भारतमा 'क्लेसा' मञ्चनको तयारीमा रहेकाहरूको गुनासो- अभ्यास गर्ने ठाउँसम्म पाएनौँ (भिडियो)

भारतमा 'क्लेसा' मञ्चनको तयारीमा रहेकाहरूको गुनासो- अभ्यास गर्ने ठाउँसम्म पाएनौँ (भिडियो)

A+ A A-

नेपाली चलचित्रमा पृथक् चरित्रमा अभिनय गर्न रुचाउने सुरक्षा पन्तले धेरै दर्शकको मन जितेकी छन् । धेरैजसो सिनेमाको सेटमा व्यस्त रहने सुरक्षा अहिले भने रङ्गमञ्चमा नाटकको अभ्यासमा व्यस्त छिन् । थापागाउँस्थित मण्डला नाटकघरमा उनी अभिनित नाटक ‘क्लेसा’को रिहर्सल चलिरहेको छ ।

सिनेमाको अभिनयभन्दा नाटकको अभिनय आफैँमा अलि भिन्न अनुभव र अभ्यास पनि हो । कतिपयले सिनेमाभन्दा नाटक अझै कठिन अभ्यास भएको पनि बताउँछन् । जानकारहरू त नाटकलाई एक प्रकारको साधना नै भन्ने गर्छन् ।

सिनेमाको अभिनय र नाटक गर्नुमा के फरक रहेछ भन्ने शिलापत्रको प्रश्नमा सुरक्षा भन्छिन्, ‘सिनेमा गरिरहेको मान्छेलाई नाटक नौलो अनुभव हुने रहेछ । नाटकमा अनुशासन, मिहिनेत र साधना सिनेमाभन्दा निकै धेरै हुने रहेछ, जसले आफूलाई निखार्न र आफ्ना कमजोरीको पहिचान गर्न धेरै सहयोग पुग्ने रहेछ ।’

सुरक्षाले गरेको पहिलो नाटक हो, 'क्लेसा' तर क्लेसा नयाँ नाटक भने होइन । पञ्चायती व्यवस्थामा शासकले आममानिसलाई कसरी शोषण गर्थे भन्ने प्रतीक्षा कट्टेलको कथालाई रङ्गकर्मी विजया कार्कीले ‘क्लेसा’ नाम दिएकी हुन् । उक्त नाटक करिब तीन वर्षअघि मण्डला थिएटरमै मञ्चन भएको थियो ।

सुरक्षाले त्यसबेला 'क्लेसा'मार्फत रङ्गमञ्चमा डेब्यु गरेकी थिइन् । सोही नाटक ‘२३औँ भारत रङ्ग महोत्सव’ मा छनोटमा परेको हो । सोही कारण विजया कार्की, सुरक्षा पन्तसहित ‘क्लेसा’को टिम भारत जानुअघि अहिले पुनः ‘क्लेसा’ मञ्चनको तयारीमा जुटेको हो ।

देशको प्रतिनिधित्व गरेर अन्तर्राष्ट्रिय मञ्चमा प्रदर्शन गर्न लागिएको 'क्लेसा'का लागि अभ्यास गर्ने ठाउँको समेत अभाव भोगिरहेको निर्देशक विजया र कलाकार सुरक्षा सुनाउँछन् ।

‘हामीले त आफ्नो ठाउँबाट सक्दो मिहिनेत गर्ने हो । तर, अभ्यास गर्ने ठाउँको समेत अभाव भोगिरहेका छौँ । देशको प्रतिनिधित्व गर्ने काममा सरकारी तहबाट पनि साथ पाएको भए धेरै सहज हुन्थ्यो होला । त्यो नहुँदा नरमाइलो लाग्ने रहेछ,’ विजया भन्छिन्, ‘सरकारलाई चासो छैन भनौँ भने निर्धारित निकायहरू बनाएर राखेको छ । जहाँ हामी पुगेको पनि हो । तर, उहाँहरूले हाम्रो कामलाई महत्त्व नै दिनुभएन ।’

भारतको नयाँ दिल्लीस्थित नेसनल स्कुल अफ ड्रामामा फेब्रुअरी १ देखि २१ सम्म सञ्चालन हुने महोत्सवमा नेपाल तथा भारतसहित रसिया, इटाली, बंलादेशलगायत मुलुकका नाटकहरू प्रदर्शन हुनेछन् । देख्दा सिङ्गो देशको प्रतिनिधित्व गरेर अन्तर्राष्ट्रिय मञ्चमा जाँदै गरेको देखिए पनि नाटकको अभ्यास गर्ने ठाउँसम्मको अभाव भोगिरहेको सुरक्षा र विजया एकसाथ सुनाउँछन् ।

१ घण्टा ३० मिनेटको नाटक 'क्लेसा'मा सुरक्षा पन्त, विजय बरालसहित अन्य १३ जना कलाकारको अभिनय छ । 'क्लेसा'को मञ्चन भने फेब्रुअरी १७ मा नयाँ दिल्लीस्थित आईएल अडिटोरियम हलमा र दोस्रो प्रदर्शन उतराखण्ड रामनगरस्थित एन्डी अडिटोरियम हलमा हुनेछ ।