अमेरिका र दक्षिण कोरियाले किम जोङ उनको हत्या गर्न खोजेका हुन् ? (भिडियो)

A+ A A-

आइतबार अंग्रेजी नयाँ वर्षको पूर्वसन्ध्यामा उत्तर कोरियाली सर्वोच्च नेता किम जोङ उन अमेरिका र दक्षिण कोरियाप्रति ज्यादै आक्रामक बने । उनले ती राष्ट्रहरूले जतिबेला पनि आक्रमण गर्नसक्ने भन्दै आफ्ना सेनालाई हरेक समय युद्धका लागि तयार हुन भने ।

यतिबेला अमेरिका र दक्षिण कोरियाबाटै उत्तर कोरियाली सर्वोच्च नेताको हत्या गर्ने योजना बनेको समाचारहरू बाहिरिएका छन् । गतवर्ष जब दक्षिण कोरियाली राष्ट्रपति युन सुक योल अमेरिका भ्रमणमा गएका थिए उनले अमेरिकी समकक्षी जो बाइडेनसँगको भेटमा किमको शासन समाप्त गरिदिने वाचा गरेका थिए ।

उत्तर कोरियाले परमाणु हतियार आक्रमण गरे मिलेर किमको शासन समाप्त गर्नुपर्छ भनेर उनीहरूले प्रतिवद्धता जाहेर गरेका थिए । न्युयोर्क पोस्टको समाचारअनुसार यतिबेला अमेरिकी योजनाअनुसार अमेरिकी र दक्षिण कोरियाली सेनाले किमको सम्भावित हत्याका लागि हत्या अभ्यास गरिरहेका छन् ।

किमले नयाँवर्षको पूर्वसन्ध्यामा सन् २०२४ मा थप तीन जासुसी भूउपग्रह अन्तरिक्षमा तैनाथ गर्ने र परमाणु हतियार विकास गर्ने बताएपछि नै दक्षिण कोरियाका रक्षामन्त्री सिन वन–सिकले किम समाप्त गर्ने विषयबारे खुलासा गरेको समाचारमा जनाइएको छ ।

रक्षामन्त्रीले किमलाई तानाशाह भन्दै उनको हत्या योजनाबारे खुलेर कुरा गर्न नसकिने उल्लेख गरेको पनि न्युयोर्कपोस्टको दाबी छ । अमेरिका र दक्षिण कोरियाले किमलाई समाप्त गर्न भित्रभित्रै तयारी गरिरहेको खबर पहिलोपटक भने चर्चामा आएको होइन ।

यसअघि सन् २०१७ को मे महिनामा उत्तर कोरिया आफैंले आफ्ना सर्वोच्च नेता किमको हत्या गर्न खोजेको भनेर अमेरिका र दक्षिण कोरियाविरुद्ध अभिव्यक्ति नै दिएको थियो । त्यसबेला उत्तर कोरियाले आफ्ना नेता किमलाई हत्या गर्न अमेरिकी केन्द्रीय अनुसन्धान ब्यूरो सीआईए नै लागि परेको आरोप लगाएको थियो । प्योङयाङका अनुसार अमेरिका र दक्षिण कोरियाले त्यसबेला उत्तर कोरियाकै एक व्यक्तिलाई हत्याका लागि खटाएका थिए ।

रुसको काठ कम्पनीमा काम गर्ने उत्तर कोरियाली नागरिकलाई सीआईएले सन् २०१४ मा प्रलोभनमा पारेको, ती व्यक्तिले सन् २०१६ को जनवरी, मे, अगस्ट र सेप्टेम्बरमा दक्षिण कोरियाली एजेन्टलाई भेटेको र फेरि ती व्यक्तिलाई सन् २०१७ को मार्च र अप्रिलमा चीनमा दक्षिण कोरियाली एजेन्टले भेटेर ‘जैविक रासायनिक पदार्थ’को प्रयोगबाट नेता किमको हत्या गर्न लगाएको उत्तर कोरियाली भनाइ थियो । यद्यपि त्यो प्रयास असफल भएको उत्तर कोरिया बताउँछ ।

यदि उक्त जैविक रसायनिक पदार्थ नेता किममा प्रयोग भएको भए किमको ६ देखि १२ महिना भित्र मृत्यु हुनेथियो र उनको मृत्युको कारण कसैले थाहा नपाउने बताइन्छ ।

यस्तै सन् २०१७ कै सेप्टेम्बर महिनामा पनि उत्तर कोरियाले हाइड्रोजन बमको परीक्षण गरेको बताएपछि दक्षिण कोरियाले किम जङ–उनको हत्या गर्नका निम्ति विशेष फौजको एउटा कार्यदल बनाउने योजनालाई अनुमोदन गरेको खबर बाहिरिएको थियो ।

विश्लेषकहरूका अनुसार अमेरिका र दक्षिण कोरियाले यदि किममाथि आक्रमणको योजना बनाउँदैछन् भने उनीहरू सजग भने रहनुपर्छ । किनभने उत्तर कोरिया आफैंमा परमाणु हतियार सम्पन्न राष्ट्र हो, उत्तर कोरियासँग त्यो भन्दा शक्तिशाली हाइड्रोजन बम भएको पनि बताइन्छ । किमको हत्या भए परमाणु युद्ध सुरु हुने र विश्वमा विध्वंश मच्चिनसक्ने अनुमान लगाइन्छ ।

त्यसो त किमको हत्या प्रयास गर्नु निकै कठिन कार्य पनि हो । उनी २४ घण्टा नै सुरक्षाकर्मीको घेरामा हुन्छन् । उनको देशबारे विश्व नै बेखबरजस्तै छ । यस्तै किमसम्म पुग्ने मानिस उनकै विश्वास पात्रमात्र हुन्छन् ।

(भिडियो)

प्रकाशित मिति: सोमबार, पुस १६, २०८० १५:०८