जसपा र जनमतको लफडा : जसपा भन्छ- गठबन्धन छाडे हुन्छ, जनमत भन्छ- निकाल्दिए हुन्छ

जसपा र जनमतको लफडा : जसपा भन्छ- गठबन्धन छाडे हुन्छ, जनमत भन्छ- निकाल्दिए हुन्छ

A+ A A-

मधेश प्रदेश सरकारको उपलब्धि सार्वजनिक कार्यक्रममा सत्ता साझेदार दल जनमत पार्टीले विरोध प्रदर्शन गर्‍यो । बुधबार मधेश प्रदेश सरकारले स्वाभिमान दिवस मनाउँदै मुख्यमन्त्री सरोज कुमार यादवले सरकारको एक वर्षे उपलब्धि सार्वजनिक गर्दा जनमतकाे विराेध खेप्नुपरेकाे छ ।

मुख्यमन्त्रीले उपलब्धि सार्वजनिक गर्दा जनमत पार्टीका नेता तथा कार्यकर्ताहरूले भने कार्यक्रम स्थलमै भ्रष्ट सरकार भन्दै नाराबाजी गरे । गत आर्थिक वर्षमा भएको अर्थ मन्त्रालयले गरेको अवैधानिक रकमान्तर छानबिन गरी दोषीलाई कारबाही गर्नुपर्नेसहितका माग गर्दै जनमतका कार्यकर्ताहरूले कार्यक्रम स्थलमै पुगेर नाराबाजी गरे । कार्यक्रममा एक्कासी विरोध प्रदर्शन गरेपछि आक्रोशित मुख्यमन्त्री यादवले भने, ‘सरकारमा पनि बस्ने र विरोध पनि गर्ने यो दोहरो चरित्र हो, यसको जवाफ जनमतबाट मन्त्री भएका साथीहरूले दिनुपर्छ ।’

मधेशमा जनमत र जसपाबीच वर्चस्वकाे प्रतिस्पर्धा छ । पुरानो शक्ति जसपा र नयाँ शक्ति जनमतबीचको प्रतिस्पर्धाले मधेशको राजनीति र संघको राजनीति अस्वस्थ बनेको छ । जनमत गठबन्धनमा रहेर गठबन्धन विरोधी कामहरू गरिरहेको छ । यस्तोमा आफूले अधिकार प्रयोग गरेको जनमतका नेताहरू बताउँछन् । जसपाले गठबन्धनमा रहेर गठबन्धनको विरोध गर्ने हो भने गठबन्धन छाड्न भनेकाे छ ।

मधेश प्रदेश सरकारमा मन्त्रालय फुटाएदेखि जनमतका नेताहरूले हेपिएको महसुस गरेका छन् । सातवटा पार्टी मिलेर बनेको मधेश प्रदेश सरकारमा मुख्यमन्त्री यादवले असोज १९ मा एउटा मन्त्रालय फुटाए । उनले मन्त्रालय फुटाउन जनमतले पाएको मन्त्रालय रोजे । जनमत पार्टी मधेश प्रदेश संसदीय दलका महेशप्रसाद यादवले सम्हालिरहेको शिक्षा तथा समाज कल्याण मन्त्रालयलाई फुटाएर खेलकुद तथा समाज कल्याण र शिक्षा तथा संस्कृति मन्त्रालय बनाइयो ।

जसपाकी सुरिताकुमारी साहलाई खेलकुद तथा समाज कल्याण मन्त्रालयको जिम्मेवारी दिइयो । ‘मधेशमा हाम्रो २ वटा मन्त्रालय रहे पनि काम गर्ने वातावरण नै दिइएको छैन । सरकारी सेवा सुविधा मात्र दिइएको छ । सबै कामहरू सामाजिक विकास मन्त्रालयबाट हुन्छ, शिक्षाको काम नै देखिएको छैन,’ जनमत पार्टीका अन्तरमन्त्रालय संयोजन समितिका संयोजक नेहालसिंह राजपुतले शिलापत्रसँग भने । मधेश प्रदेशमा जनमतबाट श्रम तथा यातायातमन्त्री चन्दन सिंह छन् ।

जनमतले जसपालाई पछ्याएको हो ?

पृथकतावादी आन्दोलनबाट मूलधारको राजनीतिमा आएका सीके राउतले बनाएकाे पार्टी हो जनमत । मधेश आन्दोलनबाट उदाएको पार्टी हो जसपा । जसपाले पश्चिम नेपालबाट (बाँके) मुश्लिम समुदायबाट मोहम्मद इस्तियाक राइलाई मन्त्रिपरिषद्मा पठाउँदा प्राथमिकता दिन्छ । त्यसैगरी जनमतले पश्चिम नेपाल (बर्दिया) बाट अब्दुल खानलाई मन्त्री बनाएर पठाएको थियो । मधेश प्रदेशमा यादव समुदायलाई जसपाले जोड दिँदै आएको छ । त्यसैगरी पार्टीभित्र वरिष्ठ नेताहरू हुँदाहुँदै जनमतले पनि महेश यादवलाई संसदीय दलको नेता बनाएको छ ।

जसपासँग जनमतलाई तुलना गर्न नमिल्ने जनमतका प्रवक्ता डा शरतसिंह यादव बताउँछन् । ‘यो गलत बुझाइ हो । जनमत भ्रष्टाचारको विरोध गरेर जन्मेको हो । शिक्षा, स्वास्थ्य, रोजगार आधारभूत कुराहरूमा हामी बढी ध्यान दिन्छौं । अल्पसंख्यक र परिवर्तन चाहने तप्काले जनमतलाई रुचाएका छन् । जसपा र हाम्रो कार्यशैली धेरै फरक छ । जसपासँग जनमतलाई लगेर दाँज्नु सुहाउने कुरा होइन,’ यादवले शिलापत्रसँग भने ।

जनमतले भनेको मधेशमा भ्रष्टाचारका मुद्दाहरु

जनमत भर्सेस जसपा

२०७९ मंसिरमा प्रदेशसभा चुनावपछि एमाले र जनमतको समर्थनमा यादव मुख्यमन्त्री बनेका थिए । सो बेलामा जनमतबाट वसन्त कुसवाह भूमि व्यवस्था तथा कृषि मन्त्री थिए । मुख्यमन्त्री यादव र मन्त्री कुसवाहाबीचको सम्बन्ध राम्रो रहेन ।

केन्द्रमा नयाँ गठबन्धन बनेपछि प्रदेश सरकारबाट एमाले बाहिरियो, कांग्रेस र एकीकृत समाजवादी सरकारमा सहभागी भए । त्यसपछि मुख्यमन्त्री यादवले भूमि व्यवस्थामन्त्रीमा एकीकृत समाजवादीका गोविन्दबहादुर न्यौपाने नियुक्त गरे । त्यतिबेला जनमत र जसपाको खटपट रोकियो । पछि कुसवाहको ठाउँमा जनमतले चन्दन सिंहलाई मन्त्री बनायो र उनले श्रम मन्त्रालयको जिम्मेवारी पाए ।

अघिल्लोपटक जसपाका लालबाबु राउत मुख्यमन्त्री हुँदा जनमतले भण्डाफोर अभियान चलाएको थियो ।

२०७९ मंसिरमा भएको प्रदेशसभा र प्रतिनिधिसभाको चुनावमा जसपा अध्यक्ष उपेन्द्र यादव जनमतका अध्यक्ष सीके राउत सप्तरी–२ भिडे । यादवले चुनाव हारे । उपराष्ट्रपतिको चुनावमामा गठबन्धनबाट जसपाका रामसहायप्रसाद यादव उपराष्ट्रपतिका उम्मेदवार बने । गठबन्धनमै रहेको जनमतले भने ममता झालाई उम्मेदवार बनाएर जसपालाई चुनौती दियो ।

उपराष्ट्रपति बनेपछि यादवको चुनाव क्षेत्र बारा–२ को उपचुनावमा जसपा र जनमत आमनेसामने भए । गठबन्धनबाट जसपा अध्यक्ष यादव उम्मेदवार बने । गठबन्धनमै रहेको जनमतले भने शिवचन्द्रप्रसाद कुसवाहालाई माओवादीबाट ल्याएर उम्मेदवार बनायो । यसपटक जसपा अध्यक्ष यादव संसद् प्रवेश गरे । अहिले भने आगामी माघ ११ गते हुने राष्ट्रियसभा चुनावमा मधेश प्रदेश र लुम्बिनी प्रदेशमा जनमतले आफ्नो उम्मेदवार खडा गरेको छ । मधेशमा गठबन्धनको तर्फबाट जसपाले उम्मेदवार उठाएको छ । जनमतले मधेश प्रदेशमा रामशंकर महासेठ र लुम्बिनी प्रदेशमा बालगोविन्द चौधरी थारुलाई उम्मेदवार बनाएको छ ।

जसपा भन्छ- गठबन्धन छाडे हुन्छ

मधेशमाको हाबी हुने भन्ने प्रतिस्पर्धाले जसपा र जनमतबीच विवाद देखिन्छ । त्यसमा जनमतका कार्यहरू गठबन्धनको निर्णयविपरीत छ । गठबन्धनमा रहेर विरोधी काम गर्नुभन्दा गठबन्धन छाड्न जसपाको सुझाव छ ।

‘जसपामात्र होइन उहाँहरू सिंगो सरकार र गठबन्धनको विरुद्धमा हुनुहुन्छ । श्रीमान् श्रीमतीमा पनि यसरी झगडा हुन थाल्यो भने छुट्टाछुट्टै बस्न थाल्छ । छुट्टै बसे भइहाल्यो नि । बस्ने सँगै तर नम्स नमान्ने हुन्छ ? आफैँले गरेको निर्णय विपरीतमा उहाँहरू हुनुहुन्छ । मन्त्रिपरिषद्बाट निर्णय हुँदा उहाँहरू त्यहाँ हुनुहुन्थ्यो,’ जसपाका प्रवक्ता मनिस सुमनले शिलापत्रसँग भने ।

जनमत भन्छ- निकालिदिए हुन्छ

सरकारमा रहे पनि नराम्रा कामको विरोध गर्ने जनमतले जनाएको छ । वर्तमान गठबन्धन सरकारी गठबन्धन रहेको प्रवक्ता डा शरदसिंह यादव बताउँछन् । ‘हामीले खुलेर विरोध गरेका हौं । गठबन्धनबाट निकाल्दिए हुन्छ । यो सरकार सञ्चालनको गठबन्धन हो । चुनावी गठबन्धन होइन । हामी कुनै पार्टीसँग गठबन्धन गरेर एकीकरण गरेर चुनाव लड्दैनाैँ । उहाँहरूजस्तो पुरानो ढर्राले कसरी हुन्छ सत्तामा बसिराख्ने, गठबन्धनले रातलाई दिन भन्दा पनि हो दिन नै हो भन्ने काम जनमतले गर्दैन,’ उनले भने ।

मधेश प्रदेश सरकारको विरोध गर्नु बाध्यता रहेको जनमतका प्रवक्ता यादव बताउँछन् । ‘स्वाभिमान दिवस मनाइरहँदा सत्ताको दोहन गरेको कसले देख्ने ? त्यसका जिम्मा कसले लिने ? ५ वर्ष जसपाको मुख्यमन्त्री थिए । प्रतिपक्ष मरे तुल्य छ । जनमत पार्टीले सत्तामा रहे पनि कुरीतिविरुद्ध आवाज उठाएको हो,’ उनले भने ।

उता जसपाका प्रवक्ता सुमन भने जनमतले स्टन्ट गर्न खोजेको बताउँछन् । ‘पपुलर हुने स्टन्टको राजनीति क्षणभरका लागि हुन्छ । उहाँहरूको धेरै सिद्धान्त जनतालाई थाहा छैन । धेरै अरूको विरोध गर्नुभएको छ । मधेशी राजनीतिमा छौं । एकै गठबन्धनमा छौं, संगी पार्टीको रूपमा बुझ्छौँ । उहाँहरूको व्यवहार संगीजस्तो नभएर गठबन्धनको भावना र मर्मविपरीत देखियो । छलफलमा निर्मम तरिकाले आफ्नो कुरा राख्न सक्नुहुन्छ नि । त्यहाँ कुरा राख्नुहुन्न । बाहिर आउने बित्तिकै विद्रोह गर्नुहुन्छ,’ समुनले भने ।

प्रकाशित मिति: बिहीबार, माघ ४, २०८० २०:४३