किन बढ्यो वीर अस्पतालमा बेथिति ? (भिडियो रिपोर्ट)

A+ A A-

सितापाइलाकी लक्ष्मी भुसाल मुटुमा समस्या देखिएपछि उपचारका लागि वीर अस्पताल पुगिन् । अस्पतालमा लामो लाइन थियो । उनी दूधेबालक घरमा छोडेर अस्पताल पुगेकी थिइन् । २ घण्टा लाइन बसेपछि बल्ल तीन दिनपछि जाँचको समय पाइन् । तीन दिनपछि चेकअपका लागि वीर अस्पताल पुगेकी उनले पुनः १ घण्टा लाइन बस्नुपर्‍यो ।

जुम्लाका बलबहादुर भण्डारीले आमालाई छातीमा समस्या देखिएपछि स्थानीय अस्पतालमा पुर्‍याए । स्थानीय अस्पतालले 'फोक्सोमा समस्या छ, काठमाडौंमा मात्र उपचार सम्भव छ' भन्यो । त्यसपछि पाँच दिनअघि मात्र बलबहादुरले आमालाई उपचार गराउन काठमाडौं लिएर आएका हुन् ।

आमालाई उपचारका निम्ति अस्पतालमा भर्ना गराउन मात्र होइन, छिनछिनमा आवश्यक पर्ने औषधि खरिद गर्नसमेत घण्टौँ लाइन बस्नुपर्ने हैरानी खेपिरहेको भण्डारी सुनाउँछन् । उनी भन्छन्, ‘हामीजस्ता सोझासिधा नागरिकले उपचार पाउन धेरै मुस्किल रहेछ काठमाडौंको वीर अस्पतालमा ।’

वीर अस्पताल नेपालको सबैभन्दा जेठाे अस्पताल हो । आजभन्दा करिब डेढ शताब्दीअघि तत्कालीन श्री ३ महाराजा वीर शमशेरको पहलमा सो अस्पतालको स्थापना भएको हो । विशेष गरी विपन्न एवं असहाय वर्गका लागि लक्षित गरेर १५ साउन १९४७ मा १५ वटा अन्तरङ्ग शय्यासहित वीर अस्पतालको स्थापना भएको हो ।

सबै जनताको स्वास्थ्य सेवामा पहुँच पुर्‍याउने लक्ष्य राखेर स्थापना भएको वीर अस्पतालमा अझै पनि सर्वसाधारणले उपचारका लागि आउँदा खेप्नुपर्ने सास्ती कम भएको छैन । अस्पतालमा स्वास्थ्यकर्मी तथा बेडको अभावमा बिरामीले समयमै उपचार पाएको अवस्था छैन ।

आपत्कालीन अप्रेसनसमेत समयमा सम्भव छैन । सामान्य अप्रेसनका लागि त ६ महिनासम्म बिरामीले पर्खनुपर्ने अवस्था छ । बिल तिर्न तथा औषधि खरिद गर्न मात्र पनि घण्टौँ लाइन बस्नुपर्ने अवस्था छ । बिरामी कुरुवाहरूका आफ्नै पीडा छन् । शौचालयसम्मको उचित व्यवस्था छैन । समयमा मर्मत हुन नसक्दा वीर अस्पतालका भेन्टिलेटरसहितका १९ उपकरण थन्किएर बसेका छन् ।

स्वास्थ्यकर्मीको पर्याप्त दरबन्दी हुन नसक्दा स्वास्थ्य उपचारका लागि देशका कुनाकाप्चा र विपन्न भेगबाट आएका बिरामीकाे बिचल्ली छ । तर, यी तमाम समस्या अस्पतालमा कार्यरत कर्मचारी तथा व्यवस्थापनका कारण नभएको अस्पतालका निमित्त निर्देशक डा. समाज गौतमको भनाइ छ ।

ओपीडीमा एउटै डाक्टरले ६० जनाभन्दा धेरै बिरामी हेरेर पनि त्यही डाक्टरले बिहान गएर राउन्ड लिनुपर्ने, त्यही डाक्टरले अप्रेसन पनि गर्नुपर्ने, त्यही डाक्टरले इमर्जेन्सी पनि हेर्नुपर्ने बाध्यता रहेकाले यो अवस्था सिर्जना भएको उनको भनाइ छ ।

भौतिक संरचनाका विषयमा आर्थिक समस्याका कारण व्यवस्थापनले चाहेर पनि काम गर्न नसकेको गुनासो गौतम पोख्छन् । स्वास्थ्य मन्त्रालयमा पटकपटक व्यवस्थापनले समस्या पुर्‍याए पनि सम्बोधन हुन नसकेकाले वीर अस्पताल विद्यमान अवस्था रहेको गौतम बताउँछन् ।

गौतमका अनुसार, वीर अस्पतालको यो बेथितिको मुख्य दोष राजनीतिक दल, तिनको नेतृत्व र अस्थिर सरकारलाई जान्छ । वीर अस्पताललाई साँच्चै सुधार्ने हो भने, मुलुकमा स्थिर सरकार निर्माण हुनु आवश्यक देखिन्छ । साथै, राज्यका सबै स्टेकहोल्डरबाट वीर अस्पताल सुधारका लागि बलियो कमिटमेन्ट आवश्यक देखिन्छ ।

भिडियाे हेर्नुहाेस् :

प्रकाशित मिति: मंगलबार, माघ २३, २०८० २०:१८