स्वदेशमै बसेर केही गर्छु भन्ने सञ्जयको हुटहुटीले स्थापित 'लालपुर्जा' (भिडियाे)

स्वदेशमै बसेर केही गर्छु भन्ने सञ्जयको हुटहुटीले स्थापित 'लालपुर्जा' (भिडियाे)

A+ A A-

लालपुर्जा भनेको के हो ? तपाईंलाई लाग्ला– घरजग्गा तथा अपार्टमेन्ट खरिद गर्दा प्रमाणका रूपमा लिइने आधिकारिक जग्गाधनी पुर्जा नै लालपुर्जा हो । तर, हामीले कुरा गर्न खोजेको लालपुर्जा अलिक फरक छ ।

यो लालपुर्जाले तपाईं घरजग्गा, अपार्टपेन्टलगायत आवास खरिद गर्न खोज्दै हुनुहुन्छ भने तपाईंले चाहेजस्तो भूमि तथा आवास खोजिदिन्छ, बिक्री गर्न खोज्दै हुनुहुन्छ भने बिक्री पनि गरिदिन्छ । त्यति मात्र नभएर ऋण व्यवस्थापनदेखि खरिदबिक्रीका सबै वैधानिक प्रक्रियामा तपाईंलाई लालपुर्जाले सहजीकरण गरिदिन्छ ।

लालपुर्जाको सुरुवात कसरी भयो ?

धादिङको फुलखर्कमा जन्मिएका सञ्जय नेपालले सानो छँदा इन्जिनिर बन्ने सपना देखेका थिए । गाउँकै स्थानीय विद्यालयबाट एसएलसी पास गरेपछि उनी उच्च शिक्षाका लागि काठमाडौं प्रवेश गरे । उनले गोल्डेन गेट कलेजबाट व्यवस्थापन संकायमा प्लस टु र न्याथम कलेजबाट ट्राभल एन्ड टुरिज्ममा स्नातक गरे ।

स्नातक अध्ययनकै क्रममा उनले फोटोग्राफी, ट्राभल एन्ड टुरिज्म, कन्सल्टेन्सी, आईटीलगायत विभिन्न क्षेत्रमा जोडिएर काम गरे । सञ्जय पढाइलाई भन्दा धेरै कामलाई महत्त्व दिन्थे । कलेज कम जान्थे । काममै उनी धेरैजसो समय बिताउँथे । कलेजका साथीभन्दा कामका विषयमा भेटिएकाहरूसँग उनको बढी सङ्गत हुन्थ्यो । व्यवसायसम्बन्धी तथा व्यवसायीले लेखेका पुस्तक भेटेसम्म पढ्थे ।

स्नातक पढाइकै क्रममा उनका कलेजका धेरैजसो साथीहरू विदेशिए । नेपालका युवाहरू विदेशिने ट्रेन्ड देखेर उनी त्यसको विकल्पबारे सोच्न थाले । त्यति नै बेला उनले कम्तीमा आफू स्वदेशमै बसेर केही न केही गर्छु भन्ने अठोट गरे ।

नेपालमा बसेर फरक ढंगले के गर्न सकिन्छ भनेर सोचिरहेका उनले बजारको आवश्यकता केलाउँदै गए । त्यसरी बजारको आवश्यकताका बारेमा केलाउँदै जाँदा घरजग्गा व्यवसायमा उनको सोच पुग्यो ।

घरजग्गाको कारोबारमा बिचौलियाका रूपमा खरिदकर्ता तथा बिक्रेताको बीचमा रहेर जो कसैले काम गर्न र त्यसरी काम गर्ने व्यक्तिलाई 'दलाल' भनेर नकारात्मक परिचयको बिल्ला झुण्ड्याइदिने सामाजिक परिपाटीको विकल्प बन्ने सोच उनमा आयो ।

त्यसपछि उनले अन्तर्राष्ट्रिय अभ्यासहरूका बारेमा अध्ययन गर्न थाले । अध्ययन गर्दै जाँदा उनले विदेशमा व्यक्तिगत रूपमा कारोबार गर्न त्यहाँको कानुनले नै रोक लगाएको थाहा पाए । हरेकजसो विकसित देशमा अनिवार्य रूपमा लाइसेन्स लिएका एजेन्टमध्येबाट मात्र घरजग्गा खरिद/बिक्री हुने गरेको उनले पत्ता लगाए ।

त्यसपछि नेपालमा घरजग्गा व्यवसायको क्षेत्रमा रहेको विकृतिलाई हटाउँदै यसलाई मर्यादित र व्यवस्थित व्यवसायको रूपमा लिन सक्ने अवस्था बनाउन सकिन्छ कि भन्ने सोच उनमा आयो । घरजग्गा व्यवसायमा खरिद र बिक्रीकर्ताको बीच रहेर सहजकर्ता (बिचौलिया) को परम्परागत कार्यशैलीलाई आधुनिक रूप दिने सोचले उनले दुई वर्षअघि 'लालपुर्जा' नाम राखेर कम्पनी नै स्थापना गरे ।

काम त सुरु गरे पनि व्यावहारिक ज्ञानको अभावका कारण सुरुवाती दिनमा धेरै अप्ठ्याराहरू व्यहोर्नुपरेको सञ्जय बताउँछन् । बैना भनेको के हो ? कसरी हुन्छ ? मोही भनेको के हो ? रोक्का भनेको के हो ? एकलौटी भनेको छ, उतापट्टि गुठीको जग्गा भनेको छ । यस्तैयस्तै कुराहरू बुझ्नलाई नै करिब एक वर्ष लागेको उनको अनुभव छ ।

सामाजिक सञ्जालका सबैजसो माध्यमबाट प्रचारप्रसार गर्न थाले । आफ्नो घरजग्गा बिक्री गर्न चाहने तथा घरजग्गा खरिद गर्न खोजी गरिरहेका व्यक्तिहरू बिस्तारै लालपुर्जासँग जोडिन थाले । दुई वर्षको अन्तरालमा लालपुर्जाले सयभन्दा धेरै घरजग्गा खरिद तथा बिक्री गराउन सफल भएको सञ्जय बताउँछन् ।

सञ्जयका अनुसार लालपुर्जाले घरजग्गा खरिद तथा बिक्री गरिदिएपश्चात् निश्चित कमिसन लिने गर्छ । सामान्यतः हाउजिङमा तथा घरमा ३ प्रतिशत कमिसन लालपुर्जाले निर्धारण गरेको छ ।

हाल काठमाडौंको सोह्रखुट्टेमा मुख्य कार्यालय रहेको लालपुर्जामा ५ हजार बिक्रेता तथा करिब ४ हजार सेवाग्राही जोडिएका छन् । यस कम्पनीका पोखरा, इटहरी, नेपालगञ्जमा शाखा कार्यालय विस्तार भएका छन् । चितवन, बुटवललगायत स्थानमा पनि शाखा खोल्ने तयारी भइरहेको छ । लालपुर्जाले ब्रोकरको कामसँगै ब्रोकर ट्रेनिङ पनि दिन थालेको छ । ललपुर्जाका माध्यमले १६ जनाले रोजगार पाएका छन् ।

सरकारले नीतिगत रूपमै स्पष्ट व्यवस्था गरिदिए यो व्यवसाय अझै मर्यादित र व्यवस्थित हुन सक्ने र यसकै माध्यमले धेरै युवाका लागि स्वदेशमै रोजगार सिर्जना हुन सक्ने सञ्जयको भनाइ छ ।

भिडियाे हेर्नुहाेस् :