कांग्रेस नेतालाई जनताकाे गुनासाे– सरकारले मल दिँदैन, भारतबाट ल्याए मुद्दा लगाउँछ

कांग्रेस नेतालाई जनताकाे गुनासाे– सरकारले मल दिँदैन, भारतबाट ल्याए मुद्दा लगाउँछ

A+ A A-

'खेतमा बाली लगाउने बेला भयो । सरकारले समयमै किसानलाई मलखाद दिन सक्दैन । पारि भारतबाट ल्याउनुपर्छ । साइकलमा हालेर मलखाद ल्याउँदा पक्राउ गरेर मुद्दा लगाइदिन्छ । कत्रो अन्याय ?', समुदायमा कांग्रेस अभियानका लागि केन्द्रीय प्रतिनिधि भएर बाँके जिल्लामा खटिएका कांग्रेस केन्द्रीय सदस्य गुरु बरालले जनताबाट प्राप्त गरेकाे गुनासाे शिलापत्रलाई सुनाए ।

मध्यम वर्गका व्यवसायीहरूले ८ प्रतिशत ब्याजमा लिएको कर्जाको ब्याज बढेर १६ प्रतिशत पुगेको गुनासो पनि कांग्रेस नेताहरूलाई सुनाएका छन् । जिल्लाको विकट गाउँहरूमा शिक्षाकाे अवस्था भद्रगोल छ । ‘शिक्षकहरू राजनीतिक नेतृत्व र पालिका प्रमुखहरूको वरिपरि घुमिरहेको छन् । ११ बजे विद्यालय गयो । विद्यार्थी कता छन्, थाहा छैन । सामाजिक सञ्जालमा भुल्ने र १ बजे विद्यालय छाड्ने रहेछन् । नेतागिरी गर्न विद्यालयमा पढाउन छाडेर हिँडेको पाइयो,’ बरालले भने ।

नेपाली कांग्रेसको ‘समुदायमा कांग्रेस’ अभियान जारी छ । वन, कृषि, स्वास्थ्य, शिक्षा रोजगारीलगायतका विषयमा विभिन्न समुदायसँग जोडिएका गुनासाहरू कांग्रेसका प्रतिनिधिहरूसँग जनताले गरिरहेका छन् । सरकारको डेलिभरीमा समस्या रहेको, जनप्रतिनिधिहरूसँग जनताको गुनासो रहेको पनि सुनिएको नेताहरू बताउँछन् ।

अभियानका क्रममा कांग्रेस सहमहामन्त्री भीष्मराज आङ्देम्बे बझाङमा छन् । बझाङबाट उनी बाजुरा प्रस्थान गर्नेछन् । ‘शिक्षा, स्वास्थ्य र रोजगारी विषयमा चासो राख्नुभएको छ ।जनप्रतिनिधिहरूसँग पनि गुनासो रहेको पाएँ । जनप्रतिनिधिहरूको गुनासो असमान बजेटमा रहेको पाइएको छ । एउटै पालिकामा कुनै वडामा ३ लाख र कुनै वडामा ६ लाख बजेट गएको छ । न्यून बजेटले के हुने भन्ने गुनासो छ,’ उनले शिलापत्रसँग भने ।

जनप्रतिनिधिहरूबाट वडा तहलाई पालिका प्रमुख र त्यसमाथिका व्यक्तिहरूले ध्यान दिन नसकेको गुनासो आएको उनले बताए । यस्तै अवस्था पूर्वी नेपालमा पनि छ । ‘तराईका जिल्लाहरूमा हात्ती आतंक र हुलाकी राजमार्गको समस्या छ । पहाडी क्षेत्रमा रोजगार, कृषि बजारको समस्या मुख्य रूपमा आएको छ,’ कांग्रेस कोशी प्रदेश सभापति उद्धव थापाले शिलापत्रसँग भने ।

मध्य नेपालमा पनि उस्तै गुनासाहरू सुनिएका छन् । रामेछाप जिल्लामा केन्द्रीय प्रतिनिधि भएर खटिएकी केन्द्रीय सदस्य सुजाता परियारले रोजगार, शिक्षा र स्वास्थ्य क्षेत्रसँग सम्बन्धित गुनासो बढी आएको बताइन् । ‘युवाहरूलाई रोजगारी दिनुपर्छ भन्ने आवाज मुख्य रूपमा आएको छ । गाउँघरमा युवा नभेटिने अवस्था छ । कृषि, विकास निर्माणको कुरा आएको छ । गाउँको विद्यालयमा कक्षा १२ र क्याम्पस हुनुपर्ने माग जनताले गरेका छन्,’ उनले शिलापत्रसँग भनिन् । उनलाई पार्टीसँग सम्बन्धित गुनासो पनि आएको छ । ‘सबैको चिन्ता पार्टी एकताबद्ध हुनुपर्छ भन्ने आएको छ,’ उनले सुनाइन् ।

सबै नेताहरू जिम्मेवारी लिएर समुदायमा पुग्दा महामन्त्री गगन थापा भने पार्टीको अभियानसँगै आफ्नो कार्यक्रम ‘संवाद यात्रा’मा छन् । ‘माथि फर्केको पार्टीलाई तल फर्काउने काम गर्ने हो । सबैभन्दा ठूलो दल हौँ । व्यवस्था ल्याउने आन्दोलनकर्ता मात्र नभएर सेवक र संरक्षक पनि हो,’ थापा भन्छन् ।

जनता के कारणले निराश छन् भनेर सोध्न खटिएकाे उनले बताए । ‘हामीले २०८४ को कुरा गर्न पाउँदैनौँ । सरकारमा छौँ ८१, ८२, ८३ मा गर्ने हो । जनता निराश छन् । के कारण हो, गएर सोध्नुपर्‍यो । एकपटक भेट्नुपर्‍यो भनेर आएका हौँ,’ उनले भने । झापामा किसानसँग कुरा गर्दा जंगली हात्तीको समस्या सुनाएको उनले बताए ।

‘हुलाकी राजमार्गमा पुल बनेको छैन । यही पाराले हेर्ने हो भने १० वर्ष लाग्छ', उनले भने । सिरहा र धनुषामा किसानले सिँचाइको समस्या रहेको गुनासो महामन्त्री थापालाई सुनाएका छन् । गाउँघरमा बाटो पुग्नु मात्र विकास नभएको कांग्रेसका संस्थापक बीपी कोइरालाको भनाइ उनले यात्राको क्रममा स्मरण गरे । ‘बाटोले मान्छे ल्याउँछ । जाने बेलामा कतार मलेसियामा युवक लान्छ । काठमाडौं जाने दूरी छोट्याइदिएको छ । खेतीबाट भएको आम्दानी दोब्बर बनाउन सक्ने हो भने मान्छे अडिन सक्छ,’ उनले भने ।

महामन्त्री थापाले बजेटको असमान वितरण रोक्ने प्रतिबद्धता जनाए । ‘फागुन १५ गते बजेटको सिद्धान्त आउँदै छ । सांसदबाट सरकारलाई निर्देशन दिनुपर्छ । योपटक प्रधानमन्त्रीले आफ्नो निर्वाचन क्षेत्रमा बजेट लिएर जाने, भूतपूर्व अर्थमन्त्रीले लिएर जाने, अर्थमन्त्रीले मन लागेको बाटोमा बजेट लाने कुरा हुन नदिने हो । न्यायोचित बजेट सुनिश्चित हुने कुरामा म लड्छु,’ उनले भने ।

तराईका केही जिल्लाहरूमा दुर्व्यसनीका कारण एक पुस्ता खेर जाने अवस्था रहेको उनले बताए । ‘दुर्व्यसनीकाे बिगबिगी रहेछ । एक पुस्ता खेर जाने अवस्था छ,’ उनले भने, ‘केही कुरा संसदमा लान्छौँ । सरकारमा लानुपर्ने कुरा सरकारमा लैजान्छौँ ।’

देश बिग्रियो भन्ने छुट कांग्रेसलाई नभएको उनले बताए । ‘जिम्मा हामीले लिएका छौँ । अरूले जे भन्न पनि पाइन्छ । देश राम्रो थियो, अहिले भत्कियो भन्न पाउँछ ? जहिलेजहिले साथ माग्यौँ, साथ दिनुभयो । अहिले हामी चुनाव जितेर देश चलाउँछौँ । दु:ख पन्छाएर पाइँदैन । देशभर जाऔँ एकपटक डुलौँ । उहाँहरूको कुरा सुनौँ,’ उनले भने । २०७९ को साउन पहिलो साता सांसदले नागरिकता ऐन २०६३ पारित गर्दा काठमाडौंमा जनताले भोट नदिने बताएको थापाले स्मरण गरे । ‘नागरिकताको कानुन बनाउँदै गर्दा काठमाडौंमा भोट नै दिन्नौँ भने । नागरिकताको विषय टुंगियो भन्ने लागेको थियो तर होइन रहेछ,’ उनले भने ।

प्रकाशित मिति: बिहीबार, माघ १८, २०८० १५:१६