प्रदेश ५ सडक मानवमुक्त हुँदै, १८ जनाको उद्धार

A+ A A-

प्रदेश ५ लाई सडक मानवमुक्त बनाउने अभियान शुरू भएको छ । सोमबार पाल्पाको तिनाउ गाउँपालिका– ३ स्थित सिद्धबाबा मन्दिर र रूपन्देहीको तल्लो सिद्धबाबा मन्दिर परिसरमा भिक्षा निषेधित क्षेत्र घोषणा गरी प्रदेशलाई सडक मानवमुक्त बनाउने अभियान सुरूवात भएको हो ।

उक्त अभियानको सामाजिक विकासमन्त्री सुदर्शन बरालले सुरूवात गरेका हुन् । अभियान सुरू भएसँगै अब प्रदेशका कुनै पनि धार्मिक स्थलदेखि सडक पेटीमा बसेर कुनै पनि व्यक्तिले भिक्षा माग्न नपाइने भएको छ ।

‘हामीले नीति तथा कार्यक्रममै राखेर यो अभियानको सुरूवात गरेका थियौं, तर आज कार्यान्वयन पनि सँगै भएको छ,’ अभियानको सुरूवात गर्दै सामाजिक विकास मन्त्री बरालले भने । घरबारविहीन बसाहारा, परित्यक्त, असहाय तथा जीवन जोखिममा रहेकाहरूलाई हामी तयार छौं’ भन्ने नाराका साथ अभियान सुरू गरिएको हो ।

पहिलो चरणमा मठ मन्दिरमा बसेर भिक्षा माग्नेलाई हटाइने प्रदेश सरकारको योजनाअनुरूप सिद्धबाबा मन्दिरबाट त्यसको सुरूवात गरिएको मन्त्री बरालले भने । सोमबार सिद्धबाबा मन्दिरमा भिक्षा मागेर खाने १८ जना सन्त महन्तहरूलाई बुटवलस्थित मानव सेवा आश्रममा लगिएको छ ।

प्रदेश नम्बर ५ का विभिन्न धार्मिक मठ मन्दिर, शहरका पाटीपौवा, पार्कहरूमा भिक्षा मागेर जीवन गुजारा गर्ने धेरै मानिसहरू छन् । ‘बाध्यताका आधारमा सडक र मन्दिरमा बसेर माग्नेलाई हामी आश्रममा राख्छौं,’ मन्त्री बरालले भने, ‘प्रदेश सरकारको संकल्प छ । हामी सडकमा बसेर माग्न दिने छैनौं । काम गर्न सक्नेलाई काम गर्ने वातावरण मिलाउँछौं । बिरामीलाई उपचार गर्छौं । व्यवस्थित आश्रममा राख्छौं ।’

मानवमुक्त बनाउन ५० लाख बजेट

प्रदेश सरकारले सडक मानवमुक्त बनाउने अभियान सञ्चालका लागि यस वर्षको बजेटमा ५० लाख रुपैयाँ विनियोजन गरेको छ । बुटवलस्थित मानव सेवा आश्रमको कार्यालयसँग सहकार्य गरेर प्रदेशभरका सडकमा रहेका व्यक्तिहरूलाई मानवसेवा आश्रममा राख्ने र पुनस्र्थापन गर्ने कार्यक्रम रहेको छ ।

प्रदेशले सडक मानवमुक्त बनाउन मानव सेवा आश्रमको सहकार्यमा बुटवलका लागि २५ र नेपालगञ्जका लागि २५ लाख गरी ५० लाख रुपैयाँ विनियोजन गरेको छ । त्यस्तै, सरकारले अनाथ र ज्येष्ठ नागरिकका लागि रूपन्देहीकै सैनामैना नगरपालिकामा ज्येष्ठ नागरिक केन्द्र निर्माण गर्न १ करोड रुपैयाँ विनियोजन गरेको छ ।

तीन प्रकारका भिक्षा माग्ने छन् धार्मिक स्थलमा

सिद्धबाबा मन्दिर विकास समितिका अध्यक्ष दलबहादुर गुरुङले मन्दिरमा तीन प्रकारका भिक्षा माग्नेहरू रहेको बताए । प्रदेश सरकारले थालेको यो अभियानप्रति धन्यवाद दिँदै गुरुङले भने, ‘कोही पूर्ण रूपले धर्मलाई आत्मसात् गरेका छन्, कुनै भिक्षु बेसहारा र घरविहीन छन् भने कुनै भिक्षु दिनभर माग्ने र साँझ जलपान गर्ने खालका छन् ।’

अध्यक्ष गुरुङले धार्मिक रूपमै पूर्ण रूपमा लागेर भिक्षु बनेकालाई मन्दिर व्यवस्थापन समिति आफैंले व्यवस्थापन गर्ने र बाँकीलाई आश्रममा वा पुनस्र्थापन गर्नुको विकल्प नभएको बताए । मानव सेवा आश्रमका अध्यक्ष रामजी अधिकारीले आश्रममा बेसहारालाई राख्न आनाकानी वा हिचकिचावट नहुने बताए ।

प्रकाशित मिति: सोमबार, असोज २७, २०७६ १२:५४