पोखराका १२ ठाउँमा सार्वजनिक शौचालय निर्माण गरिने

A+ A A-

पर्यटकीय नगरी पोखरामा बढ्दो शहरीकरणलाई मध्यनजर गर्दै पोखरा महानगरपालिकाले पोखराका मुख्यमुख्य स्थानमा सार्वजनिक शौचालयनिर्माण गर्ने भएको छ । पछिल्लो समय पोखरामा बढ्दो शहरीकरणसँगै महानगरले विभिन्न स्थानमा १२ वटा सार्वजनिकशौचालयनिर्माण गर्ने योजना बनाएको हो ।

अघिल्लो वर्ष महानगरका १० स्थानमा स्मार्ट सार्वजनिक शौचालय बनाउने योजना सफल नभएपछि यस वर्ष भने जसरी शौचालय निर्माण गर्ने योजना महानगरले बनाएको छ । मापदण्डका कारण अघिल्लो वर्ष पोखराका १० ठाउँमा सार्वजनिक शौचालय बनाउने योजना असफल भएको महानगरले जनाएको छ ।

महानगरले मापदण्डलगायतका सबै समस्या सुल्झाएकाले यस वर्षपोखराका मुख्यमुख्य १२ ठाउँमा शौचालय बनाउने तयारी सुरु भएको पोखरा महानगरपालिकाका इन्जिनियर ध्रुव भट्टराईले जानकारी दिए ।

‘हामीले यस योजना अघिल्लो आर्थिक वर्षमा नै सुरू गरेका हौं,’ इन्जिनियर भट्टराईले भने, ‘अघिल्लो वर्ष विभिन्न वडामा जग्गा विवाद र मापदण्डका समस्याहरू देखिएका कारण कार्यान्वयन हुन सकेन । अहिले वर्ष सबै समस्या हल गरिसक्यौं। यसवर्ष सार्वजनिक शौचालय निर्माण गर्न महानगर अघि बढेको छ ।’

अब बन्ने सार्वजनिक शौचालयहरू अपांगमैत्री हुने उनको भनाइ छ । ‘पोखराकाविभिन्न ठाउँमा निर्माण हुनलागेका सार्वजनिक शौचालयहरू पूर्ण रूपमा अपाङ्गमैत्री हुनेछन् । सबै ठाउँमा महिला, पुरुषका लागि छुट्टाछुट्टै शौचालय यससमेत निर्माण हुनेछ,’ भट्टराईले भने ।

इन्जिनियर भट्टराईका अनुसार पोखराको वडा १ मा हरिचोक, वडा ६ मा हल्लनचोक, वडा ७ मा मालपोत कार्यालय, वडा १७ मा डेभिडफल र दोबिल्ला, वडा १८ मा न्याउरिङ पहरा नजिकै, वडा १९ मा पुरनचौर र वडा कार्यालय, वडा २६ मा राखी डाँडा, वडा २८ मा रत्नशोभा उच्चमाविमा सार्वजनिक शौचालय निर्माण हुने योजना छ ।

महानगरकाअनुसार वडा ७ मालपोत कार्यालय र वडा २६ को राखिडाँडामा सार्वजनिकशौचालयनिर्माण भइसकेका छन् । विभिन्न स्थानहरूमा निर्माण हुने शौचालय १० लाख देखि ४८ लाखसम्मको लागतमा निर्माण हुनेछ ।

गण्डकी प्रदेश सरकारले प्रदेशका सबै नगरपालिकामा शौचालय बनाउने निर्णय गरेको एक वर्ष बितिसकेको छ । भौतिक पूर्वाधार विकास मन्त्रालयले हरेक नगरपालिकामा शौचालय बनाउन १० लाख रुपैयाँ छुट्याएको छ । ६० प्रतिशत प्रदेश सरकारले र बाँकी ४० प्रतिशत रकम सम्बन्धित नगरपालिकाले ब्यहोर्ने गरी निर्णय भएको थियो ।

महानगरमा निर्माणहुने शौचालयका लागि नगरपालिका र मन्त्रालयको संयुक्त लगानी हुनेछ । एउटा शौचालयका लागि १६ लाख ६६ हजार ६ सय ६६ रुपैयाँका दरले खर्च हुनेछ । यसमा ६ लाख ६६ हजार रुपैयाँ नगरपालिकाको भागमा पर्छ । प्रति शौचालयमा मन्त्रालयले १० लाख छुट्याएको छ ।

मन्त्रालय र महानगरको लगानीमा पोखरामा कुल २६ वटा शौचालयमा ३ करोड ३३ लाख रुपैयाँ बजेट खर्च गर्ने योजना छ।मन्त्रालयले महानगरपालिकासँग ६०÷४० को लगानीमा स्मार्ट शौचालय बनाउनेछ ।

प्रकाशित मिति: बुधबार, असोज २२, २०७६ ११:१३