एकीकृत समाजवादीको लक्ष्य : चुस्त संगठन, मस्त मत

A+ A A-

२०७९ सालको संघीय चुनावमा एकीकृत समाजवादी राष्ट्रिय दल नबनेपछि अब संगठन चुस्त बनाउने तयारीमा पार्टी लागेको छ, जसका लागि विधान संशोधन गरेर संगठन सानो बनाउने प्रयास जारी दोस्रो केन्द्रीय परिषद् बैठकबाट हुनेछ ।

पछिल्लो संघीय चुनावमा पार्टीका केन्द्रीय सदस्य नै भोट हाल्न नगएको रिपोर्ट पार्टी मुख्यालय आलोकनगरमा पुगेको थियो । राष्ट्रिय पार्टी बन्न रोकिनुमा प्रत्यक्षमा आफ्ना उम्मेदवार नभएपछि समानुपातिकमा भोट हाल्न केन्द्रीय तहका नेताहरू नै नगएकाे विषयलाई कारण मानिएकाे छ ।

अध्यक्ष माधव नेपालले ‘तथ्यहरू पनि संकलन भइरहेका छन्, पार्टीलाई धोका दिएको प्रमाणित भए अप्ठेरो पर्ला । समयमै आत्मसमीक्षा गर्नुहोस्’ भनेका थिए । उनले संकलन गरेका तथ्यहरू सार्वजनिक गरेका छैनन् । संगठन भद्दा भए र त्यसले काम गर्न नसकेपछि अब चुस्त संगठन बनाउन पार्टीको ध्यान छ । चुस्त संगठनबाट आगामी चुनाव लगायतका संगठनको शक्ति देखिने गरी काम एकीकृत समाजवादीले गर्दै छ । ‘ठूलो संगठन बनाएर पनि काम गर्न नहुने रहेछ । अब चलायमान र चुस्त संगठन बनाउने प्रयास गर्दै छौँ,’ एकीकृत समाजवादीका उपमहासचिव तथा प्रवक्ता जगन्नाथ खतिवडाले शिलापत्रसँग भने ।

अहिले पार्टीमा पोलिटब्युरो, केन्द्रीय कमिटी, स्थायी कमिटी केन्द्रीय परिषद्‌लगायतका तहमा एकतिहाइ संख्या घटाउने प्रयास विधान संशोधनमार्फत हुनेछ । विधान संशोधनका लागि परिषद् बैठकमा १० वटा समिति बनाएर छलफल गरिरहेको छ । समूहका छलफल भोलीको बैठकमा संशोधनसहित पारित हुनेछ ।

हाल भएको २४ पदाधिकारीसहित ३५१ सदस्यीय रहेको केन्द्रीय कमिटीलाई १७५ बनाइने प्रस्ताव छ, जसमा ११९ पूर्ण र वैकल्पिक १६ जना केन्द्रीय सदस्य रहनेछन् । कुल सङ्ख्याको एकतिहाइ महिला राख्ने प्रस्ताव छ ।

त्यस्तै, ४५ सदस्यीय स्थायी कमिटी र ११५ सदस्यीय पोलिटब्युरो रहने व्यवस्थामा पनि परिवर्तन गरिनेछ, जसमा पदाधिकारीसहित १९ सदस्यीय स्थायी कमिटी र ५७ सदस्यीय पोलिटब्युरो रहने प्रस्ताव गरिएको छ । सो प्रस्तावमाथि समितिको सुझावमा संयोजन गर्न उपाध्यक्ष तथा संगठन विभाग प्रमुख बेदुराम भुसालको संयोजकत्वमा सुझाव संयोजन समिति गठन भरिएको छ । ३ जेठ देखि ७ गतेसम्म पार्टीको महाधिवेशन गर्दै छ । महाधिवेशनअघि विधान संशोधन हुनेछ ।

विधान संसोधनपछि पार्टीमा पदधारी नेताहरू कम हुनेछन् । स्थापनाकालदेखि वरिष्ठ नेतालाई पदैपद दिएको पार्टीले नयाँ आउने पुस्तालाई संख्या घटाएर निःशेध गर्न खोजेको हो भन्ने प्रश्नमा प्रवक्ता खतिवडाले भने, ‘सबैलाई एकै विधान लागू हुने हो । आमकार्यकर्ताले रुचाए पदमा पुग्छन्, नरुचाए पुग्दैनन् । संख्या घटाउँदैमा आउन निषेध भन्ने होइन ।’

अध्यक्ष नेपालले के भने ?

परिषद् बैठकमा अध्यक्ष माधव नेपालले मन्तव्य राख्दै राष्ट्रियसभा सदस्य निर्वाचनको परिणामले सत्ता गठबन्धनमा उलटफेर हुने अवस्था नरहेको बताएका छन् । उनले यही माघ ११ गते भएको निर्वाचनमा कोशी प्रदेशमा ‘भोट क्रसिङ’ हुनु हरेक दलभित्र छलफलको विषय भएको बताए ।

‘नेकपा (एमाले)ले गठबन्धनमा रहेका दलहरूसँग सहकार्य गर्ने र गठबन्धनलाई कमजोर बनाउने नीति लिएको थियो । राष्ट्रियसभाको उक्त निर्वाचनमा गठबन्धनसँग सहकार्यका लागि एमालेले वार्ता, छलफल र संवाद गरे पनि सहमति हुन सकेन । सत्ता गठबन्धनका दलहरू एकजुट भएर उभिन पुगेपछि नेकपा (एमाले)को प्रयत्न असफल भयो,' उनले भने ।

राप्रपासँग गठबन्धन गरेर एमाले शून्य हुनबाट जोगिएको उनले बताए । मुलुकमा सरकार स्थिरताको प्रश्न उठाइएको उनको भनाइ छ । यसको मुख्य कारण गणतन्त्रवादी र गणतन्त्रविरोधी, परिवर्तनकारी र प्रतिगमनकारी, अग्रगामी र पश्चगामी, सङ्घीयता पक्षधर र संघीयताविरोधी, धर्मनिरपेक्षतावादी र धर्मसापेक्षतावादी आदि विभिन्न चरित्रका राजनीतिक शक्तिको संसदभित्रको उपस्थिति भएको उनले बताएका छन् ।

प्रकाशित मिति: आइतबार, माघ १४, २०८० २०:१३