दोस्रो पुस्ता तयार नहुँदा एकीकृत समाजवादीमा नेतृत्व ‘होल्ड’

A+ A A-

एकीकृत समाजवादीले विधान संशोधन गरेर आगामी जेठमा हुने १०औँ महाधिवेशनको जग तयार पारेको छ । केन्द्रीय समितिमा ४० प्रतिशत युवाको प्रतिनिधित्व अनिवार्य गरेको पार्टीले नेतृत्वमा ७० वर्षे उमेरहद हटाएको छ भने २० प्रतिशत सदस्य ४० वर्षमुनिका रहनेछन् ।

तत्कालीन एमालेबाट फुटेर ९ भदौ २०७८ मा नयाँ दलका रुपमा एकीकृत समाजवादीले प्रमाणपत्र पाएको थियो । तत्कालीन एमालेमा रहँदा उमेरहद तोक्नुपर्ने बहसमा उत्रेका नेताहरूले अहिले एकीकृत समाजवादीको नेतृत्व गरिरहेका छन् ।

ठूलो दलमा रहँदा उमेरहद लगाउने नेताहरूले अहिले उमेरसीमा हटाएका छन् । पार्टी संक्रमणकालीन अवस्थामा रहेकाले उमेरहद हटाइएको नेताहरूको तर्क छ । एमालेमा रहँदा उमेरहद तोक्नुपर्छ भन्नेहरू नयाँ पार्टीमा आएर पनि पुरानै शैली पछ्याएका छन् ।

‘त्यतिबेला एमालेमा धेरै कार्यकर्ता थिए । नयाँ पुस्ताले पार्टी धान्छन् भन्ने थियो । अहिले हाम्रो पार्टी साँघुरो भएकाले पाका नेताहरूले पनि काम गर्नुपर्छ,’ पार्टी उपमहासचिव तथा प्रवक्ता जगन्नाथ खतिवडाले शिलापत्रसँग भने ।

२०७९ सालको संघीय चुनाव गठबन्धन गरेर लडेको पार्टीले २०८४ सालको चुनाव एक्लै लड्न सक्षम बन्ने संगठन निर्माण गर्ने बताएकाे छ । ‘महाधिवेशनपछिको पार्टी आगामी सम्पूर्ण चुनौती सामना गर्न सक्ने, ८४ सालको चुनाव एक्लै लड्न सक्षम बन्ने हो,’ प्रवक्ता खतिवडाले भने ।

विधान संशोधनपछि पार्टी तल्लो तहमा शक्ति आर्जन गर्ने किसिमको हुने नेता मेटमणि चौधरी बताउँछन् । ‘आफूलाई नसुधारीकन नेता भइँदैन भन्ने मनोविज्ञान बन्छ र जनतासम्म पार्टी बन्छ,’ चौधरीले शिलापत्रसँग भने । विद्रोहको महाधिवेशन भएकाले आगामी महाधिवेशनसम्म उमेरहद नहट्ने उनले बताए । 'विद्रोहको महाधिवेशन भएकाले उमेरहद योपटक हट्दैन । केन्द्रीय सदस्यमा ४० प्रतिशत युवापुस्ता आउँछ,’ उनले भने ।

आगामी महाधिवेशनबाट अध्यक्षमा माधव नेपाल र महासचिवमा घनश्याम भुसाललाई दोहोर्‍याउने तयारी छ । अर्को पुस्ता तयार नभएकाले एकीकृत समाजवादीले नेतृत्व होल्ड गरेको छ । ‘सिनियर लिडरहरू नै हामीभन्दा सक्रिय हुनुहुन्छ । उहाँहरूको उमेर ७० वर्षभन्दा माथि छ । पार्टी सङ्क्रमणकालीन अवस्थामा छ । विशेष अवस्थामा उमेरहद हटाउनु वाञ्छनीय देखिन्छ,’ प्रवक्ता खतिवडाले भने ।

नेता शेरबहादुर कुँवर उमेरहद लगाउनुपर्छ भन्ने मतको विपक्षमा छन् । ‘हौसिएर उमेरहद लगाउने, फेरि आफू अनुकूल हटाउने प्रवृत्ति राम्रो होइन । कहिलेकाहीँ ७५ वर्षका व्यक्तिले २० वर्षको भन्दा सक्रियता देखाउन सक्छ ।'

प्रयोगबाट हेर्दा उमेरहद हटाउँदा पार्टी सशक्त बन्छ भनेर हटाइएको उनले बताए । ‘सङ्गठनमा संख्या जति धेरै भयो, त्यति फाइदा हुँदोरहेछ । अछाम जिल्ला कमिटीमा २०४७ सालमा जिल्ला सदस्य बन्दा आठौँ सदस्य म बनेको थिएँ । त्यो प्रभावकारी थियो । अहिले हामीले एकै जिल्लामा २ सयको कमिटी बनाएका छौँ । त्यहाँ बैठक बस्न कोरम पुग्दैन । भद्दा संगठन बनाएर मात्र हुँदैन,’ उनले भने । विधान संशोधनपछि पार्टीमा ऊर्जा आउने उनले बताए ।

विद्रोहपछि विधान विधिअनुसार पार्टी चल्ने र निर्वाचित भएपछि कार्यकर्ताबाट अनुमोदित भएपछि थप क्रियाशील हुने उनी बताउँछन् । युवापुस्तालाई अघिल्लो पुस्ताले पार्टी बनाए हामीले अझै ठूलो बनाउनुपर्ने उत्साह थपिने कुँवरले बताए ।

पार्टीमा युवाको प्रतिनिधित्व बढाउने निर्णयले युवानेताहरू खुसी छन् । ‘अब पुस्तान्तरणको लडाइँ सुरु भयो भन्ने दिशानिर्देश दोस्रो जनआन्दोलनले गरेको छ । हामीले युवालाई वैधानिक रूपमा नेतृत्वमा स्थापित गराउनुपर्छ,’ केन्द्रीय सदस्य सुदेश पराजुलीले शिलापत्रसँग भने ।

नेतृत्व ‘होल्ड’, माधव र घनश्याम दोहोरिने

घर हजुरबुबानाति मिलेर बन्ने नेताहरूको तर्क छ । नेतृत्व गर्न तयार रहे पनि पार्टीभित्र स्वीकार नगरेको नेताहरूको गुनासो पार्टीभित्र छ । ५० उमेरको हाराहारीका नेताहरूलाई नपत्याउने गरिएको नेताहरू बताउँछन् । कति समय जेल बसेको, कुन कुन आन्दोलनको नेतृत्व गरेको भनेर हेरिने हुनाले नयाँ पुस्ताको आकर्षण बन्न नसकेको नेताहरू बताउँछन् ।

‘समयले हामीलाई नेतृत्वको उमेरहद नतोक्ने ठाउँमा पुर्‍यायो होला । जिम्मेवारी त दिनुपर्छ । जिम्मेवारी नै नदिने अनि युवा आलाकाँचा छन् भनेर प्रश्न गर्न हुँदैन । शीर्ष नेताहरू पनि हाम्रा उमेरमा महासचिव र मन्त्री बनेका हुन् । आफू बन्न बनाइएको परिपाटी हो,’ पराजुलीले भने, ‘उमेरहदको बहस एमालेमा पनि थियो, यता पनि छ ।’

दोस्रो पुस्ता तयार नभएको र विद्रोहको औचित्य पुष्टि गर्ने वैधानिक जग बसाल्ने भएकाले अहिले नेतृत्व परिवर्तन नभएर निरन्तरता दिइने नेताहरू बताउँछन् । ‘अहिले अध्यक्षमा माधव नेपालज्यूको विकल्प पार्टीमा छैन,’ नेता चौधरीले भने । उनी मात्र होइन, पार्टीमा महासचिवमा घनश्याम भुसाललाई दोहोर्‍याउने र भुसाल अध्यक्ष बन्दा उपमहासचिवहरू डा विजय पौडेल, खतिवडा र गंगालाल तुलाधरबीच महासचिवमा प्रतिस्पर्धा गर्ने मोडलमा लागेको नेताहरू बताउँछन् ।

प्रकाशित मिति: सोमबार, माघ १५, २०८० १९:००