सरकारी विद्यालयको दुरावस्थाः ४ सय विद्यार्थी चिसो भुईंमा बसेर पढ्न बाध्य, घरबाटै लिएर जान्छन् बोरा

सरकारी विद्यालयको दुरावस्थाः ४ सय विद्यार्थी चिसो भुईंमा बसेर पढ्न बाध्य, घरबाटै लिएर जान्छन् बोरा

A+ A A-

बाराको आदर्श कोतवाल गाउँपालिका-५ को नेपाल राष्ट्रिय आधारभूत विद्यालय टेढाकट्टीमा बालबालिका भुईँमा बसेर पढ्न बाध्य छन् । भएको पुरानो भवमा बेञ्च नहुँदा करिब ४ सय विद्यार्थी विजोग अवस्थामा पढ्ने गरेका छन् ।

विशेषगरी दलित, गरिब तथा पिछडिएका समुदायका बालबालिका पढ्ने २०२२ सालमा स्थापित विद्यालयकाे अवस्था सुधार्न जनप्रतिनिधिले समेत खासै ध्यान दिएकाे पाइँदैन ।

विद्यालयमा टेबल र बेञ्च नभएकाले बालबालिका आ-आफ्नाे घरबाट बोरा बोकेर विद्यालय धाउने गरेका छन् । र, पढ्न बस्दा त्यही बोरा ओछ्याउँछन् ।

आर्थिक अभाव, सरकारको बेवास्ता तथा विद्यालय व्यवस्थापन समितिको लापरवाहीका कारण बालबालिका बिजाेग भइरहेकाे अभिभावकहरू बताउँछन् ।

तीन वर्षअघि गाउँपालिकाले नयाँ भवन बनाउने भनेपछि पुरानो पाँच कोठे भवनमा सुधारका लागि थप लगानी भएको छैन । सो विद्यालयका प्रधानाध्यापक सारदा सिंहले बेन्च नहुँदा समस्या भएको दुखेसो पोखिन् । विद्यालयको दुरावस्थाबारे गाउँपालिकाका शिक्षा शाखासहित गाउँपालिका अध्यक्ष जवाहरप्रसाद साह र प्रमुख प्रशासकीय अधिकृत नथु सहनीलाई जानकारी दिएको तर कसैले गम्भीररूपमा नलिएको विद्यालयका प्रअ सिंहको गुनासो छ ।

यता, आदर्श कोतवाल गाउँपालिका -५ का वडा अध्यक्ष रुपेशनारायण सिंहले विद्यालयकाे नयाँ ४ कोठे भवन निर्माण भइसकेको दाबी गरे । यो वर्ष जसरी भए पनि विद्यालयलाई नयाँ भवनमा सार्ने उनकाे भनाइ छ । उनले ५ नम्बर वडामा ३ वटा विद्यालय भए पनि गाउँपालिकाले ५ नम्बर वडाको विकासका लागि मात्र ५० लाख रुपैयाँ बजेट विनियाेजन गरेका कारण आफूहरूलाई विद्यालयको शैक्षिक अवस्था सुधार्न समस्या भएको बताए ।

विद्यालयमा विशेषगरी विपन्न र दलित समुदायका बालबालिका पढ्छन् । संरचना अभावमा उनीहरू बोरा ओछ्याएर पढ्न बाध्य छन् । १ देखि ५ कक्षासम्म पढाइ हुने यस विद्यालयमा करिब चार सय विद्यार्थी छन् । विद्यार्थी राखेर पढाउन कक्षाकोठा अपुग भएपछि विद्यालयले २ देखि ३ वटा कक्षाका विद्यार्थीलाई एउटैमा राखेर बहुकक्षा सञ्चालन गर्दै आइरहेको छ । जसले विद्यालयको पढाइ केवल औपचारिकतामा सीमित छ ।

प्रकाशित मिति: शनिबार, पुस १४, २०८० १२:३४