क–कसले पाउँछन् स्टार्टअप कर्जा, कसरी दिने आवेदन ?

A+ A A-

स्टार्टअप उद्यम कर्जा सञ्चालन कार्यविधि, २०८० स्वीकृत भएको छ । उद्योगमन्त्री रमेश रिजालले कार्यविधि स्वीकृत गरेका हुन् ।

सरकारले यस वर्षको बजेटमार्फत २५ करोड रुपैयाँ स्टार्टअप कर्जाका लागि विनियोजन गरेको छ । स्टार्टअप उद्यम कर्जा सञ्चालन कार्यविधि स्वीकृत भएसँगै सरकारले बजेटमा विनियोजन गरेको कर्जा उद्यमीले पाउने ढोका खुलेको छ । कार्यविधिअनुसार उद्यमीले बढीमा २५ लाखसम्म कर्जा लिन सक्नेछन् ।

कस्ता उद्यमले कर्जा पाउँछन् ?

याे सुविधान पाउन कुनै वस्तु वा सेवाको उत्पादन, सञ्चालन वा वितरण प्रक्रियामा नयाँ प्रविधि तथा सिर्जनशील सोचको प्रयोग भएको उद्यम हुनुपर्नेछ । कुल चुक्ता पुँजी २ लाख रुपैयाँदेखि १० लाखसम्म भएको हुनुपर्नेछ । उद्यमको कुल कारोबार वार्षिक दुई करोड रुपैयाँभन्दा बढी नभएको हुनुपर्नेछ ।

स्थिर पुँजी घरजग्गाको मूल्यबाहेक दुई करोड रुपैयाँभन्दा बढी नभएको हुनुपर्नेछ ।

०००

कस्ता उद्यमले कर्जा पाउने छैनन् ?

– प्रचलित कानुनबमोजिम दर्ता नभएको उद्यमले यो कर्जा पाउने छैन ।
– वस्तु वा सेवा विदेशबाट आयात गरी बिक्रीवितरण गर्नेले पाउने छैनन् ।
– प्रचलित कानुनबमोजिम कालो सूचीमा परेको उद्यमले कर्जा पाउने छैन ।
– होल्डिङ तथा लगानी कम्पनीको रूपमा औद्योगिक व्यवसाय ऐन, २०७६ बमोजिम दर्ता भएको उद्यमले पाउने छैन ।

कुनकुन क्षेत्रका स्टार्टअप उद्यमले कर्जा पाउनेछन् ?

– कृषि तथा पशुपन्छीसँग सम्बन्धित ।
– वन पैदावरसँग सम्बन्धित ।
– पर्यटन प्रवर्द्धन तथा मनोरञ्जन र अतिथि सत्कारसँग सम्बन्धित ।
– विज्ञान, प्रविधि, सूचना तथा सञ्चारसँग सम्बन्धित ।
– मानव स्वास्थ्य सेवासँग सम्बन्धित ।
– शिक्षा तथा शिक्षण सिकाइसँग सम्बन्धित ।
– सहज र सुरक्षित यातायात तथा पारवहन सेवासँग सम्बन्धित ।
– अटोमोबाइलसँग सम्बन्धित ।
– परम्परागत प्रविधि, उत्पादन र सेवा प्रवाहको प्रक्रिया सुधारसँग सम्बन्धित ।
– खाना तथा खनिज अनुसन्धान र विकाससँग सम्बन्धित ।
– घरायसी दैनिक जीवनयापनसँग सम्बन्धित ।
– खाद्य उत्पादन तथा प्रशोधनसँग सम्बन्धित ।
– फोहोरमैला व्यवस्थापन तथा वातावरणसँग सम्बन्धित ।
– विपद् व्यवस्थापनसँग सम्बन्धित ।
– वैकल्पिक तथा नवीकरणीय ऊर्जासँग सम्बन्धित ।
– जलवायु परिवर्तन न्यूनीकरणसँग सम्बन्धित ।

०००

प्रस्ताव कसरी पेस गर्ने ?

– कर्जा लिन चाहने उद्यमीले निर्धारित अवधिभित्र तोकिएको ढाँचामा प्रतिष्ठानसमक्ष परियोजना प्रस्ताव पेस गर्नुपर्नेछ, अनलाइनमार्फत पनि प्रस्ताव पेस गर्न सक्ने व्यवस्था मिलाउन सकिने भनिएको छ ।

– एक उद्यमीले एकभन्दा धेरै प्रस्ताव पेस गर्न पाइने छैन ।

– पेस भएको प्रस्तावमा उल्लेख भएको विवरण तथा संलग्न कागजात ठीक साँचो हो भनी सम्बन्धित प्रस्तावकले स्वःघोषणा गर्नुपर्नेछ । स्वःघोषणा झुटो रहेको पुष्टि भए त्यस्तो प्रस्ताव जुनसुकै बखत रद्द हुनेछ ।

प्रस्ताव मूल्याङ्कन तथा सिफारिस कसरी हुन्छ ?

– स्टार्टअप उद्यमका लागि तोकिएका मापदण्ड पूरा गरेको ।
– परियोजनाबाट उत्पादित वस्तु वा सेवा बिक्रीको बजारको सम्भावना ।
– परियोजनामा प्रयोग हुने कच्चा पदार्थको स्रोत ।
– परियोजनाका लागि अवलम्बन गरिएको उपाय ।
– व्यावसायिक प्रस्तावको प्रस्तुतीकरण ।
– क्रेडिट अप्राइजल आदिका आधारमा प्रस्ताव मूल्याङ्कन गरिने प्रस्तावनामा उल्लेख छ ।

०००

– यो कर्जा अवधि पाँच वर्षको हुनेछ । कर्जा लिएको ढिलोमा दोस्रो वर्षबाट सावाँ र ब्याजबापतको रकम फिर्ता गर्न प्रारम्भ गनुपर्नेछ ।

– ५ लाखसम्मको कर्जा एक किस्तामा, १५ लाखसम्मको कर्जा दुई किस्तामा र सोभन्दा माथिको हकमा तीन किस्तामा कर्जा उपलब्ध हुनेछ ।

– कर्जाको वार्षिक ब्याजदर ३ प्रतिशत हुनेछ । कर्जा प्रवाह गर्दा स्वीकृत व्यवसाय वा परियोजना नै धितोको रूपमा रहनेछ तर परियोजनाको बीमा भने उद्यमी आफैँले गर्नुपर्नेछ ।

हेर्नुहाेस् कार्यविधि :

प्रकाशित मिति: बुधबार, माघ १७, २०८० ०७:४०