भित्र कांग्रेस बैठक, बाहिर राष्ट्रियसभा टिकट माग्नेकाे लर्काे

A+ A A-

‘राष्टियसभाका लागि बाख्रा बेचेर सुन्धारामा आएका छन् । होटलमा आएर मान्छे बसेका छन् विचार गरियोस्,’ कांग्रेस केन्द्रीय सदस्य जीवन शाहीले शनिबार केन्द्रीय समिति बैठकमा भने । उनले भनेजस्तै यतिबेला देशभरबाट राष्ट्रियसभाका आकांक्षीहरू काठमाडैमा छन् । उनीहरूले पार्टीमा टिकट माग्न र नेताहरूलाई आफ्नो पक्षमा लबिङ गरिदिन आग्रह गरिरहेका छन् ।

११ माघमा हुने राष्ट्रियसभा चुनावका लागि प्रदेशबाट आकांक्षीकाे नाम केन्द्रमा सिफरिस भएकाे छ । यसरी सिफारिसमा परेकाहरूले लबिङ गरिरहेका छन् ।

सभाहलमा केन्द्रीय समिति बैठक चलिरहँदा बाहिर र क्यान्टिनमा टिकटका आकांक्षीकाे बाक्लाे उपस्थिति थियाे । उनीहरूले ‘लौन दाईलाई भन्दिनपर्‍याे’ भन्दै आफ्नो योगदान र क्रियाशीलताको बयान गरिरहेका थिए । सहमहामन्त्री किशोरसिंह राठाैरले एक आकांक्षीको सिफारिस गर्न कागजमा हस्ताक्षर गर्न मानेनन् । उनी सम्झाउँदै थिए, ‘तपाईं सभापति हो ? तपाईंको फोटो पार्टी कार्यालयमा हुन्छ । मेरो हुन्छ ? छ ?’ राठाैरले सम्झाउँदै गरेका व्यक्ति सेतै फुलेका पुराना जिल्ला सभापति थिए ।

राठाैरले कागज हेर्न नमानेका अर्का आकांक्षी भने गुनासो गर्दै थिए, ‘हेर्नै मान्नुहुन्न ।’ कांग्रेसका इतर समूहका नेता सञ्जय गौतमलाई अर्का आकांक्षी भन्दै थिए, ‘लौन समूहमा भन्दिन पर्‍याे । महामन्त्री (गगन थापा) लाई भन्दिन पर्‍याे ।’ जारी बैठकमा समूहका नेता शेखर कोइराला उपस्थित छैनन् ।

यस्तै गुनासो आइरहँदा एक पदाधिकारीका सहयोगीले फोनमा भन्दै थिए, ‘५०० कोटा परेमात्रै सबैलाई टिकट दिन सकिन्छ ।’ कांग्रेस पदाधिकारी पार्टी मुख्यालय सानेपामा भेटिने हुँदा टिकटका आकांक्षीले नेतालाई दबाब दिने थलो भेटाएका छन् ।

मन्त्रीले काम गर्न सकेनन्

अघिल्ला दुई दिनको जस्तै शनिबार पनि बैठकमा कांग्रेसका मन्त्रीहरूले काम गर्न सकेनन् भन्ने गुनासो उस्तै थियो । केन्द्रीय सदस्य प्रदीप पौडेलले जे गरे पनि मन्त्रीहरूलाई जनताले नपत्याएको बताए । ‘जे गरे पनि जनताले मन्त्रीलाई पत्याएका छैनन् । सुशासनको रोडम्याप बनाउँ,’ उनले भने । कांग्रेसले पुस १६ गतेदेखि गर्ने समुदायमा कांग्रेस अभियानमा योजना लिएर जानुपर्नेमा उनले जोड दिए । ‘योजना लिएर मात्र समुदायमा कांग्रेस अभियान लिएर जाउँ,’ उनले भने । प्रदेशलाई अधिकार दिनुपर्ने पौडेलको माग थियो ।

प्रतिनिधिसभामा कांग्रेसका प्रमुख सचेतक तथा केन्द्रीय सदस्य रमेश लेखकले मन्त्री फेर्ने होइन कार्यशैली फेनुपर्ने बताए । ‘जनताको जीवनको तथ्यांक खाेजौँ, मन्त्रीको भाषण होइन । मन्त्रीको तथ्यांकसँग विश्वास छैन । मन्त्री हाेइन कार्यशैली फेरौँ । संविधानमा संशोधन गर्नुपर्ने छ भने गरौँ,’ उनले भने ।

केन्द्रीय सदस्य अर्जुननरसिंह केसीले भ्रष्टाचारले जनतामा असन्तुष्टि रहेको बताए । ‘सरकारमा कांग्रेसले उपस्थिति देखाउन सकेन । कांग्रेस सरकारमा मुकदर्शक भयो,’ उनले भने ।

बालकुमारी घटना

लेखकले बालकुमारी घटनाजस्तै अरु घटना हुन नदिने सरकारले प्रतिबद्धता जाहेर गर्नुपर्ने बताए । ‘बालकुमारी घटना दुखद् हो । यस्तो घटना नदाेहार्‍याउन सरकारले प्रतिबद्धता जाहेर गरोस्,’ उनले भने । केन्द्रीय सदस्य गोमा भट्टराईले बालकुमारी घटनालाई लिएर गृहमन्त्रीले राजीनामा दिने हो कि होइन भनेर प्रशन गरिन् । ‘हिजोको घटनामा गृहमन्त्रीले राजीनामा दिने हो कि कि हो ?,’ उनले भनिन् । केन्द्रीय सदस्य सिता रानाले पनि बालकुमारी घटनाका दाेषीमाथि कारबाही हुनुपर्ने बताइन् ।

प्रदेशको छेडखानी

आमन्त्रित सदस्य तथा लुम्बिनी प्रदेश सभापति अमरसिंह पुनले पार्टीले महामन्त्रीलाई प्रदेशमा बोलाउँदा सभापतिलाई थाहा नदिएको बारे प्रश्न उठाए । ‘प्रदेशबारे पार्टीले सोचोस् । प्रदेशले महामन्त्री बोलाउँदा प्रदेश सभापतिले थाहा दिइँदैन यो के हो ?,’ उनले भने । पुनलाई काउन्टर दिँदै दाङका केन्द्रीय सदस्य गेहेन्द्र गिरीले प्रदेश सभापतिले विभाग बनाउँदा अरलाई किन थाहा नभएको भनेर जवाफ माग गरे । ‘सभापति ज्यूले विभाग बनाउँदा हामीले थाहा पाउँदैनौँ,’ उनले भने ।

केन्द्रीय सदस्य आरजु राणा देउवाले सम्मानितलाई राष्ट्रियसभामा ल्याउनुपर्ने बताइन् । ‘युवाहरू विदेश पलायन हुन दिन भएन,’ उनले भनिन् ।

केन्द्रीय सदस्य जीपछिरिङ लामाले आफू राष्ट्रियसभाको आकांक्षी रहेको बताए । त्यस्तै, केन्द्रीय सदस्य गिरीले संगठन कमजोर भएको र निर्वाचितले पार्टीलाई वास्ता नगरेको बताए । बैठकमा केन्द्रीय सदस्य मीनाक्षी झाले महिलालाई उपसभापति र महामन्त्री बनाउनुपर्ने बताइन् ।

प्रकाशित मिति: शनिबार, पुस १४, २०८० १८:३५