पछिल्लो समय नेपालमा देखिएको कोरोनाको नयाँ भेरियन्ट कस्तो हो, किन जरुरी छ सतर्कता ?

पछिल्लो समय नेपालमा देखिएको कोरोनाको नयाँ भेरियन्ट कस्तो हो, किन जरुरी छ सतर्कता ?

A+ A A-

पछिल्लो समय भारत, चीनलगायतका देशमा तीव्र रूपमा फैलिइरहेको कोरोना भाइरसको सवभेरियन्ट जेएनवान नेपालमा पनि देखिएको छ । स्वास्थ्य मन्त्रालयले सोमबार विज्ञप्ति जारी गर्दै नेपालमा पहिलोपटक जेएनवानको संक्रमण पुष्टि भएको जनाएको हो । जेएनवान ओमिक्रोनको सवभेरियन्ट अर्थात् नेपालीमा भन्दा ओमिक्रोन भेरियन्टको उपप्रजाति हो । यो चोइटिँदैचोइटिँदै गएको नयाँ भाइरस भएको वरिष्ठ सरुवा रोग विषेशज्ञ डा. शेरबहादुर पुन बताउँछन् ।

जेएनवान जेनेटिकल्ली म्युटेसन हुँदै गएर बनेको नयाँ भइरस भएको पुनको भनाइ छ । उनका अनुसार कुनै पनि भाइरस समयसमयमा म्युटेसन हुँदै जानु प्राकृतिक प्रक्रिया नै हो । त्यसैले यसलाई स्वाभाविक मान्न सकिन्छ । यद्यपि, पछिल्लोपटकको जेएनवान भेरियन्ट तीव्र रूपले फैलिएका कारण यसले विश्वको ध्यान तानेको पुन बताउँछन् ।

भारतमा यो भेरियन्ट देखिएपछि नेपालमा पनि यसबारे बहस बढेको हो । किनभने भारतमा देखिएका तथा फैलिएका कुनै पनि प्रकोप तथा भाइरसले नेपालसम्म प्रभाव पर्ने गर्छ ।

पछिल्लो समय नेपालका संक्रमितमध्ये करिब ४४ प्रतिशतमा ओमिक्रोनकै जेएनवान भाइरस देखिएको छ । यसका लक्षणहरू अघिल्ला कोरोनाका भेरियन्टमा देखिने लक्षणसँगै मिल्दाजुल्ल्दा रुघा खोकी, ज्वरो आउने, टाउको दुख्ने, चक्कर लाग्ने, बान्ता आउने तथा शरीर दुख्ने रहेको डा. पुन बताउँछन् ।

चीन, अमेरिका, बेलायत तथा क्यानडालगायत विश्वका धेरै देशमा तीव्र रूपमा फैलिएको जेएनवानलाई विश्व स्वाथ्य संगठनले 'भेरियन्ट अफ इन्ट्रेस्ट' अन्तर्गत राखेको छ । त्यसैले पनि यसलाई संक्रामक मान्न सकिने डा. पुनको भनाइ छ ।

पछिल्लो समय देखिएको कोरोनाको म्युटेसन जेएनवानको अन्तर्राष्ट्रिय रिपोर्टलाई आधार मान्दा यसको संक्रमणदर तीव्र भए पनि त्यसको अनुपातमा मृत्युदर थोरै रहेको डा. पुन बताउँछन् । विश्व स्वास्थ्य संगठनले पनि जेएनवानलाई कम घातकको श्रेणीमा राखेको छ । सोही कारण अहिलेकै अवस्थामा त्रसित भइहाल्नुपर्ने अवस्था नरहेको डा. पुन बताउँछन् । तर, सतर्कता भने आवश्यक रहेको उनको भनाइ छ ।

डा. पुन कुनै पनि संक्रमण फैलिएको समयमा कसैको मृत्यु हुँदैन भन्न सकिने अवस्था नरहने बताउँछन् । त्यसैले जेएनवानको सवालमा पनि उत्तिकै सतर्कता जरुरी रहेको उनको भनाइ छ । ‘रोग प्रतिरोधात्मक क्षमता कम भएका, दीर्घरोगी, बालबालिका, गर्भवती महिला तथा वृद्धवृद्धाका लागि जेएनवान चुनौतीपूर्ण देखिन्छ,’ उनी भन्छन् ।

कोरानाविरुद्ध हामीले अपनाएको सचेतना- मास्क लगाउने, सामाजिक दूरी कायम गर्ने, धेरै भिडभाडमा नजाने तथा हात स्यानिटाइज गर्नेजस्ता प्रोटोकललाई भुल्न नहुने डा. पुनको सुझाव छ ।

प्रकाशित मिति: बिहीबार, पुस २६, २०८० २०:०५