आसाममा मिलन नेवारलाई जब बुबाले भने– पुर्खाको भूमिमा गएर खुबी देखाऊ (भिडियाेसहित)

आसाममा मिलन नेवारलाई जब बुबाले भने– पुर्खाको भूमिमा गएर खुबी देखाऊ (भिडियाेसहित)

A+ A A-

‘गाला रातै’, ‘फूलबुट्टे सारी’लगायत गीतबाट चर्चामा आएकी गायिका हुन् मिलन नेवार । हालै मात्र गायन रियालिटी शो ‘भ्वाइस अफ नेपाल’ को उपाधि विनोद राईले जितेपछि ३७ वर्षीया गायिका फेरि चर्चामा छिन् । विनोदले उनकै टिमबाट प्रतिस्पर्धा गरेका थिए ।

निकै अब्बल प्रतिस्पर्धीको कोचका रूपमा कुशल भूमिका निभाएकी मिलन आफैँमा प्रतिभाशाली गायिका हुन् । अहिलेसम्म उनले नेपाली, हिन्दीलगायत १२ भाषामा गीत गाएकी छन् । आफ्नो परिवारको गायन पृष्ठभूमिले आफूलाई यहाँसम्म आइपुग्न सघाउ पुगेको उनी बताउँछिन् ।

संखुवासभा खाँदबारीबाट उनका हजुरबा आसाम बसाइँ सरे । उनी उतै जन्मिएकी हुन् । मिलनकी ठूलीआमा डुकुना नेवार गायनकलाका कारण आसाममा चर्चित थिइन् । उनकै गायकी सुनेर मिलन कलिलै उमेरमा गायनतिर आकर्षित भइन् ।

‘मलाई बाल्यकालमा सङ्गीतमा तान्ने सबैभन्दा मुख्य चीज ठूलीआमाको आवाज नै थियो । सानैदेखि उहाँले गाएको सुनेँ । उहाँले अभ्यास गर्दा मेरो कानमा उहाँको आवाज गुञ्जिरहन्थ्यो । मलाई पनि उत्साह जाग्थ्यो । अनि ठूलीआमासँग सँगै गाउँथे । त्यसरी नै मेरो गायन सुरु भएको हो । उनी सुनाउँछिन् ।’

ठूलीआमा डुकुनाले गाएको तारा देवीको 'नौ सय खोला तरेर जाने', 'बिर्सने पो हौ कि मलाई' बोलका गीतले आफ्नो आङै सिरिङ्ग हुने गरेको उनी बताउँछिन् । उनका बुबा पनि कुशल ड्रमिस्ट थिए । उनी हार्मोनियम पनि बजाउँथे ।

सारेगमको साधारण ज्ञान उनले घरबाटै बुबाबाट सिकिन् । मिलन आठ वर्षकी थिइन । स्थानीय सङ्गीत विद्यालयमा उनलाई परिवारले भर्ना गरिदियो ।

त्यसबेला आसाममा डुकुना धेरै स्टेज कार्यक्रमहरू गर्थिन् । आठ वर्षको उमेरमै उनले मिलनलाई स्टेजमा गाउने मौका दिइन् । मिलनले त्यो अवसरलाई ठूलीआमा र दर्शकको विश्वासका रूपमा बदलिन् । त्यसपछि निरन्तर स्टेजमा गाउने अवसर पाइन् ।

१३ वर्षको उमेरदेखि त उनलाई आसाममा पैसा तिरेर नै गाउन बोलाउन थालियो । सङ्गीत सिक्ने क्रममै उनी गुवाहाटी पुगिन्, जहाँ गुरु बद्री विहासबाट राजस्थानी गीतसङ्गीतको शिक्षा र कलकत्ताका गुरु सुवास दासबाट तीन वर्ष शास्त्रीय सङ्गीतको शिक्षा लिइन् ।

सन् २००३ मा जयपुरमा भएको रष्ट्रिय सङ्गीत प्रतियोगितामा गजलतर्फ मिलन फस्ट रनर अप बनिन् । त्यो नै सङ्गीतमा उनको जीवनको टर्निङ पोइन्ट बन्यो । त्यसपश्चात् उनले धेरै कम्पनीमार्फत नेपाली र हिन्दी धेरै कलेक्सन एल्बममा गीत गाउने अवसर पाइन् । तब, धेरै माझ चिनिन थालिन् ।

१३ वर्षकै उमेरमा व्यावसायिक गायनमा आसाममा चिनिन थालेकी मिलनलाई बुबाले आफ्नो पुर्खाको भूमिमा गएर क्षमतालाई पस्किन सुझाए । बुबाको सुझावअनुसार सन् २००८ मा पहिलोपल्ट ‘मायाको इन्द्रेणी’ नामक एल्बमको काम लिएर मिलन काठमाडौं ओर्लिइन् । एक वर्षपछि ‘मायाको इन्द्रेणी’ रिलिज त भयो, तर चलेन । आसाममा एउटा साङ्गीतिक उचाइ बनाइसकेकी मिलन नेपालमा शून्यबाट सुरु गर्नुपर्दा धेरै गाह्रो भएको सुनाउँछिन् ।

त्यसको चार वर्षपछि 'गाला रातै' बोलको गीतले उनलाई निकै चर्चित बनायो । त्यसपछि भने उनको साङ्गीतिक यात्रामा खास प्रगति देखिएन । तर, आफूले हिम्मत नहारेको मिलन बताउँछिन् । केही वर्षपछि ‘फूलबुट्टे सारी’ बोलको गीतसँगै उनले सानदार पुनरागमन गरिन् । जुन गीतले आफूलाई नयाँ जन्म दिएको उनको भनाइ छ । त्यसपछि उनले पछाडि फेर्केर हेर्नुपरेको छैन ।

मिलन भन्छिन्, ‘मलाई सङ्गीतले नै खान पुगिरहेको छ । सङ्गीतबाट कमाएको पैसाले काठमाडौंमा घर जोड्न सफल भएकी छु । त्यसैले सङ्गीतमा साधनारत भएर निरन्तर लाग्ने हो भने यो क्षेत्रमा भविष्य राम्रै छ ।’