जीबी राईकाे स्वर्णलक्ष्मी सहकारीले दिएकाे पीडा : जीवनभरको कमाइ झ्वाम (भिडियाे)

जीबी राईकाे स्वर्णलक्ष्मी सहकारीले दिएकाे पीडा : जीवनभरको कमाइ झ्वाम (भिडियाे)

A+ A A-

२०५५ सालको कुरा हो, काठमाडौंको नागार्जुन नगरपालिका स्युचाटारका कृष्णबहादुर खत्रीसँग त्यसबेला २ लाख ५० हजार रुपैयाँ थियो । त्यसबेला बैंकले बचत रकमको २ प्रतिशतमात्र ब्याज दिन्थ्यो । त्यति नै बेला कालीमाटीमा रहेको स्वर्णलक्ष्मी बहुउद्देश्यीय सहकारी संस्थाले ६ प्रतिशत ब्याज दिने थाहा पाए ।

बैंकको भन्दा धेरै ब्याज पाइने भएपछि उनले स्वर्णलक्ष्मीमा रकम जम्मा गरे । सहकारीले तीन–तीन महिनामा ब्याज दिने व्यवस्था गरेको थियो । उनले कहिले ६ महिनामा त कहिले वर्षदिनमा सहकारीबाट ब्याज बुझ्ने गरेका थिए । भाउजू बितेर खर्च आवश्यक परेपछि गत वर्ष असारमा नवीकरण पनि गर्छु र ब्याज पनि लिन्छु भनेर सहकारी पुगे । चैतदेखि सहकारीहरू आर्थिक संकटमा रहेकाले स्वर्णलक्ष्मी बहुउद्देश्यीय सहकारीका व्यवस्थापकले उनलाई अर्को महिना आउन भने । व्यवस्थापकले भनेअनुसार अर्को महिना कृष्ण सहकारीमा पुगे । तर, त्यतिबेलासम्म सहकारीका व्यवस्थापक नै भागिसकेका थिए ।

415988046_876720647573945_4131461517848800243_n1706534568.jpg

कालीमाटीकै स्थानीय देवनारायण मानन्धरले पनि स्वर्णलक्ष्मी बहुउद्देश्यीय सहकारी संस्थामा २०७५ सालमा १० लाख रुपैयाँ जम्मा गरेका थिए । कृष्णले जस्तै उनले पनि समयसमयमै ब्याज बुझिरहेका थिए । २०७५ साल चैतदेखि उनले पनि न ब्याज पाए, न सावाँ नै । अहिले त सहकारी सञ्चालक तथा व्यवस्थापक नै भागेको भन्ने थाहा पाए ।

त्यस्तै, स्वयम्भू ठूलो भर्‍याङका स्थानीय राजनप्रसाद अधिकारी त आफू स्वर्णलक्ष्मी सहकारीबाट दोहोरो पीडित बनेको बताउँछन् । परिवारका सबै सदस्यले करिब ५० लाख रुपैयाँ सहकारीमा जम्मा गरेका थिए ।

करिब ७ वर्षअघिदेखि स्वयम्भूको उनकै घरमा स्वर्णलक्ष्मीले आफ्नो शाखा विस्तार गरेको थियो । उक्त शाखामा पछिल्लो एक वर्षदेखि ताल्चा लागेको छ । व्यवस्थापक नवीन अछामीले चासो नदिएपछि सहकारी सञ्चालक समितिका व्यक्तिलाई सम्पर्क गर्न कोसिस गरे । तर, कोहीसँग सम्पर्क भएन । त्यसपछि के गर्ने भनेर वडा कार्यालयमा पुगे । वडा कार्यालयमा उनलाई 'यो अप्ठ्यारो अवस्थामा विवेक पुर्‍याउनुपर्छ, त्यसैले केही समय धैर्य गर्नुहोस्' भनियो ।

नैकापका केशवराज पाण्डे करिब २५ वर्ष सरकारी सेवा गरेपछि अवकाश लिए । अवकाशपश्चात् उपदान, बीमा, नागरिक लगानी कोष, सञ्चय कोषबाट प्राप्त जीवनभरिको कमाइ करिब ८६ लाख सहकारीले झ्वाम पारेसँगै अहिले बिहानबेलुका हातमुख जोर्न नै मुस्किल भएको बताउँछन् ।

नन्दु तण्डुकार र उनको परिवारले पनि केही समयअघि यसै सहकारीमा करिब ५० लाख रुपैयाँ जम्मा गरेका थिए । अहिले सहकारी सञ्चालकहरू फरार भएसँगै उनी छाँगाबाट खसेजस्तै बने ।

सामान्य मकै पोल्ने महिलादेखि कर्मचारी, व्यवसायी तथा डाक्टरसम्मले स्वर्णलक्ष्मीलाई विश्वास गरेर रकम जम्मा गरेका थिए । यस सहकारीमा १० हजार देखि ७ करोडसम्म रकम मुद्दतीमा राख्ने करिब ३ हजार जना छन् । ती बचतकर्ताहरूको बचत रकम हिनामिना गरेको स्वर्णलक्ष्मी बहुउद्देश्यीय सहकारीका अध्यक्ष जीबी राईसहित सञ्चालक समितिका सबै सदस्य फरार छन् । याे सहकारीकाे रकम पनि राईले अपचलन गरेर ग्यालेक्सी टेलिभिजनमा लगानी गरेकाे बताइन्छ । त्यतिबेला अहिले राष्ट्रिय स्वतन्त्र पार्टीका सभापति रहेका रवि लामिछाने ग्यालेक्सी टिभिका प्रबन्ध निर्देशक थिए ।

अहिले पीडितहरूले नन्दु तण्डुकारको संयोजकत्वमा सहकारीपीडित संघर्ष समिति बनाएका छन् । डुबेको रकम उठ्ने आसमा उनीहरूले सरोकारवालाको ढोका ढकढक्याउनेदेखि बलबुताले भ्याएसम्म सबै किसिमका प्रयास गरिरहेका छन् । तर, सञ्चालक सदस्य कोही पनि अगाडि आउने आँट गरेका छैनन् । न त सम्बन्धित निकायले स्पष्ट रूपमा केही भन्छ । त्यस्तो अवस्थामा पीडितहरू आफ्नो बचत रकम फिर्ता आउने हो कि होइन, अन्योलमा छन् ।

प्रकाशित मिति: सोमबार, माघ १५, २०८० २०:२४