कोरोना संकटबाट सिर्जित परिस्थितिले जन्माएको बिग इन्डस्ट्री (भिडियो)

A+ A A-

शैक्षिक व्यवसायी सीए नवराज बुर्लाकोटी शैक्षिक व्यवसायबाट राम्रै स्वाद लिइरहेका थिए । त्यति नै बेला विश्व महामारीका रूपमा कोरोना महामारी देखा पर्‍यो । हरेकजसो व्यवसाय ठप्प मात्र भएनन्, हरेक व्यक्ति घरभित्रै थुनिन बाध्य भए । घरभित्र थुनिएर बस्नुभन्दा बजारमा देखापरेको खानेकुराको अभावले नवराजलाई पिरोलेन मात्र, उनको सोच नै बदलिदियो ।

कोभिड १९ विश्वभर फैलिएको थियो । त्यो अवस्थामा आपूर्ति शृंखला विच्छेद भएको अवस्था थियो । नेपालसँगै अन्तर्राष्ट्रियस्तरमा रोजगारीका अवसरहरू गुमिरहेको अवस्था थियो ।

‘त्यतिबेला विश्वका सम्पन्न मुलुकहरूले ठोस राहतका प्याकेजहरू घोषणा गरिरहेको अवस्थामा हाम्रो देशले केही गर्न नसकेको अवस्था थियो । त्यतिबेला मलाई एउटा भनाइ याद आयो– संकटको धन अन्न र पानी । वास्तवमै अन्न र पानी सबैभन्दा महत्त्वपूर्ण रहेछ भन्ने महसुस गरेँ ।’

मूलतः आयातमुखी अर्थतन्त्र रहेको हाम्रो देशमा आफ्नो धेरैजसो उर्वर जमिन बाँझो रहने र कृषिमा निर्भर भएका थोरै कृषकले उत्पादन गरेका खाद्यान्नले पनि बजार नपाउने अवस्था छ । बजार पाइहाले पनि मूल्य नपाउने । तर, सिङ्गो देशको खाद्य शृंखलाचाहिँ छिमेकी मुलुकप्रति परनिर्भर, यही विषयले नवराजलाई सोच्न बाध्य बनाएको थियो ।

उनका अनुसार, देशलाई खाद्यान्नमा आत्मनिर्भर बनाउन सामूहिक रूपमा केही न केही गर्नुपर्छ भन्ने सोच उनमा आयो । उनको त्यही सोचले उनीसँग व्यवसायी, उद्योगी, बैंकर, विशेषज्ञदेखि किसान र आमनागरिकसम्मलाई एकै ठाउँमा उभ्यायो । यसरी करिब ५ सय जनाको समूह तयार भयो ।

सामुदायिक सशक्तीकरणमार्फत स्वस्थ र स्वच्छ कृषि उत्पादनले स्थानीय कृषकलाई उत्पादनमा प्रोत्साहन गर्‍याे । आर्थिक रूपमा पनि सवल बनायाे । अन्ततः देशको अर्थतन्त्रलाई उत्पादनमुखी बनाउँदै मुलुकलाई आत्मनिर्भरताको दिशामा डोर्‍याउने लक्ष्यका साथ नवराजसहितको समूहले बिजनेस इन्टरेस्ट ग्रुप अफ इन्डस्ट्री लिमिटेडको सुरुवात गर्‍यो ।

हाल बिग इन्डस्ट्रीले कृषकले उत्पादन गरेका खाद्यान्न संकलन र त्यसलाई प्रशोधन गरेर सामाखुसी रानीबारीस्थित ‘गोमार्ट’ नाम दिएर आफ्नै आउलेटमार्फत बिक्री पनि सुरु गरिसकेको छ । उक्त आउटलेटमा हिमाली तथा पहाडी क्षेत्रका जौ, फापर, कोदो, आलु, बेसार, मास, भटमास, तिललगायत उपलब्ध छन् । कम्पनीले हरेक स्थानीयस्तरका विशेषता बोकेका खाद्यान्न संकलन गरेर त्यसलाई बजारीकरण गर्नका लागि देशैभर अध्ययन गरिरहेको छ ।

कम्पनीले नमुना कृषि तथा अनुसन्धान उद्योग स्थापना र सामुदायिक खेतीका लागि धनुषामा ५० बिघा जग्गा लिएर काम गरिरहेको नवराज बताउँछन् । बिग इन्डस्ट्रीले कन्फ्लेक्स, मुस्ले, चोक्कोज, चिउरालगायत हाइलाइफ नाममा आफैँ उत्पादन गरी गोमार्टमार्फत बिक्री गर्न थालेको छ । दाल, चामल तथा तेललगायतका दैनिक उपभोग्य वस्तुका लागि चितवन फुड इन्डस्ट्रिजबाट अल फुड इन्डस्ट्रिज नामले ल्याउन लागेको उनको भनाइ छ ।

बिग इन्डस्ट्रीको पर्यटनअन्तर्गत 'बूढानीलकण्ठ हेरिटेज' नामको पाँचतारे होटल बूढानीलकण्ठमा आगामी महिनादेखि संचालनमा ल्याउने तयारी कम्पनीको छ । कृषिलाई आधुनिकीकरण गर्दै आयात घटाएर निर्यात प्रवर्द्धन गरी देशको आर्थिक उन्नतिमा टेवा पुर्‍याउने उद्देश्य राखेको बिग इन्डस्ट्रीले अन्य क्षेत्रमा समेत विभिन्न सहायक कम्पनी स्थापना गरेको छ ।

विभिन्न कृषि प्रशोधन उद्योग, एग्रो र एफएमसीजी ट्रेडिङ, एग्रो टुरिज्म र हस्पिटालिटी र अन्ततः आन्तरिक उत्पादन र राष्ट्रिय आयको वृद्धिमा योग्दान पुर्‍याउने लक्ष्यका साथ स्थापित बिग इन्डस्ट्रीले सहायक कम्पनीहरूमार्फत शिक्षा, स्वास्थ्य, पर्यटन, ऊर्जा, आधुनिक टाउनसिप र रियल इस्टेट, पूर्वाधार विकास र अन्य क्षेत्रमा पनि व्यवसाय प्रवर्द्धन गर्ने नवराजको भनाइ छ ।

नवराज थप्छन्, ‘समय तथा वर्ष जतिसुकै लागोस् । तर, बिग इन्डस्ट्री एक दिन यो देशको सबैभन्दा राम्रो र सबैले हाम्रो भन्ने पारदर्शी पब्लिक ग्रुप कम्पनीका रूपमा स्थापित हुन्छ । हाम्रो लक्ष्य त्यही हो ।’

भिडियाे हेर्नुहाेस् :