कांग्रेस नेताहरूले किन चलाए प्रचण्ड सरकार विस्थापनको चर्चा ?

A+ A A-

गत वर्ष मंसिरमा चुनाव हुँदा त्यो बेलाको गठबन्धनले झण्डै बहुमत ल्याए पनि १० पुसमा नयाँ सरकार भने तत्कालीन गठबन्धन विघटन भएर नयाँ गठबन्धन अस्तित्वमा आयो । प्रधानमन्त्री माओवादी केन्द्रका अध्यक्ष पुष्पकमल दाहाल प्रचण्ड बने ।

प्रचण्डले गठबन्धन गरेर सँगै चुनाव लडेका नेपाली कांग्रेस, नेकपा एकीकृत समाजवादीलगायतलाई त्यागेर त्यतिबेला एमालेलगायतलाई साथमा लिनुको मुख्य कारण थियो गठबन्धनमा पालोपालो सरकारमा कसले पहिला नेतृत्व गर्ने भन्ने विषय । खासगरी कांग्रेस र माओवादीले पहिला नेतृत्व आफूले गर्नुपर्ने अडान कसेपछि गत वर्ष १० पुसमा पुरानो गठबन्धन भत्केर नयाँ गठबन्धन बनेको थियो ।

तर, यो गठबन्धन फागुनसम्म आइपुग्दा टुट्यो र पुरानै गठबन्धन अस्तित्वमा आयो । त्यतिबेला प्रचण्ड, कांग्रेस सभापति शेरबहादुर देउवा र नेकपा एसका अध्यक्ष माधवकुमार नेपालले पालैपालो सरकारको नेतृत्व गर्ने भद्र सहमति गरेको नेताहरूले दाबी गर्दै आएका छन् ।

यसरी भएको सहमतिअनुसार प्रचण्ड नेतृत्वको सरकारको आयु अझै करिब एक वर्ष बाँकी छ । तर, सत्ता साझेदार दल नेपाली कांग्रेसका केही नेताहरू भने प्रचण्ड सरकार असफल भएको भन्दै यसलाई विस्थापित गर्नुपर्छ भन्ने आवाज चर्कोगरी उठाउन थालेका छन् । पछिल्लोपटक सभापति देउवासँग समदूरीमा रहेका नेता विमलेन्द्र निधि र डा शशांक कोइरालाले मुखै फोरेर प्रचण्डलाई हटाएर माधव नेपाललाई प्रधानमन्त्री बनाउनुपर्ने अभिव्यक्ति सार्वजनिक रूपमा दिएका छन् ।

बिहीबार नवलपरासीमा नेता कोइरालाले दलहरूबीच भएको पूर्वसहतिअनुसार माधव नेपाललाई प्रधानमन्त्री बनाउनुपर्ने बताएका छन् । उनले प्रचण्ड सरकार असफल भइसकेको भन्दै पूर्वसहमतिअनुसार माधव नेपाललाई प्रधानमन्त्री बनाउनुपर्ने र सहमति सबैले मान्नुपर्ने बताएका छन् । बुधबार निधिले पनि यही भाषा दाङमा बोलेका थिए ।

सहमतिअनुसारै पनि प्रचण्ड सरकारको आयु करिब एक वर्ष बाँकी रहेका बेला यसरी कांग्रेसभित्र सरकार परिवर्तनको कुरा चर्को रूपमा उठ्न थालेपछि सरकारको नेतृत्व गरिरहेको नेकपा माओवादी केन्द्र भने यसलाई प्रमुख प्रतिपक्षी दल नेकपा एमालेको रणनीतिले काम गरेको भन्ने बुझाइमा छ । एमाले अध्यक्ष केपी शर्मा ओलीले वर्तमान गठबन्धन सरकार २०८४ सम्म पर्खन नसकिने बताउँदै आएका छन् । कांग्रेसभित्रको संस्थापनइतर समूहलाई एमालेले उचालेको बुझाइ माओवादी केन्द्रको छ ।

माओवादी केन्द्रका सचिव लिलामणि पोखरेल प्रचण्ड सरकार परिवर्तन गर्ने कुरा कांग्रेस नेताहरूबाट आउनु नयाँ नभएको बताउँछन् । उनले भने, ‘शेखर–गगनले पहिलादेखि नै यस्तो भनिरहेका छन् । अहिले नयाँ कुरा आएको होइन, त्यसमा एमालेले ८४ सम्म यो सरकार कुर्न सकिँदैन भनेकाले उसले उचालेको हुन सक्छ । तर, अहिले नै प्रधानमन्त्रीले राजीनामा दिने कुरा छैन ।’

त्यसो त अहिले निधि र कोइरालाले माधव नेपालको नाम लिनुमा दक्षिण लाइनका रूपमा पनि विश्लेषण भइरहेको छ । एमाले र भारतले प्रचण्डलाई मन नपराएकाले माहौल बनाउन यस्तो धारणा सार्वजनिक भइरहेको विश्लेषण भइरहेको छ ।

तर, स्वयम् माधव नेपालले भने यो विषयमा खुलेर बोलेका छैनन् । बरु उनले सत्ता गबठन्धन पाँच बर्ष सम्म चल्ने दाबी गरेका छन् । बिहीबार जनकपुरमा सञ्चारकर्मीसँग कुरा गर्दै उनले भने, ‘प्रचण्डजी पछि को प्रधानमन्त्री हुने विषय अहिले गौण रहनदिनुस्, अहिले प्रचण्डजीकाे नेतृत्वको सरकारले कतिपय राम्रो कदम चालेको छ । राम्रो काम गर्छु भनेर भनिरहेकाले पनि अहिले उहाँको सरकारलाई सहयोग गर्नुपर्छ ।’

नेकपा एसका प्रवक्ता जगन्नाथ खतिवडा भने मौका आए आफ्नो पार्टी सरकारको नेतृत्व गर्न तयार रहेको बताउँछन् । उनले भने, ‘मौका आए सरकारको नेतृत्व गर्न तयार छौँ । तर गठबन्धनभित्र यो विषयले प्रवेश पाएको छैन । प्रचण्डजीको समय अझै एक वर्ष बाँकी छ । प्रचण्ड नै तयार भए हामी पनि तयार छौँ ।’

कांग्रेसभित्र शेखर कोइराला समूह, विमलेन्द्र निधि र डा. शशांक कोइरालाले प्रचण्ड सरकार असफल भएको बताए पनि सभापति शेरबहादुर देउवा र उनीनिकट नेताहरूले भने यो विषयमा केही बोलेका छैनन् । जबसम्म देउवा तयार हुँदैनन्, त्यो बेलासम्म कांग्रेसभित्र कुनै निर्णय हुन सक्ने अवस्था पनि छैन । जसले गर्दा प्रचण्ड एक किसिमले ढुक्कै देखिन्छन् ।

प्रकाशित मिति: बिहीबार, माघ १८, २०८० १७:३१