शिलापत्र छैटौँ वर्षमा- विश्वसनीय पत्रकारिता हाम्रो मूलमन्त्र

A+ A A-

खबरको स्थायी ठेगाना बन्ने संकल्पसहित सुरु भएको शिलापत्रडटकमको यात्रा आजदेखि छैटौँ वर्षमा प्रवेश गरेको छ । व्यावसायिक पत्रकारितामा हामीले उत्साह र जिम्मेवारीबोधका साथ पाँच वर्ष पूरा गरेका छौँ । यस अवसरमा हामी समस्त पाठक, दर्शक एवं शुभेच्छुकसँग खुसी साट्न चाहन्छौँ ।

पत्रकारिताको अर्को नाम खबरदारी पनि हो । निर्भीक र निष्पक्ष पत्रकारिताप्रति दृढ रहेर हामीले त्यो जिम्मेवारी पूरा गरेका छौँ । त्यसैले बितेका पाँच वर्षमा सफलतासँगै आइलागेका चुनौतीको सामना गर्दै हामी अघि बढेका छौँ । कोभिड– १९ को विश्वव्यापी महामारी र त्यसबाट उत्पन्न मानवीय संकटलाई पन्छाउँदै शिलापत्र अघि बढिरहेको छ । पछिल्लो वर्ष अर्थतन्त्रमा आएको सुस्तताले सिङ्गो पत्रकारिता क्षेत्र समस्यामा छ । तर, यो अप्ठेरोलाई पनि पन्छाएर हामी छिट्टै नयाँ गतिका साथ अघि बढ्नेछौँ भन्नेमा उत्तिकै विश्वस्त छौँ ।

सत्य, तथ्य, निष्पक्षसँगै विश्वसनीय पत्रकारिता हाम्रो मूलमन्त्र हो । ताजा समाचार र स्थलगत रिपोर्टिङ त छँदै छ, विविध विचार, वस्तुनिष्ठ विश्लेषण एवं मुद्दामा आधारित बहस–विमर्शका माध्यमबाट प्रस्ट दृष्टिकोण र नीति निर्माणमा सघाउने हाम्रो प्रयत्न रहँदै आएको छ । शिलापत्रले यस वर्ष शृंखलाबद्ध रूपमा गरेका विकास बहस र विश्वविद्यालय विमर्श त्यसैका उदाहरण हुन् । त्यसबाहेक फिक्सन डिजाइनर कुमार नगरकोटीको ‘यादहरूको दस्तखत’, ‘साताका कार्टुनिस्ट’जस्ता स्तम्भहरू पनि थपिएका छन् ।

कुनै समय न्यु मिडिया भनिएको अनलाइन पत्रकारिता पछिल्लो समय व्यावसायिक पत्रकारिताको मूलप्रवाह बनिसकेको छ । त्यसैले अनलाइन पत्रकारिताको कर्तव्य र जिम्मेवारी दुवै थपिएको छ । अक्षर र श्रव्यदृश्यसहित मल्टिमिडिया सामग्री एउटै माध्यममा पाइने अनलाइनमा आमपाठकको आकर्षण पनि बढेको छ । हामी गहन एवं खोजमूलक रिपोर्टिङ, निरन्तरको विचार–विमर्श, स्तरीय मल्टिमिडिया सामग्रीमार्फत शिलापत्र मात्र नभई सिङ्गो अनलाइन पत्रकारिताको विश्वसनीयता र छवि बढाउन प्रयत्नशील छौँ ।

मूलप्रवाह भइसकेसँगै अनलाइन पत्रकारिताको परिभाषा पनि फेरिएको छ । आमपाठकको अपेक्षाअनुरुप शिलापत्र पनि अपडेट पत्रकारिताभन्दा भिन्न ढंगले अघि बढ्न खोजेको छ । नयाँ वर्षमा शिलापत्र वर्षव्यक्ति छनोट गर्दै आएका छौँ । त्यसले वर्ष समीक्षा गर्नुका साथै समाजका विभिन्न क्षेत्रमा भएका सकारात्मक र नकारात्मक घटनाक्रम, त्यसले पारेको प्रभावको विश्लेषण हुने गरेको छ ।

हालै मात्र हामीले अर्थ, समाज र राजनीतिकेन्द्रित शिलापत्र सर्वेक्षण– २०८० गरेका छौँ । सर्वेक्षणको नतिजाले नेपाली समाजको समस्या, युवा जनशक्तिको पलायनका कारण र स्वदेशमै रोक्न गर्न सकिने उपायहरू, अर्थतन्त्रमा सुधारका लागि गर्नुपर्ने प्रयत्न र नेपाली राजनीतिका समस्या पहिल्याएको छ । त्यसले नेपाली समाजमा अहिले देखिएको असन्तुष्टि र निराशाका कारण पहिल्याएर त्यसबाट मुलुकलाई बाहिर निकाल्न नीतिनिर्माण तहलाई सघाउने हाम्रो विश्वास छ । यस्ता सर्वेक्षण, मुद्दाकेन्द्रित विमर्श, गहन रिपोर्टिङ, विविध विचार र भुईं वर्गका नागरिकका वास्तविक आवाज शिलापत्रको प्राथमिकतामा रहनेछन् ।

शिलापत्र यहाँसम्म आइपुग्न सिङ्गो न्युजरुम, मार्केटिङ, प्रशासनलगायत विभागमा रहेका सहकर्मी साथीहरू, हाम्रा विज्ञापनदाता, शुभेच्छुक संस्थाहरूको ठूलो हात छ । छैटौँ वार्षिकोत्सवको उपलक्ष्यमा हामी सबैप्रति हृदयदेखि नै कृतज्ञता प्रकट गर्दछौँ । साथै, यो सहकार्यले निरन्तरता पाइरहोस् भन्ने चाहन्छौँ । सँगसँगै, हामी रचनात्मक आलोचनाको पनि स्वागत गर्दछौँ । किनभने, सचेत र इमानदार वर्गको उत्प्रेरणा एवं सुझाव र सल्लाहले असल पत्रकारिता प्रवर्द्धन गर्न मद्दत गर्नेछ भन्ने हाम्रो विश्वास छ । सबैभन्दा ठूलो आमपाठक वर्गको विश्वास जितेर नै शिलापत्रले एउटा व्यावसायिक सञ्चारगृहका रूपमा आफूलाई उभ्याउन चाहन्छ ।

फेरि पनि हामीप्रति सद्भाव राख्ने सबैप्रति हार्दिक धन्यवाद तथा शुभेच्छा प्रकट गर्दछौँ ।