महासमितिबाटै १५औँ महाधिवेशनको मिति तोक्न दबाब दिने कोइराला समूहको तयारी

A+ A A-

२ पुसमा नुवाकोट कांग्रेस जिल्ला सम्मेलनमा सभापति शेरबहादुर देउवाले भनेका थिए, ‘घात, अन्तर्घात गर्नेलाई कारबाही गरौँ भन्दा फेरि कारबाही गर्न पाइँदैन भन्छन् । पार्टीलाई मिलेर एक गराएर हिँड्नुपर्छ । बहुमत ल्याउने प्रयास गरौँ ।’

चुनावमा हुने अन्तर्घातबाट कांग्रेस पछिल्लो समय थलिएको छ । २०८४ मा हुने संघीय चुनाव र त्यसअघिको स्थानीय चुनावमा पनि अन्तर्घात हुने त्रासमा छ कांग्रेस । कांग्रेस नेता डा. शेखर कोइराला समूहले २०८२ सालभित्रै १५औँ महाधिवेशन हुनुपर्ने माग गरिरहेको छ । पार्टीलाई बलियो बनाउन र अन्तर्घात हुनबाट जोगाउन पनि समयमै महाधिवेशन गर्नुपर्ने माग कोइराला समूहले गरिरहेको छ । सभापति देउवाले पनि पार्टीलाई एकताबद्ध बनाउन सबै मिलेर अघि बढ्नुपर्ने अपिल गरिरहेका छन् ।

‘तपाईंहरूलाई थाहा छ, पार्टीमा घात, अन्तर्घात पनि छ । खुट्टा तानातान पनि हाम्रो पार्टीमा भइरहेकै हो, अहिले होइन पहिलेदेखि नै,’ देउवा भन्छन्, ‘हाम्रो पार्टीलाई सुधार गर्नु छ, २०८४ को चुनाव जित्नु छ ।’ कांग्रेसभित्र महासमिति बैठकबाटै १५औँ महाधिवेशनको मिति तोक्नुपर्ने पक्षमा कोइराला समूह छ । ७-१० फागुनमा बस्ने महासमितिको बैठकबाटै महाधिवेशनको मिति तय गर्नुपर्ने नेता कोइरालाले बताउँदै आएका छन् । पार्टीलाई बलियो र सुदृढ बनाउन समयमै महाधिवेशन गर्नुपर्ने कोइरालाको भनाइ छ ।

महामन्त्री गगन थापाले पनि १५औँ महाधिवेशनको मिति महासमितिको बैठकमा प्रस्ताव गरिने बताएका छन् । सभापति देउवाले महाधिवेशन समयमा नगरेर २०८४ को संघीय निर्वाचनको पनि टिकट बाँड्न सक्ने त्रासमा कोइराला समूह छ । त्यसैले पनि महाधिवेशनको मिति महासमिति बैठकबाटै तोकेर अघि बढ्नुपर्ने पक्षमा कोइराला समूह छ । ‘अहिले नै महाधिवेशनको मिति तोकेर गइएन भने महाधिवेशन समयमा नहुने खेल हुन सक्छ । त्यसैले पार्टीलाई रुपान्तरण र बलियो बनाउने हो भने २०८२ भित्रै पार्टीको १५औँ महाधिवेशन गर्नुपर्छ,' केन्द्रीय सदस्य अजयबाबु सिवाकोटीले शिलापत्रसँग भने ।

पार्टीभित्रको आन्तरिक प्रतिस्पर्धाको असर आमचुनावमा पर्न नदिन पनि महाधिवेशन समयमै गर्न दबाब भएको उनले बताए । ‘हाम्रो आन्तरिक द्वन्द्वको प्रत्यक्ष असर चुनावमा पर्छ भने यस्तो चुनाव त हुनु हुँदैन भन्ने हो । स्थानीय, प्रदेश र संघको चुनावमा असर पर्छ भने ‘कुलिङ पिरियड’ चाहिन्छ । पार्टीभित्र जित्ने हार्नेले समस्या सम्बोधन गरेर एक ठाउँमा उभिन सकोस्,' सिवाकोटीले भने ।

स्थानीय तहदेखि केन्द्रसम्म पार्टीमा जित्नेले मात्र चुनावमा टिकट पाउने भएकाले त्यसले पार्टीको चुनावमा हार्नेले ‘देखाइदिन्छु’ भन्ने भावना विकास हुने भएकाले अन्तर्घातको सम्भावना बढ्ने विश्लेषण कोइराला समूहको छ । ‘चुनावको मुखमा महाधिवेशन हुँदा पार्टीको आन्तरिक द्वन्द्वको असर चुनावमा देखियो । २०८२ मा जसरी पनि महाधिवेशन गर्नुपर्छ,’ महामन्त्री गगन थापाले भने । उनले क्यालेन्डर ल्याउँदा पार्टीको चुनाव र स्थानीय, प्रदेश र संघको चुनावको क्यालेन्डर मिलाएर बनाउनुपर्ने बताए ।

विधानअनुसार कांग्रेसको महाधिवेशन चार-चार वर्षमा हुनुपर्छ । तर, कांग्रेसले विधानको पालना गर्न सधैँ बिर्सिन्छ । चार वर्षमा हुनुपर्ने महाधिवेशनलाई कांग्रेसले धकेलेर ६ वर्षसम्म पुर्‍याएको छ । कांग्रेसको १४औँ महाधिवेशन २०७८ को मंसिरमा भएको थियो । विधानअनुसार कांग्रेसको १५औँ महाधिवेशन २०८२ को मंसिरमा हुनुपर्छ । तर, विधानले नै विशेष अवस्थामा एक वर्ष कार्यकाल थप्न मिल्ने व्यवस्था पनि गरेको छ ।

थपिएको समयमा पनि हुन नसके संवैधानिक व्यवस्थालाई टेकेर ६ महिनाभित्र महाधिवेशन गर्न मिल्छ । संविधानको यही व्यवस्थालाई अँगालेर १३औँ महाधिवेशन भएको साढे पाँच वर्षपछि ०७८ मंसिरमा कांग्रेसले १४औँ महाधिवेशन गरेको थियो । त्यसैले पनि सभापति देउवाले आफ्नो कार्यकाल लम्ब्याउन सक्ने त्रास कोइराला समूहमा छ ।

महाधिवेशन हुने वर्ष क्रियाशील सदस्य वितरण रोकिने महामन्त्री थापा बताउँछन् । कांग्रेस मामिलाका जानकार डा. गोविन्दमानसिंह कार्की कोइराला समूहले महाधिवेशनको मिति तोकिनुपर्ने माग राख्नु स्वाभाविक भएको बताउँछन् । 'सभापति देउवाले यसपटक पनि महाधिवेशन लम्ब्याउने हुन् कि भन्ने डर कोइराला समूहलाई छ । समय तोकियो भने तयारी गर्ने समय पनि हुन्छ । कोइराला समूहको चाहना स्वाभाविक हो,’ उनले शिलापत्रसँग भने ।

प्रचार विभाग प्रमुख मीन विश्वकर्मा भने पार्टीको १५औँ महाधिवेशनबारे विधानसम्मत निर्णय हुने बताउँछन् । ‘छलफल गरेर विधानसम्मत निर्णय हुन्छ । उहाँहरूले पार्टीको वैधानिक फोरममा कुरा उठाए छलफल हुन्छ,’ उनले शिलापत्रसँग भने ।

प्रकाशित मिति: बुधबार, पुस २५, २०८० १५:२६