आफू मरेको हल्ला फैलाउने पुनम पाण्डेलाई जेल हाल्ने तयारी

A+ A A-

आफू मरेको हल्ला फैलाउने भारतीय मोडल तथा अभिनेत्री पुनम पाण्डेलाई जेल हाल्ने तयारी भएको छ । केही दिनअगाडि पाण्डेको इन्स्टाग्राम एकाउन्टबाट उनको सर्वाइकिल क्यान्सरका कारण मृत्यु भएको जानकारी दिइएको थियो ।

तर, त्यसको भोलिपल्टै पाण्डेले एक भिडियो सार्वजनिक गर्दै आफू जीवितै रहेको बताइन् । साथै, उनले सर्वाइकल क्यान्सरबारे जनचेतना जगाउन आफू मरेको हल्ला फैलाएको बताइन् । उनले माफी पनि मागेकी छिन् ।

पुनम पाण्डेले यसअघि पनि पब्लिसिटी स्टन्टका लागि विभिन्न हर्कत गरेकी थिइन् । उनले भारतीय क्रिकेट टिमले विश्वकप जिते आफू नाङ्गै दौडिने बताएकी थिइन् । २०११ मा भारतले विश्वकप जित्यो तर, उनी नाङ्गै दौडिनन् । बरु त्यो सबै पब्लिसिटी स्टन्टका लागि थियो भनिन् । योपटक त उनले संवेदनशील विषयमा भद्दा मजाक गरिन् । उनको मृत्युमा दुःख मनाएकाहरू पनि अहिले उनीसँग निकै रिसाएका छन् ।

उनमाथि कानुनी कारबाहीको माग भइरहेका बेला भारतको मुम्बईस्थित अँधेरीको एक पुलिस चौकामा मुद्दा दायर गरिएको छ । एक वकिल अली काशिफ खान देशमुखले पाण्डे र उनकी म्यानेजर रिचा शर्माविरुद्ध एफआईआर दायर गरेका छन् । उनले क्यान्सरजस्तो रोगको नाम लिएर धोका दिएको कसुरमा कारबाही गर्न भन्दै एफआईआर दर्ता गराएको भारतीय सञ्चार माध्यमहरूले जनाएका छन् । तर, प्रहरीले सो एफआईआर दर्ता भने गरिसकेको छैन । यदि सो आरोपमा एफआईआर दर्ता भएर पाण्डेलाई सजाय भयो भने आजीवन कारावास हुन सक्नेसमेत बताइएको छ ।

प्रकाशित मिति: आइतबार, माघ २१, २०८० १६:२२