कहिले होला सरर.. गुड्ने बस ?

A+ A A-

नेपालकै नमूना सडकका रुपमा परिकल्पना गरिएको बेलबास–बेथरी नमूना सडक निर्माणको कामले गति लिन थालेको छ । १ अर्व ६७ करोडको लागतमा निर्माण थालिएको २२ किलोमिटरको सडक आयोजना केन्द्र सरकारबाट प्रदेश सरकारमा हस्तान्त्रण भएपछि गती लिन थालेको हो । १ वर्ष सम्म विभिन्न बहानामा सडक निर्माण अलपत्र परेपनि पछिल्लो समय प्रदेश सरकारको सहजिकरणमा धमाधम काम भैरहेको छ ।

अन्तर्राष्ट्रिय महत्वका प्रमुख पर्यटकीय क्षेत्रका रुपमा रहेको बुद्धजन्मस्थल लुम्बिनी पुग्न पूर्व– पश्चिम राजमार्गबाट नमुना सडकको परिकल्पना गरी निर्माण सुरु गरिएको बेलवास बेथरी सडक निर्माणको कामले गति लिन थालेको हो । बुटवलको नहरपुरदेखि बेथरीसम्म नहरको दुबैतिर दुई–दुई लेनको सडक र नहरको छेउछाउमा हरियालीसहितको उद्यान बनाउने योजना सहितको नेपालमै सम्भवत नमुना र महत्वकांक्षी योजनाको रुपमा यसलाई अगाडि सारिएको हो। २०७३ साल देखि सुरु गरिएको आयोजना तिन वर्षमा सकिसक्नुपर्ने थियो ।अघिल्लो आर्थिक वर्षसम्म संद्यिय सरकारबाट सञ्चालित आयोजनाले गति लिन सकेको थिएन । आयोजना प्रदेश सरकारलाई हस्तान्त्रण भएयता यसले केही चरणको काम सम्पन्न गरेको छ । आयोजनाको तिन खण्डमा काम भैरहेको छ जसमध्य दुई ठेक्काको गत साउन १४ गतेनै समयसिमा सकिएको छ भने एउटा खण्डको अझै १ वर्ष समय बाँकी छ ।

प्रदेश सरकारले यस आयोजनाको म्याद थपको प्रकृया अगाडी बढाएको छ र अव थप भएको समय सिमा भित्रै निर्माण कार्य सम्पन्न गर्ने तयारी समेत गरेको छ । विशेष गरि आयोजना सिंचाई नहरको व्यवस्थापन, खानेपानीका पाईपहरु, नहर निर्माण, रुख कटानी, विद्युतका पोलहरु सार्ने र घर टहराहरु भत्काउनु पर्ने जस्ता कामहरुले गर्दा समयमै सम्पन्न नभएका कारण काममा ढिलाई भएको भौतिक पुर्वधार विकास मन्त्रालयका प्रबक्ता भिमार्जुन पाण्डेले बताए ।

यो सडकलाई भैरहवामा निर्माणाधिन गौतमबुद्ध अन्तर्राष्ट्रिय विमानस्थल र बुद्धजन्मस्थल लुम्बिनीसँग जोड्ने महत्वपूर्ण आयोजनाको रुपमा लिइएको छ । पूर्व–पश्चिम राजमार्ग हुँदै विमानस्थल र बुद्धजन्मस्थल लुम्बिनी पुग्ने वा पूर्व–पश्चिम राजमार्ग निस्कने यात्रुुका लागि आवश्यक पर्ने वैकल्पिक सुन्दर सडकको रुपमा यसलाई अगाडि बढाइएको हो । २२ किलोमिटरको यो सडक नमुना हुने भएकाले पर्यटकका लागि आकर्षणको केन्द्र बन्नेछ ।

सडक निर्माण अन्तर्गत नहर सफा गरेर नहरको दुबैतर्फ पक्की पर्खाल उठाउने काम , नहरको एउटा किनारमा सडको ट्राक खोल्ने काम सम्पन्न भएको छ भने केही खण्डमा अस्फाल्टको काम समेत भैरहेको छ । १ अर्ब ६७ करोडको लागतमा निर्माण सम्झौता गरिएको सडक निर्माण ४५ प्रतिशत सम्पन्न भएको छ । त्यस्तै, आयोजनाको आर्थिक प्रगति पनि पेश्की रकम सहित ४५ प्रतिशत नै रहेको छ । अन्तर्रा्ष्ट्रिय विमानस्थल र लुम्बिनी आवतजावतको प्रमुख मार्गको रुपमा अगाडि सारिएको यो सडक भविष्यमा पर्यटकीय सडकको रुपमा विकास गर्ने लक्ष्य छ ।

बुटवलको बेलवास झोलुुङ्गेपुल चोकदेखि भैरहवा–लुम्बिनी सडकको बेथरीसम्म २२ किलोमिटर लामो यो सडकको बीचमा नहर छ । नहरको दुवैतिर हरियाली बनाउन ग्रिनेरी बेल्ट छ त्यसको बाहिर सात÷सात मिटर फराकिला सडक , त्यसबाहिर दुई मिटरको साइकल लेन र १.८ मिटरको फूटपाथ समेत बन्नेछ । नहरको दुवै साइडको भित्तामा फूल र दुबो रोपेर हरियाली बनाइनेछ ।

दुवैतिर सडक बत्ती र नहरको पानीतर्फ फर्काइएका रङ्गीन बत्तीले यो सडकलाई आकर्षक बनाउनेछन् । नहरमा पानीको मात्रा बढाई र लामो दूरीको बोटिङसमेत गर्न सकिने व्यवस्था मिलाइने बताइएको छ । संद्यिय सरकारबाट प्रदेश मातहतमा आएको आयोजनाको निर्माणमा प्रदेशको सरकारको सकारात्मक भूमिका दखिएको छ । र अव आयोजनाको म्याद थप भएको समयभित्रै सम्पन्न गर्ने पनि प्रदेश सरकार सफल बन्न सकोस ।

प्रकाशित मिति: सोमबार, असोज २०, २०७६ ०९:११