अन्तर्राष्ट्रिय विद्यार्थीलाई कडाइ गर्ने अस्ट्रेलियाको नीतिले नेपाली विद्यार्थीलाई कस्तो असर पार्छ ? (भिडियो)

अन्तर्राष्ट्रिय विद्यार्थीलाई कडाइ गर्ने अस्ट्रेलियाको नीतिले नेपाली विद्यार्थीलाई कस्तो असर पार्छ ? (भिडियो)

A+ A A-

पछिल्लो समय अस्ट्रेलियाका लागि कमै मात्र नेपाली विद्यार्थीहरूले शैक्षिक भिसा पाउने गरेका छन् । जानकारहरू विश्वविद्यालयस्तरको र गुणस्तरीय शिक्षामा त्यहाँको सरकार केन्द्रित रहेको बताउँछन् ।

कोरोना महामारीपश्चात् अस्थायी आप्रवासीको संख्या उच्च रूपले वृद्धि भएसँगै अस्ट्रेलियाका स्थानीय नागरिकले समेत बस्नका निम्ति घर नपाउने अवस्था सिर्जना हुन पुग्यो । त्यसैले यतिखेर उक्त समस्यालाई न्यूनीकरण गर्न पनि अस्ट्रेलियन सरकारले आप्रवासीको संख्यालाई घटाउने किसिमको नयाँ नीति ल्याएको छ ।

अस्ट्रेलियाले ल्याएको नयाँ नीतिले मुख्यत: आप्रवासी विद्यार्थीलाई कडाइ गर्ने देखिन्छ । नेपाली विद्यार्थीको शैक्षिक गन्तव्यका लागि प्रमुख रोजाइमध्येको एक हो– अस्ट्रेलिया । अस्ट्रेलियाले ल्याएको पछिल्लो नीतिका कारण नेपाली विद्यार्थीलाई कस्तो असर पर्छ त ? यो प्रश्नको जवाफ हामीले युनिक्याम्पस ग्लोबलका वरिष्ठ व्यवस्थापक केदार कोइरालाबाट खोज्ने प्रयास गरेका छौँ ।

युनिक्याम्पस ग्लोबल करिब २३ वर्षअघि स्थापित सफ्टवारिका ग्रुप अफ कम्पनीको भगिनी संस्थाका रूपमा २०६६ सालदेखि शैक्षिक परामर्शदाताका रूपमा सेवा विस्तार गरेको संस्था हो ।

अस्ट्रेलिया, संयुक्त राज्य अमेरिका, बेलायत, क्यानडा, न्युजिल्यान्डजस्ता देशहरूमा उच्च शिक्षा हासिल गर्न चाहने विद्यार्थीलाई सहयोग पुर्‍याउने उद्देश्यले विस्तार भएको युनिग्लोबले अस्ट्रेलियाकेन्द्रित परामर्शमा जोड दिइरहेको छ । कोइरालाले पछिल्ला आठ वर्षदेखि युनिक्याम्पस ग्लोबलमार्फत अध्ययनका निम्ति अस्ट्रेलिया जान चाहने विद्यार्थीलाई परामर्श दिँदै आएका छन् ।

कोइरालाका अनुसार अस्ट्रेलियाले ल्याएको नयाँ नीतिले अस्ट्रेलियामा रहेर त्यहाँको सीप, बजार र अर्थतन्त्रमा योगदान दिन नसकेका आप्रवासी विद्यार्थीलाई मात्र अप्ठ्यारो पर्न सक्छ ।

कुनै पनि देशले समय–समयमा सरकार परिवर्तनसँगै आप्रवासी नीति परिवर्तन गर्ने कुरा सामान्य विषय हो । त्यस कारण पछिल्लोपटक अस्ट्रेलियाले गरेको आप्रवासी नीतिअन्तर्गतको परिवर्तन पनि सामान्य प्रक्रिया भएको उनी बताउँछन् ।

उनी भन्छन्, ‘यसले गर्दा अस्ट्रेलियाका लागि भिसा नै लाग्दैन भन्ने होइन । अहिले पनि लागिरहेको छ । तर, विद्यार्थीकै भविष्यलाई मध्यनजर गर्दै विश्वविद्यालयस्तरको र गुणस्तरीय शिक्षामा अस्ट्रेलियन सरकारकेन्द्रित भएको देखिन्छ ।’

पछिल्लो समय अस्ट्रेलियाले नेपाली विद्यार्थीलाई दिने भिसादरमा कुनै कटौती नगरेको तर निजीस्तरका शैक्षिक संस्थाको भिसाभन्दा विश्वविद्यालयकेन्द्रित भिसालाई प्राथमिकता दिइरहेको उनको भनाइ छ ।

कति विद्यार्थीले पढे ? कतिले समयमा विद्यावारिधि लिए ? कति पढ्न नसकेर अड्किरहेका छन् ? पढिसकेकाले सम्बन्धित क्षेत्रमा काम गरिरहेका छन् कि छैनन् ? यस्ता विषय सरकारले आप्रवासी नीतिअन्तर्गत परिमार्जन गरिरहेकै हुन्छ । कलेज पविर्तन गरिरहने । नपढ्ने । असफल भएर अड्किरहेका विद्यार्थीलाई फिल्टर गरेर सक्षम विद्यार्थी भित्र्याउन अस्ट्रेलियाले पछिल्लोपटक आप्रवासी नीति परिमार्जन गरेको कोइरालाको बुझाइ छ ।

कुनै गैरकानुनी क्रियाकलाप नगरी वैधानिक तवरले रहेर अध्ययन गर्ने विद्यार्थीका निम्ति आज पनि अस्ट्रेलिया उत्कृष्ट शैक्षिक गन्तव्य रहेको उनको दाबी छ ।

विद्यार्थीको शैक्षिक योग्यताअन्तर्गत आईईएलटीएस, पीटीईलगायत भाषा परीक्षामा ६ देखि ६.५ सम्म आयो (यसअघि ५ं.५ ल्याउने विद्यार्थी पनि जान पाउँथे) र फाइनान्सियल कागजातहरू मिलाएर वैधानिक तवरमा पठाएको खण्डमा अस्ट्रेलियन सरकारले भिसा उपलब्ध गराइरहेको कोइराला बताउँछन् ।

भिडियो:

प्रकाशित मिति: सोमबार, पुस २३, २०८० १३:२१