यसरी मनाउँदैछन रंगकर्मीले दसैं

A+ A A-

रंगकर्ममा लागेका कलाकाहरू हरेक दिनजसो स्टेजमा देखिन्छन् । उनीहरूको जीवन निकै ब्यस्त हुन्छ, यद्यपि दसैं कलाकर्मीका लागि विशेष रहन्छ । तर, कतियपय कलाकारहरूले दसैं परिवारसँग बसेर मनाउन पाएका हुँदैनन् । कतिपय कलाकार चाहिँ वर्षैभर ब्यस्त भए पनि दसैं र तिहार परिवारसँग बसेर मनाउने इच्छाले यस्ता कार्यक्रमहरू रद्द गरेका हुन्छन् । कतिपय बाध्यताले पनि कार्यक्रममै पुग्नुपर्ने हुन्छ । ब्यस्त भनेर चिनिएका कलाकारहरूले यसपटकको दसैं कसरी मनाउने योजना बनाइरहेका छन् भनेर शिलापत्रले बुझ्ने प्रयास गरेको छ ।
रगंकर्मीका नजरमा दसैं

राज शाह

हामी रंगकर्मीका लागि दसैं आराम गर्ने चाड हो । हामी रंगकर्मीहरूका लागि झन् शनिबार पनि फुर्सद मिल्दैन । त्यसैले दसैंको समय घरमा टिका लगाएर बस्छु । यो वर्षको दसैं विशेष छ । ६÷७ वर्ष पछि दसैंमा घर दसैं मनाउँदै छु । यो बीचको दुई/चार दिन पुस्तकहरू पढ्ने योजना पनि बनाएको छु ।

दसैंपछिको बिदालाई नाटककै सिलसिलामा पश्चिम नेपालका केही जिल्ला घुम्ने योजना पनि बनाएको छु । मलाई यात्रा गर्न रूचि लाग्छ । गाउँको घर गुल्मीमा नेपाली समाजका अथाह संस्कृतिहरू छन् । दसैंमा मेरा लागि अध्ययन अनुसन्धानको विषय बन्छ ।

१०/१५ दिन घुमघाम गर्ने योजना बनाएको छु । यो वर्ष मेरो दसैं विशेष रहनेछ । रंगकर्मीका लागि दसैं झन् विशेष हुन्छ ।

हामी रंगकर्मीहरूका लागि दसैं निकै महत्त्वपूर्ण हुन्छ । दसैंमा विभिन्न संस्कृतिहरू देखिन्छ । त्यसैले पनि दसैंलाई महत्त्वपूर्ण चाडको रूपमा लिन्छु ।

इष्टु कार्की

दसैंमा त्यस्तो खासै योजना त छैन । तर, रमाइलो गर्नुपर्छ भन्नेचाहिँ लागेको छ । दसैंमा सबै जनाको फुर्सद हुने भएकाले परिवारसँग जमघटका लागि घर जान्छु । तर, दसैंको टीका भने लगाउँदिनँ । दसैं सधैं आउँछ जान्छ जस्तो लाग्छ मलाई । दसैंका नकारात्मक पक्षहरू पनि छन् । दसैंमा त्यति उल्लासचाहिँ लाग्दैन । तर, एउटा रंगकर्मी भएको नाताले सम्पूर्ण चाडपर्वहरू मनाउनुपर्छ ।

केदार श्रेष्ठ

दसैं हिन्दु पराम्पराबाट आएको चाड हो । एउटा रंगकर्मीले सम्पूर्ण धर्मानुसारका चाडपर्वलाई मनाउनुपर्छ । हरेक मानिसका आआफ्नै पारिवारिक सम्बन्ध हुन्छन् । सांस्कृतिक रूपमा विभिन्न धर्म र संस्कृतिका छुट्टै विशेषता छन् । हामी कलाकाहरूलाई दसैंको सांस्कृतिक पाटो बढी महत्त्व पूर्ण हुन्छ । पारिवारिक जमघट हुने यो एउटा महत्त्वपूर्ण दिनको रूपमा लिइन्छ । पहिले दसैं भन्नेबित्तिकै नयाँ लुगा लगाउन पाइन्छ भन्ने धारणा थियो ।

शहरमा बसेका मान्छेहरूलाई आफन्तहरूलाई भेट्न नपाइरहेको बेला पनि यो आफ्नो भेटघाट गर्ने अवसर पनि हो । दसैंमा संस्कृति मात्रै नभएर मानवीय संवेदनाका कुरा पनि जोडिएको हुन्छ ।

म दसैंलाई विभिन्न जिम्मेवारी पूरा गर्ने पर्वको रूपमा लिन्छु । थिएटरमा पनि छुट्टै पारिवारिक सम्बन्ध हुन्छ । थिएटरको नेतृत्वकर्ताको तर्फबाट एउटा जिम्मेवारी पनि छ ।

यस वर्षको दसैं मैले धादिङमा मनाउँछु । यो वर्षको दसैं ब्यस्त नै छु । थिएटर मल कीर्तिपुरमा दसैं पूर्णिमाको एउटा नाट्यकार्यशाला गोष्ठी भएकाले त्यसैको तयारी छु । दसैंको २÷३ सम्म घरमै रहन्छु । त्यसपछि आफ्नो काममा निरन्तर रहन्छु ।

प्रदीपकुमार चौधरी

दसैंले सामाजिक मूल्य मान्यता बोकेको हुन्छ । त्यसैले पनि यो दसैं रंगकर्मीहरूका लागि विशेष रहन्छ । र, घरमै मनाउने सोच बनाएको छु । हाम्रो थारू समुदायमा पनि दसैंका रौनक बेग्लै हुन्छ । दसैं सुरू भएपछि प्रत्येक दिन पूजा गरिन्छ । हाम्रा समुदायको बेग्लै संस्कृति छ । हाम्रो परिवारमा टीकाटालो हुँदैन । तर, पहिलेदेखि मनाउँदै आएको हुनाले दसैंलाई जमघट र आमित्यता साटासाट गर्ने दिनको रूपमा लिन्छौं ।

सुदाम सिके

मलाई दसैं आयो गयो जस्तो लाग्छ । दसैंको समयमा समय वीरगन्जमा बित्छ । हामी रंगकर्मीलाई सधैं समयको अभाव हुन्छ । त्यसैले पनि दसैंमा फर्सदजस्तो हुन्छ । यही मौका छोपेर घुमघाम जाने योजना बनाएको छु । ८/१० दिन घुमघाममा ब्यस्त हुन्छु होला । दसैंले विभिन्न संस्कृतिहरू बोकेको हुन्छ । रंगकर्मीले यस्ता विभिन्न संस्कृतिलाई प्रत्यक्ष देख्न पाउँछ ।

प्रकाशित मिति: सोमबार, असोज २०, २०७६ २२:४०