा बोलाएको छ । त्यतिञ्जेलसम्म हामी प्रतीक्षा गर्नेछौँ । यदी आइतबार पनि सकारात्मक नतिजा नमिले आन्दोलन जारी राख्नेछौँ ।

किसानहरूले १३ बुँदे माग राख्दै आन्दोलन घोषणा गरेका हुन् । सरकारले आफ्नो बाचा पूरा नगरेको उनीहरूको भनाइ छ ।

बिहीबारको वार्ता सकिएपछि भारतका केन्द्रीय मन्त्री अर्जुन मुन्डाले छलफल सकारात्मक रहेको बताएका थिए । उनले भनेका थिए- सरकार र किसान युनियनको बीचमा भएको वार्ता सकारात्मक रूपमा अघि बढेको छ । युनियनले उठाएको विषहरूमा सरकारले ध्यान केन्द्रित गर्नेछ । आइतबार अर्को बैठक बस्नेछ । हामी सान्तिपूर्ण समाधानको पक्षमा छौँ ।

प्रकाशित मिति: शुक्रबार, फागुन ४, २०८० १०:२०