राष्ट्रियसभामा गठबन्धनसँग भाग खोज्ने भए सरकारमा आउन एमालेलाई कांग्रेस संस्थापनइतर समूहको निम्तो

राष्ट्रियसभामा गठबन्धनसँग भाग खोज्ने भए सरकारमा आउन एमालेलाई कांग्रेस संस्थापनइतर समूहको निम्तो

A+ A A-

राष्ट्रियसभामा चुनावमा प्रमुख प्रतिपक्षी दल एमालेलाई भाग दिन कांग्रेस सभापति शेरबहादुर देउवा तयार छन् । तर, संस्थापनइतर समूह भने त्यसको विरोधमा छ ।

इतर समूहका नेता शेखर कोइरालाले कांग्रेस एक्लै राष्ट्रियसभाको चुनाव लड्नुपर्ने बताउँदै आएका छन् । तर, योपटक सभापतिको निर्णयमा विमति राखे पनि चर्को रूपमा कदम चाल्ने पक्षमा देखिएका छैनन् उनी, जति कोशी प्रदेश सरकारमा एक्लै कदम चालेका थिए ।

बिहीबार शेखरले ट्वीट गर्दै सत्ता गठबन्धन र प्रतिपक्षी दल एमालेको आलोचना गरेका छन् । ‘हिजो कोशीमा एमालेको सहयोगमा सरकार बनाउँदा केन्द्रको गठबन्धन नै धरापमा पर्‍यो भनेर रोइलो गर्नेहरू नै आज राष्ट्रियसभा निर्वाचनमा एमालेसँग मिल्न थालेछन् । कारण स्पष्ट छः सत्ता गठबन्धनका कुनै दललाई टीआरसी विधेयकमा र कुनै दललाई विभिन्न काण्डबाट बच्न एमालेको साथ चाहिएको छ । अनि एमाले ?’

शेखरले फेसबुकमा एमालेलाई पनि सरकार बाहिर बसेर बार्गेनिङ गर्नुभन्दा सरकारमा आए उपयुक्त हुने बताएका छन् । उनले लेखेका छन्, ‘एमाले, एक–दुई सिटका लागि जे पनि हस् ? यदि यसो होइन भने केन्द्र र सबै प्रदेशमा एमाले पनि सरकारमा आए भैगो । किन बाहिर बसेर केही पदका लागि बार्गेनिङ गर्नु ?,’ उनले लेखेका छन्, ‘संसदीय समितिका तीन सभापति र राष्ट्रियसभाका दुई/तीन सिट पाएपछि प्रमुख प्रतिपक्षले राष्ट्रिय मुद्दामा आँखा चिम्लनु झनै दुर्भाग्यपूर्ण हो ।’ भागवण्डाको शृङ्खला संसदीय समितिमा तीनवटा सभापति दिने कामबाट सुरु भएको उनले बताएका छन् ।

एमालेले बिहीबारको सत्ता गठबन्धनसँगको बैठकमा सङ्क्रमणकालीन न्यायसम्बन्धी विधेयक (टीआरसी)मा सहमति गर्ने भए राष्ट्रियसभामा ६ सिट दिनुपर्ने सर्त राख्यो । एमालेलाई सिट दिन कांग्रेस सभापति, प्रधानमन्त्री पुष्पकमल दाहाल प्रचण्ड, जसापा अध्यक्ष उपेन्द्र यादव सहमत भए पनि एकीकृत समाजवादीका अध्यक्ष माधव नेपाल सहमत हुन सकेनन् । उनले प्रमुख प्रतिपक्ष दल राजनीतिक ढंगले उभिने हो वा सिट लेनदेन गरेर हात थापेर बाँच्ने हो ? भनेर प्रश्न उठाए । टीआरसीको विषयमा बार्गेनिङ गर्दै एमालेले तीनवटा संसदीय समितिको सभापति पनि लिएको थियो ।

यता एमालेसँगको बैठकमा सभापति शेरबहादुर देउवासँगै रहेका महामन्त्री गगन थापा भने मौन छन् । गठबन्धनभित्र पनि सहमति जुटिनसकेको र शीर्ष बैठकमा सहभागी भएकाले महामन्त्री थापा बोलेका छैनन् । किनकि एमालेलाई सिट दिने विषयमा गठबन्धनबीच प्रस्ट सहमति भैसकेको छैन ।

एमालेलाई सिट बाँड्दा गठबन्धनका सबै दलको सिट घट्छ । एक सिट पाउने भनिएको जसपाको घट्ने छैन । आफ्नो दलको रिक्त हुने सिटमा आफैँले राख्ने र एमालेको ९ सिटमा भागवण्डा हुँदा १० सिट दाबी गरेको कांग्रेसको सिट घट्नेछ । सभापति देउवाले घटेको सिटमा आफ्नो पक्षबाट घटाउने छैनन् । उनले संस्थापनइतर समूहलाई कम सिट दिनेछन् ।

‘संसदीय चुनावमा प्रमुख प्रतिपक्षीसँग मिलेर जाने कुरा मलाई उपयुक्त लाग्दैन । राष्ट्रियसभा पनि संघीय संसदमा नै पर्छ । ६ दलीय गठबन्धनमा अर्को दल थप्नेबाहेक अको कुरा के रह्यो र ? कि एमाले पनि सत्तामा आउनुपर्‍यो । सरकामा पनि जान्छौँ र चुनाव पनि मिलेर लडौँ भन्नुपर्‍यो होइन भने मिलेर चुनाव लड्ने कुराको औचित्य छैन,’ कांग्रेस सहमहामन्त्री जीवन परियारले शिलापत्रसँग भने ।

लोकतन्त्रमा संवाद सहमति सहकार्य नटुङ्गिने प्रतिनिधिसभामा कांग्रेसका प्रमुख सचेतक रमेश लेखक बताउँछन् । एमालेसँग समसामयिक विषयमा कुरा भएको उनले बताए । ‘प्रतिस्पर्धासँगसँगै विभिन्न विषयमा सल्लाह सहमति हुने लोकतन्त्रकै एउटा पाटो हो । त्यसो भएकाले संवाद सहमति भइरहन्छ,’ उनले भने ।

राष्ट्रपतिबाट मनोनीत हुने एकसहित २० जना राष्ट्रियसभा सदस्यको समयावधि फागुन २० मा सकिँदै छ । त्यसको रिक्त हुने १९ सिटका लागि माघ ११ मा चुनाव हुँदै छ । कांग्रेसले गठबन्धनमा १० सिट दाबी गर्दै आएको छ । एमालेलाई पनि भाग दिनुपर्दा कांग्रेसले ७ वा ८ सिट मात्र पाउनेछ ।

प्रकाशित मिति: बिहीबार, पुस १९, २०८० १४:२५