मेरो गायनयात्रालाई परिस्कृत बनाउन भ्वाइसयात्रा महत्त्वपूर्ण रह्योः विवेक बस्नेत (भिडियो)

मेरो गायनयात्रालाई परिस्कृत बनाउन भ्वाइसयात्रा महत्त्वपूर्ण रह्योः विवेक बस्नेत (भिडियो)

A+ A A-

सन् १९९७ मा सिक्किमको गान्तोकमा जन्मिएका हुन् विवेक बस्नेत । बुबाको जागिर नाम्ची सरुवा भएसँगै उनकाे परिवार बसाइँ सरेर नाम्ची पुग्यो । विवेकको बाल्यकाल त्यहीँ बित्यो । कलिलै उमेरमा गीतसंगीतप्रति आकर्षित बनेका विवेक स्कुलमा गुनगुनाइरहन्थे ।

छरछिमेकका कसैले गाउन लगायो भने रमाउँदै गाइदिन्थे । एक दिन छिमेकका एक जना दाइले विवेकका आमाबुबालाई भाइले धेरै राम्रो गाउँछ । उसको गायनमा धेरै सम्भावना छ, उसलाई संगीत कक्षामा भर्ना गरिदिनुपर्छ भने । तब विवेकलाई बुबाआमाले संगीत कक्षामा भर्ना गरिदिए । संगीत कक्षामा भर्ना भएपछि एकातर्फ उनको गायनमा निखारता आउँदै गयो, अर्काेतर्फ उनीभित्र संगीतको छाप प्रगाढ बन्न थाल्यो ।

विवेकको मावली हजुरबुबा भजन गाउँथे । त्यसबाहेक उनको परिवारका कोही पनि संगीत क्षेत्रमा थिएनन् । संगीतमा लागेर जीविकोपार्जन गर्छु भनेर कल्पना गर्ने अवस्था पनि थिएन । आज पनि सिक्किममा गीत गाएर अथवा गीतसंगीतमा लागेरै पेट पाल्छु भन्ने अवस्था कहाँ छ र ? छैन । तर, उनले त्यतातर्फ सोच्दै सोचेनन् । जो संगीतको अनौँठो लत उनमा परिसकेको थियो ।

त्यस बेला रिल भएको क्यासेट हालेर बजाउने वाकमेनमा गीत सुन्ने चलन थियो । नेपालबाट नारायण गोपाल, भक्तराज आचार्य, सुगम पोख्रेल, शम्भु राईलगायत गायकका गीत क्यासेटमार्फत सिक्किम पुग्थे । विवेकसँग पनि वाकमेन थियो । उनी नेपालबाट त्यहाँ पुगेका सबै गीत आफ्नो वाकमेनमा हालेर सुन्थे ।

‘त्यस बेलाका सबै गीत बाँच्ने खालका थिए । अहिले त सबै गीत नाच्ने खालका छन् । त्यसैले मलाई त्यतिबेलाका बाँच्ने गीहरूले प्रभाव पारेको थियो,’ विवेक सुनाउँछन् ।

उसो त त्यस समय सिक्किममा सांगीतिक संस्कार एकदमै कम थियो । एक/दुईवटा मात्र संगीत सिकाउने संस्थाहरू थिए ।

उनी स्कुल तथा संगीत सिक्ने संस्थाद्वारा आयोजित विभिन्न कार्यक्रममा गीत गाउन थाले । बिस्तारै पव तथा रेस्टुरेन्टमा पनि लाइभ गाउन थाले ।

सन् २०१८ मा विवेकले आफ्नै गीतको संग्रहका रूपमा ‘संघर्ष’ नामक आफ्नो पहिलो एल्बम निकाले । त्यसको चार वर्षपछि ‘मन्द झरी’ नामक दोस्रो एल्बम निकाले । ‘मन्द झरी’लाई सिक्किम, दार्जिलिङ तथा पूर्वी नेपालमा धेरैले रुचाएका थिए ।

विवेकले संगीतमै स्नातकोत्तरसम्मको अध्ययन पूरा गरे । त्यसपछि उनलाई संगीतमा आफूले सिकेको ज्ञान अरुमा पनि बाँड्नुपर्छ भन्ने महसुस भयो । अनि उनले बालबालिकाकेन्द्रित संगीत सिकाउने संस्था सुरु गरे ।

बालबालिकालाई संगीत सिकाउँदै, आफैँ पनि गाउँदै समय बिताइरहेका विवेकले नेपालमा ‘द भ्वाइस अफ नेपाल सिजन– ५’ को अडिसन खुलेको थाहा पाए । मोबाइलमा गीत रेकर्ड गरेर डिजिटल अडिसनका लागि पठाए । भ्वाइसमा छनोट भए । भ्वाइसयात्रामा विवेकले आफ्नो स्वरका कारण निर्णायकमण्डललाई मन्त्रमुग्ध बनाउनुका साथ लाखौँ नेपालीको मन जित्न सफल बने ।

‘द भ्वाइस अफ नेपाल सिजन–५’ मा सिक्किमको प्रतिनिधित्व गर्दै 'टप सेभेन'सम्म पुगेका विवेक कम भोटका कारण भ्वाइसबाट त बाहिरिइसकेका छन् । तर, आफ्नो गायनयात्रालाई थप परिस्कृत बनाउन भ्वाइसयात्रा महत्वपूर्ण रहेको उनी बताउँछन् ।

उनी भन्छन्, ‘सिक्किमको एउटा मध्यम वर्गीय परिवारमा जन्मिएर यहाँसम्म आइपुग्न मलाई सहज थिएन । भ्वाइसको यो यात्रा मेरो जीवनकै सबैभन्दा महत्त्वपूर्ण अनुभव र पाठ पनि बन्यो ।’

आफूले जीवनको यो आयामसम्म सिकेको र जानेको संगीत नै भएकाले अब पनि संगीतलाई नै निरन्तरता दिने सोचमा आफू रहेको उनी सुनाउँछन् । आउँदा दिनमा कुनै गीतमा काम गर्दा यो गीतलाई कति मान्छेले सुन्छन् वा हेर्छन् भनेर होइन कि राम्रो गर्ने र बाँच्ने खालका गीतहरू गाउने सोच रहेको विवेकको भनाइ छ ।