पार्टीसँग मधु आचार्यको माग: जनताको चुलाेमा सघाउ पुग्ने गरी हाम्रा मन्त्रीले के गरे ? जानकारी चाहियो

पार्टीसँग मधु आचार्यको माग: जनताको चुलाेमा सघाउ पुग्ने गरी हाम्रा मन्त्रीले के गरे ? जानकारी चाहियो

A+ A A-

मन्त्रीहरूको कार्यसम्पादन

'समुदायसँग नेपाली कांग्रेस' लिएर हामी जनताकहाँ त जाने तर के भन्न जाने ? जनताका बीच जाने कुरा जति सकारात्मक छन, उनीहरूबीच पस्किने सन्देश सकारात्मक बनाउनेतर्फ हाम्रो गम्भीरता खोई ? सरकारमा गएका साथीहरूले जनताको मन जित्ने के काम गरे ? कमसेकम महिनाको एउटाको दरले नै सही जनताको भात-भान्सालाई सहयोग पुग्नेगरी के गरियो, जानकारी चाहियो ।

राष्ट्रियसभामा उम्मेदवारी

जनताकहाँ जाँदा राष्ट्रिय सभाको निर्वाचनमा हामीले कुनै दाग नलागेका, पार्टीमा लामो योगदान गरेर कहिल्यै कुनै अवसर नपाएका, विभिन्न पेशा व्यवसायमा रहेर पनि लोकतान्त्रिक आन्दोलनमा उल्लेख्य भूमिका खेलेका, राष्ट्रिय सभाको गरिमा उच्च गर्नसक्ने युवा प्रतिभाहरू पठायौं भनेर सगौरव सुनाउन पाउने कि नपाउने ?

महासमिति बैठक र पार्टी रुपान्तरण

महासमिति बैठकबाट अब साँच्चै पार्टीलाई जनता, मतदाता र भुईं सदस्यहरूले चाहेजस्तो रुपान्तरण गर्दैछौं भनेर ढुक्कसँग भन्न पाइने कि नपाइने ? यो बैठकले गर्ने निर्णय र लगत्तै चालिने कदमहरूबाट यसको सकारात्मक जवाफ आउनुपर्छ ।

नेतृत्व मर्यादाक्रम

पार्टीभित्र मर्यादाक्रमको विषय केही दिनयता पेचिलो बन्दै गएको छ। जिल्ला-जिल्लामा आसन र भाषणकै कारण साथीहरूलाई कार्यक्रम राख्न र संचालन गर्न समस्या परिरहेको छ। शीघ्र यसको निर्धारण गरौं र सार्वजनिक गरौं । केही त्रुटि देखिए परिमार्जन गर्दै जाऔंला ।

प्रदेशको सशक्तीकरण

जनताले सोध्ने संघीयतासम्बन्धी जिज्ञासामा हामी के बोल्ने ? संघीयता पक्षधर हौं भने किन हाम्रै प्रदेश समिति र प्रदेश सरकारका आग्रहप्रति ध्यान दिइरहेका छैनौं ? यी दुवैलाई साधन, स्राेत, अधिकार र आवश्यक कानूनले सम्पन्न बनाऔं ।

भातृ संस्थामा प्रत्यक्ष निर्वाचन

अन्तमा, बेलैमा सकारात्मक पहल नगर्ने हो भने भातृ शुभेच्छुक संस्थाहरू असान्दर्भिक बन्ने खतरा बढ्दै गएको छ। यही बैठकबाट यिनको अधिवेशनको निश्चित मिति निर्धारण गरौं, देशव्यापी सदस्यता वितरणको जिम्मेवारी तोकौं र सबै सदस्य मतदाता रहनेगरी प्रत्यक्ष निर्वाचनमार्फत तहगत नेतृत्व चयन गरौं । यो अभ्यास र अनुभव भोलि पार्टी अधिवेशनका लागि पनि फलदायी हुन्छ ।

(नेपाली कांग्रेसका केन्द्रीय सदस्य मधु आचार्यले १३ पुसमा केन्द्रीय कार्यसमितिको बैठकमा राखेको धारणा)

प्रकाशित मिति: शनिबार, पुस १४, २०८० ११:००