रुसविरुद्ध युद्ध जारी रहँदै किन जेलेन्स्की युक्रेनका सेना प्रमुख बर्खास्त गर्न चाहन्छन् ?

रुसविरुद्ध युद्ध जारी रहँदै किन जेलेन्स्की युक्रेनका सेना प्रमुख बर्खास्त गर्न चाहन्छन् ?

A+ A A-

रुसविरुद्ध झण्डै दुई वर्षयता युद्ध लडिरहेको युक्रेनबारे एकपछि अर्को अप्रत्याशित खबरहरू बाहिरिन थालेका छन् ।

केही समयअगाडि अमेरिकी सिनेटमा बाइडेन सरकारले युक्रेनको सहयोगका लागि प्रस्ताव गरेको ६१ अर्ब अमेरिकी डलरको प्रस्ताव साथै युरोपेली युनियनमा प्रस्तावित ५४ अर्ब अमेरिकी डलरको सहयोग अस्वीकृति भएको थियो । त्यसबेला जेलेन्स्कीले पश्चिमा राष्ट्रबाट हतियार प्राप्त नगरे युद्ध हार्ने बताएका थिए ।

यस्तै, गत महिना मात्र युक्रेनमा हतियार खरिदमा भ्रष्टाचार भएको विषय बाहिरिएको थियो । सेनाभित्रकै मान्छेहरू र रक्षा मन्त्रालयका अधिकारीहरूले मिलेर हतियार खरिदमा भ्रष्टाचार गरेको पुष्टि भएको थियो । यस्ता विषयले रुसविरुद्धको युद्धमा युक्रेनलाई पक्कै असर गर्ने नै छ ।

यसबीचमा यतिबेला युक्रेनका राष्ट्रपति भोलोदिमिर जेलेन्स्कीले आफूले युक्रेनका सेना प्रमुखलाई बर्खास्त गर्ने मनसाय बनाएको बताउन थालेका छन् । जेलेन्स्कीले युक्रेनका सेना प्रमुख जनरल भ्यालेरी जालुज्नीलाई बर्खास्त गर्ने मनसाय बनाएको आरएआई टेलिभिजनसँग बताएको एपीले जनाएको छ ।

जानकारहरूका अनुसार रुसविरुद्ध युद्ध चलिरहँदै देशको सेना प्रमुख परिवर्तन गर्नुले युक्रेनलाई रुसविरुद्धको युद्धमा कमजोर बनाउन सक्छ । युक्रेनमा पश्चिमा राष्ट्रहरू पनि जेलेन्स्कीको यो निर्णयबाट अचम्मित छन् । तर, जेलेन्स्कीका अनुसार युक्रेनी सेनामा पुन:स्थापना र नयाँ सुरुवातको आवश्यकता छ ।

देशको बाटो तय गर्ने फराकिलो मुद्दाको एक हिस्साको रूपमा सेना प्रमुखलाई परिवर्तन गर्न चाहेको उनी बताउँछन् । उनले सकारात्मक ऊर्जाका लागि देशका हरेक क्षेत्रमा परिवर्तन अपरिहार्य रहेको बताए । युक्रेनमा सेना प्रमुख जनरल जालुज्नीलाई सबैले रुचाएका छन् । जेलेन्स्कीका यस्ता टिप्पणीहरूले युक्रेनमा हंगामा नै मच्चिएको छ । यस कार्यले रुस खुसी हुने देखिन्छ ।

युक्रेनी र पश्चिमी मिडिया रिपोर्टहरूका अनुसार जेलेन्स्कीले गत हप्ता नै जालुज्नीलाई राजीनामा दिन प्रस्ताव गरेका थिए तर उनले राजीनामा दिन अस्वीकार गरे । युक्रेनको ग्रीष्मकालीन जवाफी हमला असफल भएपछि जेलेन्स्की निरास छन् र उनी र सेना प्रमुख जालुज्नीबीचको तनाव बढ्दै गएको छ ।

जानकारका अनुसार यतिबेला युक्रेनले हतियार र कर्मचारीको अभावको सामना गरिरहेको छ ।

प्रकाशित मिति: सोमबार, माघ २२, २०८० १७:५७