... अनि नारायण गोपालले सरोज खनाललाई ‘गेट आउट' भने (भिडियाे)

A+ A A-

अभिनेता सरोज खनालले आफूलाई स्वरसम्राट नारायण गोपालले घरबाट निकालेको घटना आफ्नो जीवनमा ठूलो पाठ बनेको बताएका छन् । उनले आफू गीतसंगीतको ठूलो फ्यान भएको बताउँदै नारायण गोपाल, बच्चु कैलाशका गीतदेखि भारतीय गायकहरू किशोर कुमारका गीतहरू धेरै सुनेको बताए ।

शिलापत्रको कार्यक्रम 'यादहरूको दस्तखत'मा कुराकानी गर्दै उनले भने, ‘नारायण दाइले मलाई चिन्ने त ठाउँ नै थिएन । उहाँ चर्चित हुनुहुन्थ्यो, मैले भर्खरै अभिनय सुरु गरेको थिएँ । 'भिडदेखि भिडसम्म' आएपछि उहाँले रमण घिमिरे दाइलाई 'यो केटा को रहेछ, निकै राम्रो अभिनय गर्दोरहेछ, मलाई एकपटक भेट्न ल्याऊ त' भन्नुभएछ । त्यसबेला रमण दाइले नारायण दाइले भेट्न बोलाउनुभएको छ भन्दा मलाई कतिबेला रात बितेर भोलि हुन्छ र भेट्न जाऊँजस्तो भएको थियो । उहाँले आफ्नै हातले खसीको मासु पकाउनुभएको रहेछ ।'

'गएपछि उहाँहरू पिउन थाल्नुभयो । म नखाने भएकाले खाँदिनँ भनेँ । दुई–तीन प्याक तानेपछि मैले अब चैँ भन्दा हुन्छ होला भनेर मलाई तपाईंको एउटा गीत लाइभ सुन्न मन छ भनेको थिएँ । उहाँ फर्किएर 'भाइ, तिम्रो एक्टिङको पनि म फ्यान हो, तिमीलाई यहाँ एक्टिङ गर भनेँ मैले ? म गीत गाउँदिनँ, मेरो गीत सुन्ने हो भने क्यासेट किन्ने अनि सुन्ने, नाउ यु गेट आउट’ भन्नुभयो ।’

नारायण गोपालले बाहिर निकालिदिएपछि आफू त्यहाँबाट गएको तर यो घटनाले मैले किन गीत गाउन भनेँ भनेर जिन्दगीभर पछुतो भएको खनाल बताउँछन् । उनी भन्छन्, ‘यसबाट मैले ठूलो पाठ सिकेँ र कुनै ठाउँमा बोलाएर कसैले एक्टिङ गर्नुहोस्, फिल्मको डायलग बोल्नुहोस् भन्दा म गर्दिनँ ।’

उनले आफूले एसएलसी परीक्षा चल्दाचल्दै अभिताभ बच्चनको फिल्म 'बेमिसाल' हलमै गएर हेरेको र पछि अभिताभ नेपालमा सुटिङका क्रममा आउँदाको क्रेज देखेर अभिनयतिर लागेको पनि स्मरण गरे । आफू हेर्दा सोझो लागे पनि निकै अप्ठ्यारो मान्छे रहेको र घर झगडा गरेर निस्किँदा महिनौँ सुकुलमा सुतेको समेत बताए । उनले आफूले धेरै काम गर्दा पनि नाटककर्मी सुनिल पोखरेलले धेरै समयसम्म ‘स्याबास’ पनि नभनेको र सिचुवाको असल मानिस जीवनको ‘टर्निङ प्वाइन्ट’ बनेको बताएका छन् ।

प्रस्तुत छ, कलाकार सरोज खनालसँग उनको बाल्यकाल, जीवनका संघर्षपूर्ण क्षण, कलाकारितालगायतका विभिन्न पाटामा यादहरूको दस्तखतका लागि कुमार नगरकोटीले गरेको कुराकानी :