कांग्रेस केन्द्रीय समितिमा बहसकाे केन्द्र- वरीयता ‘क्लियर’ गरौँ

A+ A A-

नेपाली कांग्रेसको जारी केन्द्रीय समिति बैठकमा केन्द्रीय सदस्यहरूले पार्टीको वरीयता ‘क्लियर’ गर्न माग गरेका छन् । कांग्रेसभित्र वरीयताको किचलो छ । १४औँ महाधिवेशनमा सभापतिमा शेरबहादुर देउवासँग पराजित शेखर कोइरालालाई कांग्रेसको सार्वजनिक कार्यक्रममा कतै दोस्रो वरीयतामा राखिएको छ भने कतै वरीयता विवादलाई लिएर उनलाई निम्तासमेत गरिएको छैन ।

कांग्रेसको लुम्बिनी र गण्डकी प्रदेशसभा सम्मेलनमा शेखरलाई सभापति देउवापछिको दोस्रो स्थानमा आशन ग्रहण गराइएको थियो भने मधेश प्रदेश सम्मेलनमा शेखर गएका थिएनन् । त्यस्तै, बागमती प्रदेश सम्मेलनमा उनलाई बोलाइएको थिएन ।

वरीयता ‘क्लियर’ गरौँ

वरीयता क्रमले पार्टीको काम कारबाही नै प्रभावित हुन थालेपछि केन्द्रीय सदस्यले भन्न थालेका छन्- यसलाई धेरै पल नधकेलियोस् । जारी बैठकबाट टुंगो लगाइयोस् । केन्द्रीय सदस्य मधु आचार्यले भने, ‘पार्टीको मर्यादाक्रमबारे स्पष्ट गरियोस् ।’

अर्का केन्द्रीय सदस्य अर्जुन जोशीले पनि पार्टीभित्रको प्रोटोकलबारे स्पष्ट पार्न आग्रह गरे । उनले पार्टीको आन्तरिक मतभेद छताछुल्ल नपार्न पनि भने । ‘आन्तरिक मतभेद छताछुल्ल नबनाऔँ । अनुशासन कायम गरौँ । मर्यादाक्रम के हो, जानकारी गराऔँ,’ उनले भने ।

त्यस्तै, केन्द्रीय सदस्य तथा खेलकुदमन्त्री डिकबहादुर लिम्बूले पनि मर्यादाक्रम मिलाउन माग गरे । ‘१४औँ महाधिवेशनपछि पार्टीको संगठन राम्रो छैन । मर्यादाक्रमको विवाद तुरुन्त निराकरण होस्,’ उनले भने ।

अर्का केन्द्रीय सदस्य रामहरि खतिवडाले पनि मर्यादाक्रम विवाद टुंग्याउन माग गरे । ‘मर्यादाक्रम विवाद यही केन्द्रीय समिति बैठकले टुंग्याओस्,’ उनले बैठकमा भने । खतिवडाले वरीयता विवाद टुंग्याएर पुस १६ देखि हुने समुदायमा कांग्रेस अभियान सुरु गर्नुपर्ने माग गरे ।

मधेश प्रदेश सम्मेलनमा कार्यक्रमस्थल पुगेर पनि विमलेन्द्र निधि मञ्चमा जान मानेका थिएनन् । ‘मधेश प्रदेश सम्मेलनमा ऊर्जा आएन । शेखर कोइराला किन आउनु भएन ? विमलेन्द्र निधि किन मञ्चमा बस्नुभएन ? आफ्नो घर व्यवस्थापन गरौँ,’ केन्द्रीय सदस्य चन्द्रमोहन यादवले भने ।

मन्त्रीको ब्रिफ

शुक्रबारको बैठकमा अर्थमन्त्री प्रकाशशरण महत, परराष्ट्रमन्त्री एनपी साउद र शहरी विकासमन्त्री सीता गुरुङले मन्त्री बनेपछि गरेका कामको विवरण पेस गरेका थिए । त्यस्तै, महिला तथा बालबालिकामन्त्री सुरेन्द्र आचार्य र खेलकुदमन्त्री डिगबहादुर लिम्बूले पनि धारणा राखेका थिए ।

बैठकमा अर्थमन्त्री महतले आफूले सम्हाल्दा अर्थतन्त्रमा समस्या रहेको र अहिले अर्थतन्त्र सकारात्मक दिशामा गएको बताए । अर्थमन्त्री सम्हाल्दै गर्दा स्रोतसमेत नभएको उनले बताए । केन्द्रबाट ३ करोड र प्रदेशबाट १ करोडभन्दा तलको परियोजना नगर्ने ब्रिफ गरेका थिए ।

ब्याजदर घट्दा ऋण कारोबार बढेको र जग्गाको कारोबार पनि बढेको उनले बताए । मूल्यवृद्धि ५.३८ प्रतिशतमा झरेको बताए । शेयर मार्केट बढेको र फेरि पनि बढ्न सक्ने उनले बताए ।

सीता गुरुङले मन्त्रालयको प्रगति १० प्रतिशतबाट बढेर ६० प्रतिशत पुगेको बताइन् । उनले ४६ अर्बको बजेटबाट ७०१ योजना समावेश भएको बताइन् ।

त्यसैगरी, परराष्ट्रमन्त्री साउदले इजरायल आक्रमणमा निधन भएका नेपालीहरूको शव नेपाल ल्याउन तथा नेपाल फर्कन इच्छुक इजरायलस्थित नेपालीहरूको उद्धारका लागि समन्वय गरिएको, उद्धारका लागि आफैँ गएको र बेपत्ताको खोजी भइरहेको बताए ।

मन्त्री साउदले राहदानी सेवा व्यवस्थित गरिएको बताए । उनले भने, 'एक महिनाका लागि अग्रिम अनलाइन आवेदन फाराम खोल्न सुरु गरिएको छ । करिब दुई वर्षलाई पुग्ने गरी राहदानी कपी मौज्दातमा राखिएको छ । थप राहदानी खरिदका लागि खरिद टेन्डर प्रक्रिया अगाडि बढाइएको छ ।'

कन्सुलर सेवा विभागले गत साउन २१ देखि प्रहरी चारित्रिक प्रमाणपत्रलाई पूर्ण रूपमा अनलाइन माध्यमबाट प्रमाणीकरण गर्ने व्यवस्था गरेको मन्त्री साउदले बताए । मन्त्रालयलाई संरचनागत सुधार गर्ने काम भइरहेको पनि उनले जानकारी दिए ।

राष्ट्रियसभाको चर्चा

बैठकमा केन्द्रीय सदस्य खतिवडाले राष्ट्रियसभालाई पब्लिक स्टल नबनाउन आग्रह गरे । ‘राष्ट्रियसभा चुनाव हार्नेहरूको डम्पिङ साइड नबनाइयोस्,’ उनले भने । मन्त्रीहरूको कार्यसम्पादनप्रति पनि उनी चर्को सुनिए । ‘मन्त्रीहरू परिवारवादी भए । गाउँमा हामी जाँदा कालो मोसो दल्ने भएका छन् भने मन्त्रीहरू गोरा भएका छन्,’ उनले भने ।

केन्द्रीय सदस्य धना खतिवडाले आफू फेरि पनि राष्ट्रियसभा उम्मेदवार बन्न पाउनुपर्ने बताए । केन्द्रीय सदस्य आंगलु शेर्पाले पनि न्याय चाहिएको बताए । उनी कोशी प्रदेशबाट राष्ट्रियसभा चुनावका लागि सिफारिस भएका छन् । त्यस्तै, केन्द्रीय सदस्य टेकप्रसाद गुरुङले एकै व्यक्तिलाई पटक–पटक अवसर दिने पद्धति अन्त्य हुनुपर्ने बताए ।

प्रकाशित मिति: शुक्रबार, पुस १३, २०८० २१:०५